Kif kulħadd jaf u tkellimt anki fl-aħħar artiklu ppubblikat, it-tim tagħna beda t-taħrig bi grupp kemmxejn żgħir ghall-istaġun li jmiss bir-ritorn ta’ Max Allegri fi tmun tal-iskwadra. Il-grupp għadu żgħir ħafna minħabba l-bosta plejers li pparteċipaw f’Ewro 2020. Sirna nafu wkoll bl-operazzjoni ta’ Arthur li se tħallih barra mill-azzjoni ghal perjodu ta’ madwar xahrejn.
Din l-aħbar tal-operazzjoni ta’ Arthur ma tistax ma tqanqalx ħsibijiet fuq is-suq ta’ trasferimenti fejn bħalissa qed tiddomina x-xena n-negozjar għat-trasferiment ta’ Locatelli minn Sassuolo għal ma’ Juventus. Jidher li Juventus offrew somma ta’ €30 miljun b’self fuq żewġ staġuni imma mingħajr obbligu ta’ xiri. Wieħed hawn jistaqsi jekk din hijiex sempliċiment mossa tattika fin-negozjar ma’ Sassuolo jew inkella tqanqal ħsieb jekk id-diriġenza għandiex fiduċja totali fil-kapaċitajiet tal-plejer. Żgur li l-akkwist ta’ Locatelli jista’ jagħti aktar għażliet lil Allegri milli kellna s-sena l-oħra f’nofs il-grawnd imma minn naħa l-oħra nittamaw li t-trattattiva ma ddumx wisq ma tiġi konkluża biex ma toħnoqx il-possibilita’ li jiġu kkunsidrati għażliet oħra jekk jisfratta l-akkwist ta’ Locatelli. Issemma wkoll tpartit Pjanic-Ramsey. Wieħed jaf jaħseb mill-ewwel jekk din tkunx mossa valida minħabba l-eta’ mhux daqshekk żgħira ta’ Pjanic imma mill-banda l-oħra taf tagħti għażla valida lil Allegri li jkollu playmaker fl-assenza ta’ Arthur u nafu wkoll kemm Miralem Pjanic iħobb il-klabb u l-ambjent Juventin. Minn naħa l-oħra wieħed għandu jikkonsidra li minħabba li hemm ħafna mill-grupp ta’ plejers neqsin mill-bidu mit-taħriġ u li hemm Fagioli li diġa beda il-preparazzjoni, taf tkun l-okkażjoni perfetta biex naraw lil Fagioli jiġi kkunsidrat parti mportanti u opzjoni valida anki waqt l-istaġun. Jien minkejja li Pjanic nammirah ħafna f’dan l-istadju nippereferi nesploraw l-abiltajiet ta’ Fagioli. Inthom x’taħsbu?

Insellmilkom
Massimo