Aaron Ramsey x’aktarx se jirritorna fil-Premier League fl-istaġun li jmiss. Rapporti li dehru fil-media Ingliża jsostnu li West Ham, Aston Villa u Crystal Palace se jkunu qed iressqu offerta għalih das-sajf.
Matthew Scerri
L-attenzjoni tal-media Taljana tidher li hi fuq l-attakk Juventin. Fil-aħħar jiem kellna diversi xnigħat dwar bidliet fl-attakk Juventin li jistgħu jseħħu das-sajf. Donnu li Ronaldo, Morata u Dybala mhumiex ċerti minn posthom u Juventus qed ifittxu attakkanti ġodda minflokhom. Fil-ħarġa tal-lum ta’ La Gazzetta dello Sport naqraw li Ronaldo lest jibqa’ biss irid attakkant b’karatteristiċi li jaqblu ma’ tiegħu. Juventus lesti jikkuntentawh billi jiksbu lil Kean jew lil Aguero. Tgħid vera?
Matthew Scerri
Milik u Scamacca jidher li għadhom ma qatgħux qalbhom li jistgħu jingħaqdu ma’ Juventus. Fil-fatt, skont La Gazzetta dello Sport, hekk kif m’hemmx ċertezza li Morata se jibqa’ ma’ Juventus, mhux eskluż li fis-sajf ikun hemm taqlib kbir fi ħdan it-tim Juventin. Il-Bianconeri, jista’ jkun, li jagħżlu li ma jġeddux is-self ta’ Morata għal 10 miljuni oħra u minflok jinvestu ftit iktar flus biex jiksbu għal kollox lil Milik jew Scamacca.
Matthew Scerri
Das-sajf Mauro Icardi x’aktarx se jkun qed jitlaq lil PSG. Diversi klabbs qed juru interess fih. Fost il-klabbs li jidhru l-aktar interessati li jiksbu s-servizzi tiegħu hemm Juventus u Roma. It-tnejn li huma jeħtieġu attakkant tal-kaxxa u japprezzaw immens lil Icardi. Wieħed irid jara jekk PSG humiex se jkunu disposti jaċċettaw ftehim fuq bażi ta’ self. Nifhmu li PSG lesti jaċċettaw li jagħtuh b’self biss jekk ikollhom garanziji li l-klabb li se jiksbu jixtrih għal kollox jekk jintlaħqu ċerta miri.
Matthew Scerri
X’se jkun il-futur ta’ Paulo Dybala? Domanda li hi fuq fomm kull supporter ta’ Juventus. Li nafu fiċ-ċert hu li Juventus ilhom kważi sentejn f’taħdidiet mal-aġent tiegħu sabiex jiġġedded il-kuntratt tiegħu. S’issa għadu ma nstab ebda ftehim. L-għidut hu li t-talba ta’ Dybala hi ferm għola minn dak li Juventus lesti joffrulu. Hemm diversi xnigħat li Juventus lesti jbigħuh das-sajf. Qed jingħad li xi klabbs tal-Premier League, fosthom Tottenham u Manchester United, lesti joffru 50 miljun Ewro għalih. Juventus, min-naħa tagħhom, qed jitolbu 75 miljun Ewro, somma li tista’ twassalhom għall-akkwist ta’ stilla tipo Pogba.
Matthew Scerri
Juventus, Chelsea u Atletico Madrid qed isegwu b’interess kbir lil Gabriel Menino, il-plejer ta’ nofs il-grawnd ta’ Palmeiras. Hu għandu klawżola li permezz tagħha jista’ jinħall mill-kuntratt tiegħu bil-ħlas ta’ penali li tammonta għal 60 miljun Ewro. Madankollu, skont Mundo Deportivo, Palmeiras lesti jbigħuh għal somma inferjuri, madwar 15-20 miljun Ewro.
Matthew Scerri
Radu Dragusin jidher li għażel li jibqa’ ma’ Juventus. Fil-fatt f’dawn il-jien kellna rapporti li Dragusin irrifjuta offerta li waslitlu mingħand Crystal Palace u beħsiebu jgħid le anki lil klabbs oħra. Wara dil-waqfa għall-impenji tat-timijiet nazzjonali, Dragusin mistenni jiffirma kuntratt ġdid li se jorbtu għal ħames snin oħra ma’ Juventus.
Matthew Scerri
F’kumment mogħti lil 20 Minutes, Mattia De Sciglio stqarr li x-xewqa tiegħu hi li jibqa’ ma’ O. Lyon, għalkemm sostna wkoll li d-deċiżjoni finali se tittieħed min-naħa ta’ Juventus. De Sciglio kkonferma wkoll li fil-passat kien qrib li jingħaqad ma’ PSG bi tpartit ma’ Kurzawa biss imbagħad kollox sfaxxa fix-xejn fuq deċiżjoni ta’ Juventus.
Matthew Scerri
Fl-aħħar jien kien hemm diversi spekulazzjonijiet li Juventus se jkunu qed ibigħu lil Aaron Ramsey das-sajf. Nafu li klabb bħal Juventus jibqgħu għaddejjin grazzi għall-famużi plusvalenze. Dis-sena l-iktar mod faċli biex issir plusvalenza hu li jinbigħ wieħed bejn Ramsey u Rabiot li ngħaqdu b’xejn ma’ Juventus ftit iktar minn sena u nofs ilu. Rabiot, fil-perjodu post-waqfa tal-Covid, kien wieħed mill-aqwa plejers fin-nofs il-grawnd ta’ Juventus. Għaldaqstant Juventus qed jippreferu jbigħu lil Ramsey, anki minħabba l-fatt li hu spiss ikun barra mill-azzjoni għax imweġġa’.
Matthew Scerri
Għall-ewwel darba Juventus jidhru disposti li jisimgħu l-offerti ta’ klabbs oħra għal Rodrigo Bentancur. L-Urugwajan ma jinsabx għall-bejgħ, biss, għall-kuntrarju tas-snin l-oħra, Juventus jidhru disposti jbigħuh jekk taslilhom l-offerta t-tajba. Skont Calciomercato.com, Juventus lest jilqgħu offerti li jibdew minn 35 miljun Ewro.
Matthew Scerri