Riflessjonijiet wara loghba Malmoe-Juventus 0-3 – 14.09.2021
Il-bieraħ fl-aħħar, irnexxilna nassistu għall-ewwel rebħa tall-istaġun tagħna il-Juventini. Rebħa konvinċenti ħafna bħala score u kwalita’ ta’ logħob li wera it-tim. Żgur li ma nistawx ma nirrimarkawx anki il-fatt posittiv li għalaqna il-logħba b’ 0 goals kontra tagħna – fattur li kienet jinkweta lili kif ukoll ħbieb tiegħi waqt diskussjonijiet frekwenti magħhom. L-iktar li żgur se jieħu gost biha il-clean sheet huwa il-kowċ Massimiliano Allegri għax forsi jibda jara il-goalkeeper tagħna Wojciech Szczęsny jaħdem b’iktar serenita’ fil-logħbiet li ġejjin. Żgur ma ħarbitlix il-wirja posittiva kemm ta’ Bonucci li qed nerġaw napprezzaw id-doni ta’ regista minn wara tiegħu, kif ukoll nirrimarka l-ispirtu kombattiv aħjar f’Alex Sandro li kien importanti ħafna għalina għax sblokka l-iskor tal-logħba w anki reġa kien perikoluż u għal ftit ma reġax sab ix-xibka ftit wara l-ewwel goal!
In-nofs il-ground il-bieraħ rajtu jiffunzjona tajjeb forsi mhux perfettament imma għamel qabża fil-kwalita’ mill-partiti li rajna qabel. Locatelli, b’mod speċjali, wieħed jammira it-talent li għandu li iżomm il-pussess tal-ballun kemm hu meħtieg biss u dejjem jara kif se isib il-player żmarkat il-quddiem biex nivvertikalizzaw il-logħob – ħaga li rajtha ferm nieqsa fl-istaġuni ta’ qabel. Meta anki qsamt xi ħsibijiet ma’ Juventini oħra – laqatni il-punt ferm validu li kulħadd qed jinnota li anki bil-preżenza ta’ Locatelli – it-tqassim lura qed jonqos u dan mhux fattur ta’ min jinjorah meta naf kemm batejna goals stupidi kontra minħabba tqassim taħt pressjoni mill-avversarji lura lejn id-difiża jew saħansitra tqassim lura lejn il-goalkeeper. Kulħadd jaf kemm b’tqassima lura l-istaġun li għadda ikkompromettejna kwalifikazzjoni għal-round li imiss fic-Champions League kontra il-Porto!
Fl-aħħar nett nixtieq nitkellem ftit dwar l-attakk tagħna iffurmat minn Paulo Dybala u Alvaro Morata. Rajna ftit kombinazzjonijiet tajbin anki ta’ tqassim u tentattivi kontinwi li jifthu l-ispazji għal xulxin li tipprospetta tajjeb għal-logħob li ġej. Wieħed ma jistax ma isemmix li Morata reġa sab ix-xibka għat-tieni logħba konsekuttiva u anki dak aspett posittiv. Rajna wkoll, ir-ritorn għal-goal għalkemm minn penalty ta’ Paulo Dybala, wara li rajnih diġa jiskurja gowl stupend kontra Udinese u ħadd ma jista jinsa t-takkuna li biha qassam lejn Morata fil-bidu ta’ 2 taqsima. Dybala ukoll ingħata il-Player of the Match jiġifieri tfisser li l-wirja tiegħu kienet ferm posittiva. Ħafna aspetti posittivi! Għalkemm naf ukoll li l-avversarju kien modest, imma infakkar li qatt mhu easy tirbaħ away kontra tim inqas kwotat fiċ-Champions League fejn rajna il-bieraħ stess li xejn ma tista tieħu for granted bir-rebħa kemmxejn sorprendenti ta’ Young Boys kontra tim b’storja ferm ikbar bħal-Manchester United. Nittama li dir-rebħa isservi biex jogħla iktar il-moral in vista għal-logħba vera importanti tal-Ħadd li ġej kontra il-Milan.
Insellmilkom ħbieb Juventini! Alla prossima!
Memorji Bojod u Suwed: L-ewwel darba ta’ Juventus hawn f’Malta
Forsi huma ħafna minnkom (naqra imdaħħlin fiż-żmien illum il-ġurnata) għandhom f’qalbhom din id-data partikolari : 15 ta’ Settembru 1971.
