Fl-ewwel paġna ta’ Tuttosport tal-lum insibu l-aħbar li Pavel Nedved kellu laqgħa f’Monaco ma’ Mino Raiola. Skont il-gazzetta huma tkellmu dwa il-futur ta’ diversi plejers, fosthom Donnarumma, Pogba, Romagnoli u Bernardeschi. Bħal soltu, jidher li anki das-sajf Raiola se jkun protagonist tas-suq tat-trasferimenti Juventin.
Matthew Scerri
Allegatament Juventus jinsabu f’kuntatti mal-aġenti ta’ Hakan Calhanoglu li attwalment hu free-agent. Milan offrewlu kuntratt ġdid b’paga ta’ 4 miljuni fis-sena, liema offerta ma tantx għoġbitu. Juventus, mill-banda tagħhom qed joffrulu 5 miljun u bonuses fis-sena. Jidher li Allegri hu favur dat-trasferiment u għaldaqstant il-kuntatti mal-aġenti se jkomplu għaddejjin bit-tama li Juventus jirnexxilhom jiksbu lil Calhanoglu.
Matthew Scerri
Id-Direttur tal-Isports ta’ Cagliari, Stefano Capozzucca stqarr li Daniele Rugani mhuwiex fil-pjanijiet ta’ Cagliari. Id-deċiżjoni hi marbuta ma’ kwistjoni ekonomika hekk kif Cagliari ma jaffordjawx li jixtru plejer bħal Rugani u jagħtuh il-paga li se jkun qed jitlob. Rugani għaldaqstant se jkun qed jirritorna ma’ Juventus għalissa.
Matthew Scerri
Paolo Maldini kkonferma b’mod uffiċjali li Donnarumma se jitlaq lil Milan. Hu tkellem waqt AC Milan Talk fuq Twitch u qal hekk: “In-nies ma tifhimx xi tfisser tkun professjonist, li trid tkun lest tibdel it-tim. Hi diffiċli li taċċettaha. Jeħtieġ nuru rispett lejn min ta ħafna lil Milan u qatt ma naqasna mir-rispett. It-toroq tagħna se jinfirdu u nawguralu l-isbaħ affarijiet.”
Matthew Scerri
Qed ikun irrapurtat minn diversi siti u gazzetti li Juventus mhux beħsiebhom joffru kuntratt ġdid lil Giorgio Chiellini. Il-kuntratt tiegħu jasal fi tmiemu f’Ġunju u għaldaqstant Chiellini se jkun qed iħalli lil Juventus wara diversi snin. Qed jissemma li Chiellini jista’ jmur itemm il-karriera l-Amerka, għalkemm mhux eskluż li Juventus joffrulu xogħol fi ħdan id-diriġenza.
Matthew Scerri
Mike Maignan wasal l-Italja tard ilbieraħ filgħaxija u issa se jkun qed jiffirma kuntratt mal-Milan. L-akkwist tiegħu hi indirettament konferma li Donnarumma se jkun qed jitlaq lir-Rossoneri. Ilna nafu li kien hemm differenza kbira bejn dak li kien qed jitlob Raiola għall-kuntratt il-ġdid ta’ Donnarumma u dak li kien qed joffrulu Milan. Juventus u Barcellona qed inkunu indikati bħala l-aktar destinazzjonijiet probabbli għal Donnarumma.
Matthew Scerri
Gigi Buffon ħabbar li se jitlaq lil Juventus fi tmiem l-istaġun. “Naħseb li tajt kollox lil Juventus. U rċevejt lura dak kollu li kien possibbli u iktar minn hekk ma nistgħux nagħmlu. Wasalna fi tmiem ta’ ċiklu u hu xieraq li nwarrab,” qal Buffon. Dwar il-futur tiegħu, Buffon sostna li hu se jieqaf sakemm ma jsibx tim ieħor li jagħtih stimoli ġodda u li jkun jista’ jissarraf f’esperjenza ġdida ta’ ħajja.
Matthew Scerri
José Gayà mistenni jkun qed jitlaq lil Valencia das-sajf minħabba li l-kuntratt tiegħu jasal fi tmiemu s-sena d-dieħla. Qed jissemma l-prezz ta’ 25 miljun. Apparti Juventus, il-gazzetti qed isemmu anki li hemm interess min-naħa ta’ Manchester City, Atletico Madrid u Real Madrid. Fil-każ ta’ Juventus, l-interess f’Gayà hu marbut mal-futur ta’ Alex Sandro. Il-Bianconeri jixtiequ jbigħu lil Alex Sandro, biss nafu li mhux se tkun ħaġa faċli minħabba nuqqas ta’ interess fih minn klabbs li realment jistgħu jaffordjaw il-prezz tat-trasferiment u tal-paga tiegħu.
Matthew Scerri
Fil-jiem li għaddew kellna l-aħbar li Everton huma interessati jiksbu lil Wojciech Szczesny. Issa La Gazzetta dello Sport qed tirraporta li Fabio Paratici jinsab imħajjar li jipproponi lil Everton tpartit bejn Szczesny u Kean. Ovvjament Juventus ikollhom iżidu somma flus peress li Szczesny għandu valur inferjuri għal Kean. Fl-istess ħin, tajjeb li ma ninsewx li PSG għad għandhom kull dritt li jixtru lil Kean għal kollox u allura l-futur tal-attakkant Taljan bħalissa jinsab iktar f’idejn il-klabb Franċiż milli f’dawk ta’ Everton.
Matthew Scerri
Qed ikun irrapurtat li l-ġimgħa d-dieħla l-aġenti ta’ Douglas Costa se jkollhom laqgħa ma’ Juventus. F’dil-laqgħa se jkun diskuss il-futur ta’ Juventus. Il-pożizzjoni ta’ Juventus hi li jinstab klabb xerrej għal Douglas Costa. Hemm diversi klabbs interessati biss bħal dejjem hemm il-problema tal-paga għolja li għandu l-Brażiljan. Juventus mhux se jkunu qed jitolbu somma għolja għal Costa. Probabbli l-prezz li se jkunu qed jitolbu ta’ madwar 12-il miljun sabiex ma jkunx hemm minusvalenza.
Matthew Scerri