Jidher li Bologna lesti jidħlu f’konkorrenza ma’ Juventus biex jiffirmaw lil Gianluca Scamacca. Għall-kuntrarju ta’ Juventus huma jidhru disposti li joffru somma ta’ 20 miljun Ewro għalih. Juventus, mill-banda tagħhom, qed jitkellmu ma’ Sassuolo fuq self ta’ sena u nofs bid-dritt jew l-obbligu li jixtruh għal kollox fl-2022. Tgħid ma’ min se jispiċċa Scamacca?
Matthew Scerri
Kollox jindika li Juventus u Sassuolo resqin lejn ftehim sabiex Scamacca jingħaqad mal-Bianconeri. Genoa se jkunu qed jiffirmaw lil Niang minfloku. Scamacca se jkun misluf lil Juventus għal sena u nofs. Skont La Gazzetta dello Sport, Paratici lest jaċċetta l-obbligu li Juventus jixtru lil Scamacca għal kollox fl-2022. B’dal-mod, il-prezz tax-xiri ta’ Scamacca se jkun imqassam fuq erba’ snin kif diġà qed isir fil-każ ta’ Chiesa.
Matthew Scerri
Juventus se jkunu qed iħallsu 18-il miljun Ewro lil Genoa għal Nicolò Rovella flimkien ma’ 2 miljuni oħra f’bonuses. Min-naħa tagħhom Genoa qed jixtru mingħand Juventus lil Portanova u lil Petrelli. Is-somma li Genoa se jħallsu għal Portanova hi ta’ 10 miljuni, filwaqt li Petrelli se jiswihom 8 miljuni. Fil-kuntratti hemm anki performance bonuses li jkunu jridu jitħallsu għat-tnejn li huma: 5 miljuni fil-każ ta’ Portanova u 5.3 miljun Ewro għal Petrelli. Infakkru li Rovella se jibqa’ b’self ma’ Genoa għal sena u nofs, filwaqt li Portanova u Petrelli se jkunu qed jilbsu l-flokk ta’ Genoa immedjatament.
Matthew Scerri
Juventus ħabbru li kisbu lil Marley Aké mingħand O.Marseille. Fl-istess ħin Franco Tongya ħalla lil Juventus biex jingħaqad ma’ O.Marseille. It-trasferimenti huma fuq bażi permanenti, mhux self.
Matthew Scerri
Juventus u Sassuolo mistennija jkunu qed jixtru plejer b’kollaborazzjoni flimkien. Fil-fatt Juventus iridu lil Liberato Cacace ta’ Sint Truiden. L-idea hi li, kif ġara fis-snin li għaddew b’Demiral, Sassuolo se jixtru lil dal-plejer għal 5 miljuni. Is-sena d-dieħla jew ta’ wara, imbagħad, Juventus ikollhom id-dritt li jixtruh għal somma kemxejn għola direttament mingħand Sassuolo.
Matthew Scerri
Juventus u O.Marseille jinsabu qrib ferm li jilħqu ftehim għal bdil ta’ plejers. Il-Bianconeri se jiksbu lil Marley Ake, winger ta’ 19-il sena. O. Marseille se jkunu qed jiksbu mingħand Juventus lil Franco Tongya li għandu kuntratt mal-Bianconeri li jiskadi daqt.
Matthew Scerri
Fabio Paratici kellu raġun: Cristian Romero hu difensur ta’ kwalità u ma’ Atalanta qed juri t-talent kollu tiegħu. Tant sejjer tajjeb li m’hemmx dubju li Atalanta se jixtruh għal kollox mingħand Juventus. Il-prezz maqbul hu ta’ 16-il miljun Ewro, liema somma tista’ titla’ għal 18-il miljun jekk Atalanta jikkwalifikaw għaċ-Champions League.
Matthew Scerri
Dil-ġimgħa se nisimgħu u naqraw ħafna dwar Edin Dzeko. Probabbli li hu se jkun qed jitlaq lil Roma wara li kellu diżgwid ma’ Fonseca. Kif għidna drabi oħra l-ikbar ostaklu biex Dzeko jingħaqad ma’ Juventus hu l-paga tiegħu li hi għolja wisq. Fl-aħħar sigħat issemma ħafna li jista’ jkun hemm bdil bejn Dzeko u Bernardeschi. Madankollu biex il-bdil iseħħ, hu fundamentali li Dzeko jaċċetta li jkollu paga inqas ma’ Juventus.
Matthew Scerri