Fil-grawnd (illum abbandunat u minsi) tal-Gżira kellna l-ewwel partita tal-Juventus hawn Malta! Marsa kienu t-tim li kellhom dan l-unur, għall-ewwel rawnd tat-Tazza UEFA 1971/72
Kienet ġurnata sħuna u umduża ħafna. Biex tkompli żżid l-logħba kellha tibda fil-5.00pm minħabba li l-grawnd ma kienx illuminat b’dawl artifiċjali. Nimmaġinaw il-plejers juventin (kollha ta’kalibru internazzjonali u klassi liema bħalha) jidħlu ġo dan il-grawnd iva ippakkjat bin-nies imma b’ turf kollu żrar ,sħana insopportabbli u avversarju totalment mhux magħruf.
Mela taħt l-ordni tar-referee Skoċċiż Paterson il-Juventus immexxijin minn Cestmir Vycpalek (iz-ziju tal-famuż Zdenek Zeman) għamel id-debutt ġo din il-gżira hekk juventina! Din kienet il-formazzjoni :
Carmignani, Spinosi, Marchetti, Furino, Roveta, Salvadore, Haller, Causio, Novellini, Capello u Bettega. Il-kowċ ta’ Marsa, Calleja niżel fil-grawnd hekk : Collings, Tonna, Cassar, Ferrigi,Vella. Cassar II, Farrugia, Brincat, Portelli, Faure u Camilleri.
L-ewwel taqsima ingħalqet bil-Juventus minn fuq 1-0 biss. Kien il-midfielder Ġermaniż espert u fantażjuż Helmut Haller li għeleb lill-gowler Malti Collings b’xutt angulat u baxx.
Fil-bidu tat-tieni taqsima kienu Marsa li setaw ġabu il-gowl tad-draw b’xutt ta’Farrugia, mgħejjun minn Portelli li ġegħel lil gowler juventin Pietro Carmignani għall-laqgħa minn tiegħu. Sadanittant il-Marsa kellhom jibdlu l-kulur tal-flokk tagħhom minn blu ta’l-ewwel taqsima għall-aħmar tat-tieni 45 minuta.
Dlonk il-ferħ u l-ħolm Malti sfaxxa, għax ħarġet il-qawwa, l-esperjenza u l-ħażen tattiku tal-Juventus li bdew jiskurjaw gowl wara l-ieħor. Beda Franco Causio wara żball mid-difiża maltija. Żid it-tielet Haller b’xutt mill-ewwel fis-sittin minuta. Tlett minuti biss wara Novellini wara kontrattakk veloċi għamel l-iskor 4-0. Fabio Capello sebbaħ l-iskor għal 5-0 wara ħarġa ħażina tal-gowler Malti Collins, filwaqt li Antonello Cuccureddu ġab l-iskor finali ta’ 6-0 b’xutt imxellef minn difensur malti.
Fuq in-naħa ta’Marsa nsemmu il-lasta milqutgħa minn Portelli b’xutt sabiħ imma żventurat minn barra.
Hekk intemmet l-logħba! 6-0. Wara t-tisfira finali Helmut Haller kien stqarr li diffiċli tmur barra minn pajjiżek u taqla’ dak it-tifħir u kapċiċ kollu. Il-kowċ malti Calleja sostna li dan it-tim tal-Juventus kien l-aħjar wieħed li rifes art twelidna sa dak iż-żmenijiet. Ferm aħjar minn Real Madrid u Manchester United.
Fit-tieni leg ġo Turin il-Juventus komplew minn fejn ħallew hawn Malta b’rebħa komda ta’ 6-0.
