Immur lura għas-sena 2011 meta fil-preseason ta’ dik is-sena Juventus kienu lagħbu partita ta’ ħbiberija kontra Cuneo bi preparazzjoni għall-istaġun 2011/12. It-tim Juventin kien rebaħ bl-iskor ta’ 8-0. Fost l-oħrajn kien spikka Luca Toni li skurja tripletta.
L-għidut dwar it-tim Juventin mhu jaqta’ xejn hekk kif is-suq tat-trasferimenti riesaq bil-mod il-mod lejn tmiemu. Fadal bejn wieħed u ieħor tliet ġimgħat u nofs, u jekk s’issa n-negozjati mxew b’pass kajman, issa t-timijiet iridu jibdew jiffinalizzaw l-akkwisti tagħhom. Juventus huma attivi ferm kemm mil-lat ta’ bejgħ ta’ plejers, kif ukoll f’dak li għandu x’jaqsam max-xiri ta’ plejers ġodda.
Il-plejers li probabbli jitilqu lil Juventus huma Rugani u Arthur. It-tnejn li huma għandhom paga għolja u Juventus lesti jneħħuhom peress li huma meqjusa biss bħala riservi ma’ Juventus. Arthur jinsab qrib ħafna li jingħaqad ma’ Valencia b’self. Rugani, mill-banda l-oħra, x’aktarx ikun mibjugħ. Galatasaray qed joffru 10 miljuni għalih, somma li Juventus lesti jaċċettaw. Rugani jinsab anki fil-mira ta’ klabbs Taljani bħal Empoli u Sampodoria, biss dawn mhumiex joffru daqs Galatasaray.
F’dak li għandu x’jaqsam mal-akkwist, Juventus nafu li qed ifittxu playmaker, plejer max-xellug u attakkant. Nafu li hemm ftehim kemm ma’ Kostic kif ukoll ma’ Paredes, bil-plejers diġà aċċettaw l-offerta mressqa lilhom minn Juventus. Jonqos issa li Juventus jilħqu ftehim mal-klabb rispettiv tagħhom. Dwar l-attakkant hemm ħafna iktar inċertezza. Issemmew diversi plejers, b’Morata dejjem ikun indikat bħala l-favorit nett, għalkemm fil-verità Atletico ma tantx jidhru disposti jitilquh minn idejhom. Attakkanti oħra li qed jissemmew bħalissa huma: Muriel u Raspadori. Fl-aħħar tajjeb ngħidu li jekk verament jitlaq Rugani, hu probabbli li Juventus jixtru difensur ieħor, b’Milinkovic ta’ Fiorentina jkun il-kandidat prinċipali.
Matthew Scerri
F’Villa Perosa tiġġedded kull sena tradizzjoni li timmarka parti sostanzjali mid-dna Juventin. Qatt ma kienet sempliċi partita ta’ ħbiberija. Fl-antik din kienet tkun l-ewwel ħarġa tal-istaġun. Illum m’għadux hekk u f’din dejjem iktar iddominata mill-flus, f’Villa Perosa xorta, waħda għadna nduqu togħma ta’ futbol iktar ġenwin u pur kif kien fil-passat sa mill-oriġini stess tal-logħba. Fil-partita tal-lum laqatna ritratt li jfisser ħafna. Fir-ritratt naraw lil Bonucci jgħannaq lil Beppe Furino li wara l-problemi ta’ saħħa li kellu jinsab issa fuq siġġu tar-roti. Bonucci tah il-flokk tiegħu, ġest mill-aktar sabiħ. F’dik it-tgħanniqa hemm żewġ captains li taw ħafna lil Juventus. Furino apparti li lagħab għal snin twal ma’ Juventus, wara li rtira kien anki maħtur biex imexxi l-Youths ta’ Juventus bħala manager tas-‘settore giovanile’. Villar Perosa, Furino jafha sew. Li llum kien hemm minkejja l-problemi ta’ saħħa li kellu u li għandu, jixhed kemm verament Furino għandu għal qalbu lil Juventus. U f’dik it-tgħanniqa ta’ Bonucci hemm xi ftit jew wisq l-imħabba u r-rikonoxximent tal-poplu Juventin għal dak kollu li għamel Furino għal Juventus.
