L-ewwel paġni tal-gazzetti Taljani (29 ta’ Ġunju 2022)
Qed inwasslulkom l-ewwel paġni tal-gazzetti Taljani tal-isports tal-lum id-29 ta’ Ġunju 2022
Magħrufa l-kowċis tat-timijiet Under 19 u Under 23 ta’ Juventus
Juventus ħabbru b’mod uffiċjali l-kowċis il-ġodda maħtura biex imexxu lit-tim tal-Under 19 (il-Primavera) u l-Under 23.
Massimo Brambilla se jkun qed imexxi lit-tim Under 23. Hu ġej minn seba’ snin ma’ Atalanta fejn fost l-oħrajn mexxa lit-tim Primavera għal ħames snin sħaħ u rebaħ żewġ kampjonati u żewġ Super Cups. Hu meqjus bħala l-kowċis ideali biex jgħin lill-plejers jimmaturaw u jkunu lesti għall-ewwel tim ta’ Juventus.
Il-Primavera, imbagħad, se tkun immexxija minn eks plejer ta’ Juventus li għadu fil-qalb ta’ ħafna supporters Juventini: Paolo Montero. Hu għandu esperjenza tajba fi tmexxija ta’ timijiet fl-Urugwaj (Penarol) u l-Arġentina (Boca Unidos, Rosario Central u San Lorenzo). Fl-Italja mexxa lit-tim ta’ Sambenedettese.
Nawgurawlhom il-ħidma t-tajba.
Matthew Scerri
Cambiaso se jibqa’ ma’ Juventus jew se jkun misluf?
Andrea Cambiaso jinsab pass ‘il bogħod milli jsir plejer ta’ Juventus. Allegatament jeżisti ftehim bejn Juventus u Genoa sabiex Cambiaso jingħaqad mal-Bianconeri għall-prezz ta’ 4 jew 5 miljun Ewro. Flimkien ma’ dis-somma Juventus se jgħaddu lil Genoa anki lil Dragusin. Hemm għidut li Cambiaso se jkun misluf lil Atalanta, għalkemm skont rapporti oħra Cambiaso jista’ jkun is-sostitut ta’ Pellegrini li mistenni jitlaq lil Juventus.
Matthew Scerri
L-attenzjoni issa ddur fuq Zaniolo
Hekk kif tidher li waslet fi tmiemha t-telenovela Di Maria, Juventus x’aktarx dawru issa ħarsithom fuq Nicolò Zaniolo. Hu qed jissemma bħala t-tielet akkwist eċċellenti tal-Bianconeri wara Pogba u Di Maria li għalkemm għadhom mhux imħabbra uffiċjali, ftit li xejn jifdal dubji dwar il-fatt li se jilbsu l-flokk ta’ Juventus. Waqt li Pogba u Di Maria ma swew xejn lil Juventus minħabba li huma free-agents, Zaniolo jaf ifisser investiment important min-naħa tal-Bianconeri. MInn dak li nafu, il-ġimgħa li għaddiet Cherubini kellu laqgħa ma’ Thiago Pinto. Il-partijiet tkellmu, fost l-oħrajn, anki dwar il-possibbiltà ta’ trasferiment ta’ Zaniolo ma’ Juventus. Jidher li Roma qed ikollhom diffikultajiet kbar biex jikkonvinċu lil Zaniolo jiffirma kuntratt ġdid magħhom u fehmu li x’aktarx ikun aħjar li jbigħuh minflok jitilfuh b’xejn. Roma qed jitolbu somma ta’ madwar 50 miljun, filwaqt li Juventus x’aktarx ma jridux jaqbżu l-40 miljun. Fil-ftehim Juventus jixtiequ li jkun hemm parti li tiħallas cash u parti oħra li tkun koperat bi bdil ta’ plejers. F’dal-każ qed jissemma ħafna Arthur.
Matthew Scerri
Chelsea jinsistu b’saħħa għal De Ligt
Sorsi qrib il-klabb Juventin qed jikkonfermaw li bejn illum u għada Chelsea għandhom jiltaqgħu ma’ Juventus. Il-partijiet se jiddiskutu diversi plejers. Ovvjament l-‘piatto forte’ ma jistax jonqos li jkun De Ligt. Chelsea jriduh b’saħħa, għalkemm nafu li hemm interess min-naħa tagħhom anki f’Skriniar. Ir-rieda ta’ Juventus hi li jilħqu ftehim ma’ De Ligt biex jiffirma kuntratt ġdid għax iriduh ikun il-kolonna tad-difiża tagħhom u fl-istess ħin ma jridux jirriskjaw li jitilfu b’xejn sentejn oħra meta jintemmlu l-kuntratt attwali. Bħas-soltu se tkun ir-rieda tal-plejer li se tiddetermina l-futur tiegħu. De Ligt dan l-aħħar donnu bidel fehemtu u m’għadux daqshekk konvint li jibqa’ ma’ Juventus kif kien qed jistqarr sa ftit tal-ġimgħat ilu. Interessanti li dil-bidla min-naħa ta’ De Ligt waslet eżatt malli l-klabb ta’ Chelsea bidel is-sid tiegħu. Jekk hu se jkun irid jitlaq, Juventus mhux se jġegħluh jibqa’ għalkemm se jkunu qed jinsistu li titħallas il-penali ta’ 120 miljun Ewro biex hu jinħall mill-kuntratt. Probabbli, però, li jekk Chelsea joffru somma bejn 80 u 100 miljun, Juventus xorta waħda jkunu se jaċċettaw għax wara dis-sena l-prezz tiegħu jitbaxxa u jkun hemm riskju tassew kbir li jitlaq b’xejn żewġt isjuf oħra.