Gowls : 32’ Haller ; 54’ Causio ; 60’ Haller ; 63’ Novellini ; 69’ Capello ; 88’ Cuccureddu (J)
Marsa: Collins, Tonna, Victor Cassar; Ferriggi (67’ Landridge), Wella, Joe Cassar; Faruglia, Brincat, Portelli (82’ Baiada); Faure, Camilleri – Kowċ : Calleja
Juventus: Carmignani, Spinosi, Marchetti; Furino (46’ Cuccureddu), Roveta, Salvadore; Haller (65’ Viola), Causio, Novellini; Capello, Bettega – Kowċ : Vycpalek
Referee : Paterson (Skozja)
Pierre Bonavia
Ftit kurżitajiet qabel il-logħba Malmoe vs Juventus
Illum se tibda l-avventura tat-tim tagħna fiċ-Champions League 2021-22 kontra it-tim svediż ta’ Malmoe. Dan it-tim bħalissa qed jokkupa it-tielet pożizzjoni fil-league ta’ pajjiżu b’34 punti b’ distakk zgħir ta’ punti mill-quċċata tal-klassifika. Lagħbu sa issa 18 il-logħba fil-kampjonat minħabba li fl-Isvezja il-league jispiċċa f’Diċembru. Ma’ diffikultajiet oħra ghat-tim tagħna bħalissa fejn il-moral tal-iskwadra tagħna ma’ jistax ma jkunx baxx wara bidu ferm iebes fil-kampjonat b’punt biss miġbur minn 3 partiti, hemm din l-insidja li se nilgħabu ma’ tim li fiżikament iktar ippreparat minn tagħna. Inżid ukoll li bi tradizzjoni, timijiet Svediżi huma diffiċċli taffrontahom għax kapaċi mill-bidu tal-logħba jitfawlek il-logħba fuq aspett fiżiku biex jagħmlu tajjeb għad-differenza teknika meta jilgħabu ma’ timijiet iktar kwotati teknikament bħal ma hu it-tim Juventin. Hemm fattur li jista’ anke jirrendi il-logħba tal-llum ftit diffiċli – bħala kowċ għandhom lil Tomasson li jaf sew il-logħba tagħna minħabba li lagħab mal-Milan fil-passat kif ukoll dan it-tim Svediż għandhom mix ta’ plejers zgħar u strutturati fiżikament. Fost plejers li smajt u qrajt ftit fuqhom illum ghandhom l-attakkant Kroat Antonio Colak – statura fiżika imponenti u li skurja 5 mit-13 il-goal li skurjaw Malmoe fir-rounds ta’ kwalifikazzjoni taċ-Champions League 2021-22.
Wara daqsxejn introduzzjoni tal-avversarju, ngħaddi fuq l-aspett li jinteressa lili u bosta partitarji Juventini f’din il-paġna. Il-bieraħ qrajna li d-diriġenti Nedved, Arrivabene u Cherubini marru jaraw is-sessjoni ta’ taħriġ tal-iskwadra bi preparazzjoni propju għall-partita tal-llum. Il-prospett hu li naraw Juventus b’formazzjoni ta’ 4-4-2 fejn hemm mistenni li jerġa jigi kkonfermat bħala goaler Szczesny, jerġgħu jirritornaw Alex Sandro, Danilo u De Ligt fid-difiża u b’nofs il-ground b’ritorn ta’ Bentancur u Cuadrado. Fl-attakk mistenni jerġa lura Dybala flimkien mal-konferma ta’ Morata. Bir-ritorn tal-plejers bħal Cuadrado, De Ligt u Dybala b’mod ewlieni huwa previst li xi tip ta’ titjib fil-fażi ta’ attakk għandna naraw, meta nqabblu mal-ewwel ħdax li bdew kontra Napoli. Wieħed jawgura li titjieb il-kondizzjoni fiżika ġenerali tat-tim tul id-90 minuta kif ukoll naraw logħob iktar proposittiv u vertikali lejn il-lasta avversarja. Żgur li bħall-lejla kien ikun utli ħafna Federico Chiesa, li bil-ħarbiet ta’ potenza fuq il-linji kien jaf joħloq iktar problemi lill-avversarji, biss jekk hu aħjar inħalluh jirkupra fiżikament tajjeb mill-injury ikun aħjar meta tikkunsidra kemm fadal impenji waqt l-istaġun.
Filwaqt li nsellmilkom nawgura bis-sħiħ li naraw l-ewwel rebħa tal-istaġun u nemmen li jekk tiġi llejla minħabba li tkun fl-iktar kompetizzjoni mportanti, taf taghti spinta ta’ moral ferm bżonnjuża anki in vista tal-logħba kbira tal-Ħadd kontra Milan.
FORZA RAGAZZI
Massimo
L-ewwel paġni tal-gazzetti Taljani (14 ta’ Settembru 2021)
Qed inwasslulkom l-ewwel paġni tal-gazzetti Taljani tal-isports tal-lum l-14 ta’ Settembru 2021.
L-ewwel paġni tal-gazzetti Taljani (12 ta’ Settembru 2021)
Qed inwasslulkom l-ewwel paġni tal-gazzetti Taljani tal-isports tal-lum it-12 ta’ Settembru 2021.