Matthew Scerri
Juventus se jmorru b’saħħa għal Filip Kostic biex isaħħu n-nofs il-grawnd tagħhom u fuq kollox il-linja x-xellugija tat-tim. Qed ikun irrapurtat li fil-laqgħa tal-lbieraħ, Allegri qabel li jinxtara Kostic u allura d-diriġenti Bianconeri bdew mill-ewwel jaħdmu sabiex jinstab ftehim għall-akkwist tal-plejer Serb mingħand Eintracht Frankfurt. Il-klabb Ġermaniż għandu offerta ta’ madwar 14-il miljun Ewro mingħand West Ham. Juventus, mill-banda tagħhom, s’issa offrew 10 miljun flimkien ma’ bonuses. Hu ovvju li Juventus se jkollhom jgħollu xi ftit l-offerta tagħhom sabiex jiksbu l-ok mingħand Eintracht. Il-ftehim mal-plejer ilu li nstab min-naħa ta’ Juventus, ferm qabel West Ham bdew jinnegozjawh.
Matthew Scerri
Filip Kostic għadu qed jistenna lil Juventus. In-negozjati għall-akkwist tiegħu min-naħa ta’ West Ham jinsabu fi stadju avanzat, anzi skont diversi sorsi jonqos biss li Kostic jiffirma l-kuntratt. Madankollu l-plejer jidher li talab ftit taż-żmien biex jaħsibha sew. Din x’aktarx hi mossa għax Kostic jaf li fl-aħħar jumejn Juventus reġgħu għamlu kuntatt mal-aġent tiegħu. Juventus dejjem kienu l-ewwel preferenza ta’ Kostic u issa jidher li l-Bianconeri jinsabu deċiżi li jiftħu negozjati ma’ Eintracht biex jiksbu s-servizzi tiegħu. Is-sensazzjoni hi li dil-ġimgħa se nkunu nafu jekk Kostic huwiex se jilbes il-flokk ta’ West Ham jew inkella ta’ Juventus.
Matthew Scerri
Bħal-lum fl-2003 Juventus kienu lagħbu kontra Milan fil-Finali tas-Super Cup tal-Italja. Il-partita kienet intlagħbet fl-Istati Uniti tal-Amerika u ġiet deċiża bl-għoti tal-penalties. Il-filmat t’hawn taħt ifakkarna x’ġara dakinhar.
Qed ikun irrapurtat minn sorsi differenti li llum Massimiliano Allegri se jkun qed jiltaqa’ mad-diriġenza Bianconera sabiex flimkien jiflu u jiddiskutu l-istrateġiji għal dan l-aħħar xahar tas-suq tat-trasferimenti. Nafu li hemm xi plejers li jistgħu jitilqu lil Juventus (Rugani, Arthur) u allura jrid ikun deċiż min ġej minflokhom. Hemm anki l-injuries ta’ Pogba u McKennie li Juventus iridu janalizzaw għax, għalkemm mhumiex fit-tul daqskemm maħsub, xorta waħda jaf jirrikjedu li jinbidlu l-pjanijiet tal-klabb (bħal pereżempjun jinżamm xi ħaddieħor miż-żgħar minflok jiġi misluf). Fuq l-agenda hemm anki d-deċiżjoni dwar jekk Rovella, Fagioli u Miretti għandhomx jinżammu jew le. Finalment, se jkun diskuss ukoll liema huma l-akkwisti li għandhom isiru sabiex it-tim ikun verament komplut u kompetittiv. F’das-sens l-għidut tal-aħħar jiem kien li Juventus qed ifittxu playmaker (Paredes), plejer mal-linja x-xellugija (Kostic) u attakkant (Raspadori, Muriel, Mertens).
Matthew Scerri
