Liverpool qablu li jħallsu 4.5 miljun Ewro sabiex jiksbu b’self lil Arthur għal sena. Huma se jkollhom id-dritt li jixtruh għal kollox għal 37.5 miljun Ewro s-sena d-dieħla. Dawn huma d-dettalji uffiċjali tal-ftehim bejn il-klabbs kif ippublikati fl-istqarrija maħruġa minn Juventus.
Matthew Scerri
Il-Brażiljan Arthur telaq minn Turin dalgħodu biex imur jagħmel it-testijiet mediċi fl-Ingilterra għal ma’ Liverpool. Hu se jingħaqad magħhom b’self għal sena, b’Liverpool allegatament m’għandhom ebda dritt jew obbligu li jixtruh għal kollox. Sal-bieraħ kien qed jissemma li Arthur kien se jiffirma għal Sporting, biss dal-lejl l-affarijiet inbidlu hekk kif Liverpool għamlu kuntatt mal-aġent tiegħu.
Matthew Scerri
Nhar is-Sibt Arrivabene għamilha ċara li hu essenzjali għal Juventus li jneħħu lil xi plejers li għandhom fit-tim sabiex ma jkunx hemm piż żejjed fuq l-accounts tal-klabb. Wieħed mill-plejers li Juventus iridu jneħħu hu Arthur. Nafu li Valencia ilhom iriduh b’self. Klabbs oħra li fl-aħħar sigħat urew interess fih huma: Nice, Sporting Lisbon u Everton. L-aġent qed jaħdem bla qatigħ bil-għan li tinstab soluzzjoni li twassal biex Arthur jingħaqad ma’ tim ieħor li jkun jista’ jiggarantixxi lill-midfielder Brażiljan post fiss mal-ewwel ħdax tat-tim tiegħu.
Matthew Scerri
M’hemm xejn ġdid dwar it-trasferiment ta’ Arthur b’self ma’ Valencia. In-negozjati bejn Juventus u l-klabb Spanjol jidhru weqfin bħalissa, bil-partijiet ma jirnexxilhomx isibu ftehim bejniethom. Il-kwistjoni kollha hi marbuta ma’ kif se tinqasam il-paga ta’ Arthur bejn iż-żewġ klabbs. Valencia lesti jħallsu sa massimu ta’ 25% tal-paga ta’ Arthur, filwaqt li Juventus qed jitolbuhom li jħallsu nofs il-paga. Valencia ma jridux jaċċettaw u allura kollox jinsab wieqaf. Probabbli li t-trasferiment, jekk iseħħ, ikun possibbli biss fl-aħħar jiem qabel jagħlaq is-suq tat-trasferimenti.
Matthew Scerri
Federico Pastorello, li hu l-aġent ta’ Arthur, ikkonferma li hemm interess min-naħa ta’ Valencia fil-midfielder Brażiljan. Hu qal li jittama li jinstab ftehim għax Arthur irid jitlaq lil Juventus. Skont Pastorello, Arthur hu plejer tajjeb wisq biex joqgħod jara lill-oħrajn jilagħbu.
Matthew Scerri
L-għidut dwar it-tim Juventin mhu jaqta’ xejn hekk kif is-suq tat-trasferimenti riesaq bil-mod il-mod lejn tmiemu. Fadal bejn wieħed u ieħor tliet ġimgħat u nofs, u jekk s’issa n-negozjati mxew b’pass kajman, issa t-timijiet iridu jibdew jiffinalizzaw l-akkwisti tagħhom. Juventus huma attivi ferm kemm mil-lat ta’ bejgħ ta’ plejers, kif ukoll f’dak li għandu x’jaqsam max-xiri ta’ plejers ġodda.
Il-plejers li probabbli jitilqu lil Juventus huma Rugani u Arthur. It-tnejn li huma għandhom paga għolja u Juventus lesti jneħħuhom peress li huma meqjusa biss bħala riservi ma’ Juventus. Arthur jinsab qrib ħafna li jingħaqad ma’ Valencia b’self. Rugani, mill-banda l-oħra, x’aktarx ikun mibjugħ. Galatasaray qed joffru 10 miljuni għalih, somma li Juventus lesti jaċċettaw. Rugani jinsab anki fil-mira ta’ klabbs Taljani bħal Empoli u Sampodoria, biss dawn mhumiex joffru daqs Galatasaray.
F’dak li għandu x’jaqsam mal-akkwist, Juventus nafu li qed ifittxu playmaker, plejer max-xellug u attakkant. Nafu li hemm ftehim kemm ma’ Kostic kif ukoll ma’ Paredes, bil-plejers diġà aċċettaw l-offerta mressqa lilhom minn Juventus. Jonqos issa li Juventus jilħqu ftehim mal-klabb rispettiv tagħhom. Dwar l-attakkant hemm ħafna iktar inċertezza. Issemmew diversi plejers, b’Morata dejjem ikun indikat bħala l-favorit nett, għalkemm fil-verità Atletico ma tantx jidhru disposti jitilquh minn idejhom. Attakkanti oħra li qed jissemmew bħalissa huma: Muriel u Raspadori. Fl-aħħar tajjeb ngħidu li jekk verament jitlaq Rugani, hu probabbli li Juventus jixtru difensur ieħor, b’Milinkovic ta’ Fiorentina jkun il-kandidat prinċipali.