Matthew Scerri
Di Maria-Juventus. Qed jitlesta l-kuntratt
It-telenovela ta’ Angel Di Maria tidher li riesqa lejn it-tmiem tagħha hekk kif ilna mill-Ħadd filgħaxija nisimgħu li l-Arġentin finalment qal ‘iva’ lil Juventus. L-għażla min-naħa ta’ Di Maria saret u issa l-aġenti tiegħu jinsabu f’taħdidiet ma’ Juventus sabiex ilestu l-parti burokratika tat-trasferiment, jiġifieri jħejju l-kuntratt li Di Maria se jiffirma. Nafu li l-burokrazija jaf tieħu ż-żmien u allura hu probabbli li Di Maria, l-istess bħal Pogba, jitħabbar minn Juventus fl-ewwel ġimgħa sħiħa ta’ Lulju, dik li tibda mill-4 ta’ Lulju.
Matthew Scerri
L-ewwel paġni tal-gazzetti Taljani (28 ta’ Ġunju 2022)
Qed inwasslulkom l-ewwel paġni tal-gazzetti Taljani tal-isports tal-lum it-28 ta’ Ġunju 2022
L-ewwel paġni tal-gazzetti Taljani (27 ta’ Ġunju 2022)
Qed inwasslulkom l-ewwel paġni tal-gazzetti Taljani tal-isports tal-lum is-27 ta’ Ġunju 2022
L-aħbarijiet mis-suq tat-trasferimenti (26 ta’ Ġunju)
Is-sajf hu żmien il-calciomercato u huma tassew bosta l-aħbarijiet marbutin mas-suq tat-trasferimenti Juventin bħalissa. Fi ħdan it-tim Juventin mistennija jkun hemm bidliet kbar u għaldaqstant ma jistax jonoqs li l-aħbarijiet huma tassew numerużi.
De Ligt
Fl-aħħar jiem kien hemm bosta għidut li Chelsea lesti jagħmlu minn kollox biex jixtru lil De Ligt mingħand Juventus. Allegatament l-ewwel offerta tagħhom kienet ta’ 40 miljun Ewro flimkien mat-trasferiment ta’ Werner ma’ Juventus. Id-diriġenza Bianconera lesta tisma’ biss offerti cash għal De Ligt mingħajr bdil ta’ plejers. F’każ li jitlaq De Ligt, is-sostitut tiegħu ma’ Juventus x’aktarx ikun wieħed bejn Koulibaly (Napoli), Gabriel (Arsenal), Igor jew Milenkovic (Fiorentina).
Zaniolo
Qed jingħad li Nicolò Zaniolo għarraf lil Roma li mhuwiex intenzjonati jiffirma kuntratt ġdid magħhom. Fl-istess ħin hu ma jridx imur jilgħab barra mill-Italja. Juventus u Milan huma l-klabbs li jriduh fl-Italja. Il-Bianconeri qed joffru lil Roma tpartit ma’ Arthur (flimkien ma’ somma flus) jew inkella b’self għal sena mħallas 10 miljuni bl-obbligu li jixtruh għal kollox is-sena d-dieħla.
Pellegrini
Plejer li kważi ċertament se jitlaq lil Juventus das-sajf hu Luca Pellegrini. West Ham u Fulham avviċinaw lil Juventus u wrew interess li jixtruh. Fl-Italja hemm Monza li jriduh.
Kostic
Ilna ħafna nisimgħu li Juventus għandhom f’idejhom lil Filip Kostic. Allegatament hemm qbil bejn il-partijiet kollha konċernati biex Kostic jingħaqad ma’ Juventus għal 15-il miljun Ewro. Il-plejer mistenni jiffirma kuntratt ta’ tliet snin, bil-possibbiltà ta’ sena oħra kuntratt ukoll, b’paga ta’ 2.5 miljun Ewro. L-aħbar għadha mhix uffiċjali.
Mandragora
Ftehim ieħor li qed jingħata bħala wieħed maqbul u definittiv hu dak bejn Juventus u Fiorentina għal Mandragora. It-tim ta’ Comisso se jkun qed iħallas ftit inqas minn 10 miljuni biex jikseb is-servizzi ta’ Mandragora.
Ramsey
Suleyman Hurman, li hu l-President ta’ KAragumruk, ikkonferma li t-tim tiegħu kien jinsab f’negozjati ma’ Ramsey, biss wara numru ta’ laqgħat it-tim Tork qata’ qalbu li jista’ jilħaq ftehim mal-midfielder minn Wales.
Cambiaso
Jidhru li jinsabu fi stadju avvanzat ferm it-taħdidiet bejn Jvuentus u Genoa għal Andrea Cambiaso. Juventus lesti jixtruh għal madwar 10 miljuni, biss ma jridux li jħallsu s-somma kollha cash. Huma qed jipproponu lil Genoa li jieħdu lil Dragusin fil-ftehim u milli jidher Genoa huma interessati.
Matthew Scerri