Bidla oħra fil-programm. Juve-Atletico se tintlagħab f’Turin
Juventus ħabbru b’mod uffiċjali li nstab ftehim sabiex il-partita ta’ ħbiberija kontra Atletico ssir xorta waħda għada. Mhux se tintlagħab f’Tel Aviv imma fit-training grounds tal-Continassa. Inbidel anki l-ħin li issa hu fis-6.00 ta’ filgħaxija.
Matthew Scerri
Fagioli mistenni jibqa’ ma’ Juventus
Kollox jindika li Fagioli se jibqa’ ma’ Juventus għal dan l-istaġun. Hu impressjoni lil Allegri li jridu fit-tim Juventin. Dil-ġimgħa Fagioli mistenni wkoll jiffirma kuntratt ġdid ma’ Juventus. Fagioli ġej minn sena tajba ferm ma’ Cremonese u jidher lest biex jagħti sehmu fit-tim Juventin.
Matthew Scerri
Tħassret Juventus-Atletico Madrid
Il-partita ta’ ħbiberija bejn Juventus u Atletico Madrid tħassret minħabba ġlied li nqala’ fl-iStrixxa ta’ Gaza. Din kellha tkun l-aħħar partita ta’ ħbiberija qabel jibda l-kampjonat u kellha tintlagħab f’Iżrael, biss kif għidna l-inkwiet li hemm fil-pajjiż ma jagħmilhiex possibbli li l-partita tintlagħab.
Matthew Scerri
L-aġent: “Arthur irid jitlaq lil Juventus”
Federico Pastorello, li hu l-aġent ta’ Arthur, ikkonferma li hemm interess min-naħa ta’ Valencia fil-midfielder Brażiljan. Hu qal li jittama li jinstab ftehim għax Arthur irid jitlaq lil Juventus. Skont Pastorello, Arthur hu plejer tajjeb wisq biex joqgħod jara lill-oħrajn jilagħbu.
Matthew Scerri
Bħal-lum fil-passat (5 ta’ Awwissu)
Immur lura għas-sena 2011 meta fil-preseason ta’ dik is-sena Juventus kienu lagħbu partita ta’ ħbiberija kontra Cuneo bi preparazzjoni għall-istaġun 2011/12. It-tim Juventin kien rebaħ bl-iskor ta’ 8-0. Fost l-oħrajn kien spikka Luca Toni li skurja tripletta.
X’qed jingħad dwar is-suq tat-trasferimenti Juventin
L-għidut dwar it-tim Juventin mhu jaqta’ xejn hekk kif is-suq tat-trasferimenti riesaq bil-mod il-mod lejn tmiemu. Fadal bejn wieħed u ieħor tliet ġimgħat u nofs, u jekk s’issa n-negozjati mxew b’pass kajman, issa t-timijiet iridu jibdew jiffinalizzaw l-akkwisti tagħhom. Juventus huma attivi ferm kemm mil-lat ta’ bejgħ ta’ plejers, kif ukoll f’dak li għandu x’jaqsam max-xiri ta’ plejers ġodda.
Il-plejers li probabbli jitilqu lil Juventus huma Rugani u Arthur. It-tnejn li huma għandhom paga għolja u Juventus lesti jneħħuhom peress li huma meqjusa biss bħala riservi ma’ Juventus. Arthur jinsab qrib ħafna li jingħaqad ma’ Valencia b’self. Rugani, mill-banda l-oħra, x’aktarx ikun mibjugħ. Galatasaray qed joffru 10 miljuni għalih, somma li Juventus lesti jaċċettaw. Rugani jinsab anki fil-mira ta’ klabbs Taljani bħal Empoli u Sampodoria, biss dawn mhumiex joffru daqs Galatasaray.
F’dak li għandu x’jaqsam mal-akkwist, Juventus nafu li qed ifittxu playmaker, plejer max-xellug u attakkant. Nafu li hemm ftehim kemm ma’ Kostic kif ukoll ma’ Paredes, bil-plejers diġà aċċettaw l-offerta mressqa lilhom minn Juventus. Jonqos issa li Juventus jilħqu ftehim mal-klabb rispettiv tagħhom. Dwar l-attakkant hemm ħafna iktar inċertezza. Issemmew diversi plejers, b’Morata dejjem ikun indikat bħala l-favorit nett, għalkemm fil-verità Atletico ma tantx jidhru disposti jitilquh minn idejhom. Attakkanti oħra li qed jissemmew bħalissa huma: Muriel u Raspadori. Fl-aħħar tajjeb ngħidu li jekk verament jitlaq Rugani, hu probabbli li Juventus jixtru difensur ieħor, b’Milinkovic ta’ Fiorentina jkun il-kandidat prinċipali.
Matthew Scerri
Mument emozzjonanti f’Villar Perosa
F’Villa Perosa tiġġedded kull sena tradizzjoni li timmarka parti sostanzjali mid-dna Juventin. Qatt ma kienet sempliċi partita ta’ ħbiberija. Fl-antik din kienet tkun l-ewwel ħarġa tal-istaġun. Illum m’għadux hekk u f’din dejjem iktar iddominata mill-flus, f’Villa Perosa xorta, waħda għadna nduqu togħma ta’ futbol iktar ġenwin u pur kif kien fil-passat sa mill-oriġini stess tal-logħba. Fil-partita tal-lum laqatna ritratt li jfisser ħafna. Fir-ritratt naraw lil Bonucci jgħannaq lil Beppe Furino li wara l-problemi ta’ saħħa li kellu jinsab issa fuq siġġu tar-roti. Bonucci tah il-flokk tiegħu, ġest mill-aktar sabiħ. F’dik it-tgħanniqa hemm żewġ captains li taw ħafna lil Juventus. Furino apparti li lagħab għal snin twal ma’ Juventus, wara li rtira kien anki maħtur biex imexxi l-Youths ta’ Juventus bħala manager tas-‘settore giovanile’. Villar Perosa, Furino jafha sew. Li llum kien hemm minkejja l-problemi ta’ saħħa li kellu u li għandu, jixhed kemm verament Furino għandu għal qalbu lil Juventus. U f’dik it-tgħanniqa ta’ Bonucci hemm xi ftit jew wisq l-imħabba u r-rikonoxximent tal-poplu Juventin għal dak kollu li għamel Furino għal Juventus.
Matthew Scerri