Matthew Scerri
Hu probabbli ferm li Arthur iħalli lil Juventus biex jingħaqad b’self mat-tim ta’ Valencia. Gattuso jridu b’saħħa fit-tim tiegħu u qed jagħmel pressjoni mad-diriġenza tal-klabb Spanjol sabiex jiksbu lil Arthur. Il-Brażiljan, min-naħa tiegħu, mhux jopponi dat-trasferiment u l-klabbs qegħdin jitkellmu bejniethom biex isibu ftehim. Hemm qbil li Arthur jingħaqad ma’ Valencia b’self. Jidher li jonqos l-iktar dettall importanti li dwaru l-klabbs għadhom iridu jsibu qbil: kif se jaqsmu bejniethom il-ħlas tal-paga ta’ Arthur. Valencia qed jagħmluha ċara li ma jifilħux iħallsu l-paga li Arthur għandu ma’ Juventus u allura l-Bianconeri se jkollhom joħorġu d-differenza huma.
Matthew Scerri
F’nofs il-grawnd Juventus mistennija jagħmlu minn tal-inqas akkwist ieħor. Qed jissemma b’saħħa Paredes fil-pożizzjoni ta’ playmaker. Qabel isir dan l-akkwist, Juventus iridu però qabelxejn ibigħu peress li bħalissa fit-tim Juventin hemm wisq plejers li jilagħbu f’nofs il-grawnd. L-uniċi ċerti li se jżommu posthom ma’ Juventus huma Pogba u Locatelli. McKennie, Zakaria u Rabiot, probabbli jibqgħu, għalkemm jekk tasal offerta tajba, Juventus lesti jbigħuhom. Ramsey u Arthur, mill-banda l-oħra, mhumiex parti mill-pjanijiet ta’ Juventus. Ramsey jinsab f’negozjati ma’ Juventus biex jittermina l-kuntratt tiegħu, filwaqt li hemm it-tama li Arthur jkun misluf (Arsenal). Imbagħad hemm it-tlieta żgħar – Rovella, Fagioli u Miretti – li s’issa mhux magħruf x’se jsir minnhom. Kollox jindika li wieħed mit-tlieta biss se jibqa’ ma’ Juventus, għalkemm il-preseason jaf jibdel il-pjanijiet ta’ Juventus. La darba Juventus ikunu neħħew plejer jew plejers fit-tim tagħhom, ikunu jistgħu jgħaddu għal aktar akkwisti.
Matthew Scerri
Kulma jmur Nicolò Zaniolo qed jissemma dejjem iktar b’saħħa ma’ Juventus. Minn dak li qed jiġi rrapurtat, jidher li r-rieda ta’ Zaniolo hi li jitlaq lil Roma biex jingħaqad ma’ Roma. It-taħdidiet ma’ Roma għall-kuntratt il-ġdid tiegħu huma weqfin bil-partijiet mhux jirnexxilhom jiddjalogaw. Zaniolo jrid jitlaq. Roma jridu jżommuh biss fehmu li l-plejer għandu intenzjonijiet oħra u, bħal dejjem, klabb diffiċli jżomm plejer kontra r-rieda tiegħu. Bil-mod il-mod Juventus għaddejjin bil-ħidma tagħhom biex jiksbu s-servizzi ta’ Zaniolo. S’issa ma jirriżultax li kien hemm offerti uffiċjali min-naħa ta’ Juventus, għalkemm nafu fiċ-ċert li l-klabbs iltaqgħu u tkellmu b’mod informali dwar Zaniolo. L-għidut hu li Juventus lesti joffru tpartit ma’ Arthur jew inkellha jiksbu lil Zaniolo b’self bl-obbligu li jixtruh għal kollox is-sena d-dieħla.
Matthew Scerri
F’nofs il-grawnd ta’ Juventus x’aktarx se jkun hemm xi bidliet fil-jiem li ġejjin. Hu fatt magħruf li l-aġent ta’ Arthur ilu miftiehem ma’ Arsenal. Fil-jiem li għaddew kellna l-aħbar li Aston Villa qed juru interess qawwi fl-akkwist ta’ Bentancur. Imbagħad hemm Ramsey li fi kliem Allegri stess se jkun qed jitlaq lil Juventus (anki jekk s’issa l-ftehim bejn il-partijiet biex jiġi tterminat il-kuntratt tal-plejer minn Wales għadu ma nstabx!). Intant fl-aħħar sigħat kellna l-aħbar li Juventus qed jaħdmu biex jiksbu b’self lil Nandez mingħand Cagliari. Fl-istess ħin, kien hemm anki aħbar li l-Bianconeri għamlu kuntatt ma’ Milan għal Kessie li għandu kuntratt li jiskadi f’Ġunju 2022. Kien hemm verità f’dan l-għidut kollu ma nafux. Biss wara dak kolli li nqala’ ma’ Vlahovic, żgur li kollox jista’ jiġri!
Matthew Scerri