Il-fatti ta’ dawn l-aħħar żminijiet qed iħalluni ftit skonċertat. Ħa nispjega ruħi aħjar fuq ċerti punti li qed iħasbuni u jinkwetawni ftit. Se nibda billi nitkellem fuq dan it-trasferiment li deher ħabta u sabta ta’ Ronaldo imma fl-opinjoni tiegħi ilu jberren bosta żmien. U jekk dak li qed naħseb jikkorrispondi għal kif ġew l-affarijiet realment, din turi li kien hemm nuqqas kbir ta’ programmazzjoni tad-diriġenza biex tagħmel tajjeb jekk Ronaldo (kif ghamel fil-verita’) jiddeċiedi li jitlaq ħabbta u sabbta. Biex issib replacement ta’ wieħed mill-aħjar 2 plejers fix-xena mondjali ta’ dawn l-aħħar 15 il-sena (hu u Messi) taħsbu realment li tista’ ssibu fi żmien ta’ 4-5 t’ijiem? Jien niddubita ħafna.

Inkompli billi insemmi punti li jinforzawli din l-ideja f’moħħi. U hawn mhux nikkontesta kontra il-ħatra ta’ Max Allegri imma meta tisma bit-tentattivi li nġibu lura il-Pjanic tħassibni mhux ftit li dawn qishom jidhru manuvri biex jikkoreġu zbalji strateġiċi li ttiehdu tul iż-żmien f’dawn l-aħħar snin meta iddecidew iwarrbu minn l-istess inkarigu lil Allegri minn kowċ tat-tim.

Mhux qed togħġobni anqas dan in-nuqqas ta’ kuraġġ li naraw plejers promettenti ħafna bħal Fagioli u Ranocchia meta l-istess Fagioli għadu frisk milli jigi mgħajjat man-Nazzjonal Under 21. Issa mhux kontradizzjoni li ġie magħżul u fl-istess ħin hemm xniegħat ta’ trasferiment b’self f’tim tas-Serie B fil-waqt li s-Sibt li għadda rajna plejer li suppost jilgħab right back u ġie addattat f’nofs il-grawnd – biex ma nsemmux ukoll li plejer li ġie segwit tlett xhur biex jiġi magħna kien wieqaf reserve jistenna biex jidħol? L-istess Locatelli li fl-aħħar kwarta bil-ħila tiegħu irnexxielna nippenetraw ftit fil-kaxxa tal-Empoli u anki pprova konklużjoniijet lejn il-lasta avversarja! Jien għalija dawn l-affarijiet kollha jindikaw li hemm nuqqas ta’ sens ta’ loġistika li fil-passat riċentissimu kienet flagship quality tad-diriġenza tagħna. Se nispiċċaw li l-istess diriġenza li għamlet ħafna ġid f’dan l-aħħar deċennju iħassru kollox b’xogħol ħazin issa? Ma’ tagħmilx sens ghalija jekk jiġri hekk.

Inħalli lilkom taħsbu fuq dawn ir-riflessjonijiet u ma niddejjaq xejn jekk taqsmu il-ħsibijiet taghkom mieghi fuqhom.

Insellmilkom,
Massimo

Mingħajr dubju, il-moral kemm tiegħi u ta’ bosta partitarji Juventini huwa baxx immens hekk kif qomna wara d-disfatta tat-telfa umiljanti ma’ Empoli l-bierah fil-għaxija. Kienet ġimgħa emottivament stressanti b’dak kollu li ġara madwar it-tluq xejn feliċi ta’ Cristiano Ronaldo minn mat-tim ta’ qalbna li bil-fors nafu li ovvjament tħalli mpatt enormi kemm fuq kwistjonijiet ta’ fuq il-pitch kif ukoll barra il-pitch anke minħabba l-importanza enormi kemm tal-player u l-personaġġ CR7. Imma xtaqt niftaħ u nagħlaq mill-ewwel dil-parenteżi mhux b’xi disrispett lejn CR7 imma biex niffoka fuq affarijiet ferm iktar importanti – il-futur tal-iswkadra f’dan l-istaġun jieħu ferm iktar prominenza minn affarijiet oħra.

Il-bieraħ wara il-logħba, ovvjament kien hemm diżappunt enormi u ma tistax ma tħossx hekk. Meta nara il-kummenti ta’ bosta partitarji oħra Juventini nagħmel ferm iktar dwejjaq. Fl-opinjoni umli tiegħi, ma nistgħux nippretendu li wara t-tluq ta’ Ronaldo li kif għidt f’artikli ohra qabel, kien jiggarantilek numru mportanti ta’ gowls, irridu nħarsu l-quddiem u naraw aktar logħob kollettiv biex jagħmel tajjeb għall-goals li kien jiskurja CR7. Il-bieraħ segwejt ukoll il-kliem tal-kowċ taghna Massimiliano Allegri – qal dawn li laqtuni ħafna: “il-mument huwa kkumplikat imma issa irridu nisktu w naħdmu biex noħorġu minn din is-sitwazzjoni kemm jista ikun malajr possibli”. Meta biex naghmel kuraġġ lil bosta ħbieb tiegħi li kienu bla tort ta’ xejn skoraġġati mmens, fakkart l-istaġun 2015-16 fejn fl-ewwel logħba konna tlifna ma Udinese bl-iskor ta’ 1-0 qaluli “imma dan mhux it-tim ta’ dak iż-zmien” – nixtieq infakkar… fil-bidu ta’ dak l-istaġun għaddejna minn rivoluzzjoni ta’ plejers bħal din eżatt fejn rajna jitilquna Pirlo, Tevez u Vidal! Jien nixtieq nagħti ċans qabel ma naqta l-kundanna li ġej staġun fallimentari – nispera li l-fatti jtuni raġun – jekk ma jkunx hekk inkun l-ewwel wieħed li nammetti li ħadt żball u għamilt kuraġġ għal xejn!

Insellmilkom,

Massimo