L-aħbar hi issa waħda uffiċjali: Juan Cuadrado mhux se jkun qed jilgħab iktar għal Juventus. Il-kuntratt tiegħu mhux se jkun imġedded. Cuadrado lagħab komplessivament 314-il partita bil-flokk ta’ Juventus tul dawn l-aħħar tmien staġuni u rebaħ 11-il trofew mal-Bianconeri.
Matthew Scerri
Wara tmien staġuni Juan Cuadrado se jkun qed jitlaq lil Juventus das-sajf. L-għażla mhux ċert min ħadha. Hemm sorsi li qed isostnu li Juventus iddeċidew li ma jġeddulux il-kuntratt, filwaqt li sorsi oħra qed jirrapurtaw li kien il-Kolombjan li għażla bidla fil-karriera. Il-futur tiegħu issa jista’ jkun fi Spanja ma’ Valencia jew fit-Turkija ma’ Fenerbahce. Cuadrado libes il-flokk ta’ Juventus għal 314 darba u kien pilastru tal-Juventus rebbieħa tal-era Agnelli.
Matthew Scerri
Apparti l-ħidma ta’ Manna biex il-plejers li ġewwa lura mis-self ma’ timijiet oħra, Juventus bħalissa qed jistennew xi risposti mingħand plejers li l-kuntratt tagħhom wasal fi tmiemu. Rabiot, Cuadrado u Milik jinsabu fil-pjanijiet ta’ Juventus, imma l-futur tagħhom ma jiddipendix biss minn Juventus. Il-kuntratti ta’ Rabiot u Cuadrado se jiskadu fl-aħħar ta’ dan ix-xahar. Juventus offrewlhom kuntratt ġdid ta’ sena kull wieħed u issa qed jistennew risposta mingħandhom. It-tnejn li huma għandhom offerti minn klabbs oħra u għaldaqstant mhuwiex mija fil-mija ċert li se jaċċettaw dak li qed joffrulhom Juventus. Milik, mill-banda l-oħra, mar lura ma’ O. Marseille wara li ntemm is-self tiegħu ta’ sena. Milik diġà stqarr pubblikament li jixtieq jibqa’ ma’ Juventus, biss issa rridu naraw x’se tkun id-deċiżjoni tal-klabb Franċiż. O. Marseille ma jridux jisilfuh lil Juventus għal sena oħra u allura Manna offrilhom li Juventus jixtruh għal kollox f’kundizzjonijiet differenti minn dawk maqbula sena ilu.
Ftit tal-jiem oħra u nkunu nafu jekk Rabiot, Cuadrado u Milik humiex se jibqgħu jilbsu l-flokk ta’ Juventus.
Matthew Scerri
Juan Cuadrado lagħab il-partita numru 300 fil-karriera tiegħu il-flokk ta’ Juventus fil-kompetizzjonijiet kollha. Kif inhi l-prassi, il-flokk tiegħu se jkun issa espost b’mod definittiv fil-JMuseum. F’messaġġ fuq is-social media, Cuadrado stqarr li l-futbol hu don li tah Alla u li hu jħobb juża biex bih jonora lil Alla. Barra minn hekk, it-tliet mitt partita il-flokk ta’ Juventus huma għalih “ħolma li saret realta’, il-ħolma li nkun Juventin”.
Matthew Scerri
Alex Sandro, Rabiot u Locatelli se jkunu qed jirritornaw għall-azzjoni fi tmiem il-ġimgħa wara li rkupraw mill-injuries tagħhom. It-Tlieta li huma se jkunu jistgħu jilaghbu kontra Bologna. Allegri se jkollu lura wkoll lil Cuadrado u Milik li tilfu l-aħħar partita kontra Monza peress li kienu sospiżi.
Matthew Scerri
It-tmiem konfuż u drammatiku (fuq klix inġust imma) ta’ Juventus-Salernitana, sewa qares lil Juventus. Allegri, Cuadrado u Milik ġew sospiż għal partita waħda wara li tkeċċew b’rabta ma’ dak kollu li nqala’ fl-aħħar minuti tal-partita kontra Salernitana. Allegri se jkollu jħallas ukoll multa ta’ 15-il elf Ewro, filwaqt li Juventus weħlu multa ta’ 5,000 Ewro peress li uffiċċjal tagħha offenda lir-referee fit-tunnel huma u deħlin lejn id-dressing rooms.
Matthew Scerri
Aħbarijiet tajba mill-Continassa hekk kif illum Cuadrado qatta’ s-sessjoni ta’ taħriġ mal-kumplament tat-tim. Hu rkupra mill-virus tal-istonku li kien qed iħabbtu fl-aħħar jiem.
McKennie, mill-banda l-oħra, ittrenja biss għal parti mill-ħin ma’ sħabu. Hu għadu qed jirkupra mill-injury fi spalltu u min jaf jirnexxilux ikun għad-dispożizzjoni ta’ Allegri nhar it-Tnejn għall-partita kontra Sassuolo.
Matthew Scerri
Direttament mis-sit tal-Juventus Store, saret magħrufa bidla fin-numri tal-flokkijiet ta’ Federico Chiesa u Dusan Vlahovic. L-attakkant Serb se jkun qed jilbes il-flokk numru 9, filwaqt li Chiesa se jkollu n-numru 7. Fil-ġimgħat li għaddew kien hemm ħafna xnigħat li Chiesa se jkun qed jingħata l-flokk numru 10 wara t-tluq ta’ Dybala, b’Cuadrado jieħu lura n-numru 7. Madankollu dan ma seħħx. Kollox jindika, issa, li n-numru 10 ta’ Juventus se jkun qed jinġarr mill-ġdid minn Paul Pogba.
Matthew Scerri