Il-media internazzjonali qed tagħti l-aħbar li Juventus tkixxfu dwar Memphis Depay (O.Lyon) u Marcos Alonso (Chelsea). Depay għandu kuntratt li jiskadi s-sena d-dieħla u allura jaf il-prezz tiegħu jkun baxx. Alonso, mill-banda l-oħra, hu plejer li Chelsea jridu jbigħu. Fl-Ingitlerra qed jingħad li Juventus lesti jiksbuh b’self bid-dritt jew l-obbligu li jixtruh għal kollox is-sena d-dieħla.
Matthew Scerri
Il-partiti ta’ ħbiberija tal-lum jagħtuna indikazzjonijiet marbuta mas-suq tat-trasferimenti. Minn banda kellna lil Suarez li ma ġiex mgħajjat minn Barcellona għall-partita kontra Tarragona. Dan qed jinqara bħala sinjal li hu imminenti t-tluq tiegħu mit-tim ta’ Barcellona. Dzeko, mill-banda l-oħra, beda mill-ewwel minuta kontra Cagliari u allura nifhmu li Roma bħalissa ma jridux jitilquh minn idejhom.
Matthew Scerri
Il-gazzetta Daily Star temmen li Manchester United jinsabu lesti li jixtru lil Douglas Costa. Fil-fatt ir-Red Devils mhux se jixtru lil Jadon Sancho peress li jiswa wisq. Minflok qed juru interess qawwi f’Costa. Probabbli li l-United se jistennew sal-aħħar jiem tas-suq tat-trasferimenti bit-tama li jiksbu prezz aħjar.
Matthew Scerri
Illum xi gazzetti u siti tal-calciomercato qed jirrapurtaw li Dzeko jinsab mill-ġdid b’ċans tajjeb li jingħaqad ma’ Juventus. Fil-fatt il-Bianconeri qed jibżgħu li l-passaport ta’ Suarez idum ma joħroġ u allura ma jridux jibqgħu b’xiber imnieħer. Probabbli li Juventus se jistennew ftit jiem oħra biex jaraw ikunx hemm żviluppi dwar il-passaport ta’ Suarez. Jekk l-aħbarijiet ma jkunux pożittivi, allura mhux ta’ min jeskludi li Juventus jixtru lil Dzeko minfloku.
Matthew Scerri
Milik jinsab urtat immens għall-mod kif qed jittrattawh Napoli. Fl-aħħar sigħat hu lanqas biss ġie msejjaħ għall-partita ta’ ħbiberija ta’ Napoli kontra Pescara. Skont Sky Milik għarraf lil Napoli li hu mhux se jitlaqhom dan l-istaġun. Din hi mossa min-naħa tiegħu biex juri lil Napoli li mhux se jkompli jiġi ttrattat ħażin. Infakkru li Milik għandu kuntratt ma’ Napoli li jiskadi s-sena d-dieħla u għaldaqstant il-fatt li jrid jibqa’ magħhom dis-sena, ifisser li probabbli Napoli se jitilfuh b’xejn s-sajf li ġej. Il-messaġġ ta’ sfida ta’ Milik hu ċar: jew ikun ikkuntentat das-sajf billi jitħalla jmur ma’ min irid jew inkella jitlaq b’xejn fis-sajf 2021.
Matthew Scerri
Ilbieraħ uffiċċjali ta’ Parma kellhom laqgħa ma’ Paratici. Skont Sky Parma jinsabu interessati li jiksbu lil Felix Correia u lil Nicolussi Caviglia. S’issa mhuwiex magħruf jekk Parma jridux jixtruhom jew inkella talbuhomx b’self. Barra minn hekk jidher li Parma tkixxfu ftit dwar is-sitwazzjonijiet ta’ Marko Pjaca u Luca Pellegrini. Hawn tajjeb ngħidu li Parma talbu biss xi informazzjonijiet mingħajr ma fetħu negozjati għalihom.
Matthew Scerri
It-tmiem tal-esperjenza ta’ Sami Khedira ma’ Juventus tidher li se tkun tassew qarsa hekk kif qed ikompli jwebbes rasu u qed jitlob l-paga sħiħa ta’ dis-sena (6 miljuni) u l-flus li għadhom dovuti lilhom mis-sena li għaddiet skont il-ftehim stipulat minħabba l-emerġenza tal-Covid-19. Juventus offrewlu somma flus biex hu jaċċetta li jxolji l-kuntratt, biss ma laqax l-offerta u kompla jinsisti li jrid il-flus li semmejna qabel. F’dan l-istadju hu tassew diffiċli li wieħed ibassar x’se jiġri. Li hu ċert hu li Khedira se jkompli jidher ikrah f’għajnejn is-supporters. Hu veru li kulħadd irid jitħallas skont il-kuntratt, imma hu veru wkoll li l-plejers mhumiex ħaddiema normali u li l-pagi tagħhom huma fenomenali. Wara snin taqla’ l-miljuni, l-irġulija tgħidlek li għandek taċċetta ftehim mill-klabb tiegħek anki jekk tkun se titlef xi miljuni. Fuq kollox Khedira mhux se jsibha bi tqila jsib klabb Amerikan jew Ċiniż li joffrilu paga miljunarja wara li jxolji l-kuntratt ma’ Juventus. Kif qed jiżvolġu l-affarijiet, Khedira qed jidher tassew ikrah u qed jonqos mir-rispett lejn il-klabb li baqa’ jemmen fih minkejja li qatta’ dejjem żminijiet kbar barra b’injury.
Matthew Scerri
Skont Mundo Deportivo, il-ġimgħa d-dieħla Arturo Vidal u Luis Suarez se jinħallu mill-kuntratti li għandhom ma’ Barcellona. Għalihom it-tnejn il-ftehim biex il-kuntratti tagħhom ikunu xolti jidhru li huma tassew fil-qrib u għalhekk wieħed jista’ jbassar li l-ġimgħa d-dieħla għandha tingħata l-aħhar li m’għadhomx plejers ta’ Barcellona.
Matthew Scerri
Michael Manuello, li hu l-aġent ta’ Giroud, tkellem ma’ Tuttojuve.com dwar l-għidu tal-aħħar sigħat. Hu sostna: “F’dal-mument ma kienx hemm kuntatti ma’ Juventus.” Fi kliem ieħor dak kollu li smajt mill-bieraħ ‘l hawn jidher li mhuwiex minnu.
Matthew Scerri
Skont La Gazzetta dello Sport l-eżami tal-lingwa Taljana ta’ Luis Suarez x’aktarx se jsir nhar il-Ħamis fl-Università degli Stranieri ta’ Perugia. Kollox jindika li verament Suarez qed jagħmel dak kollu li hu possibbli biex verament jikseb il-passaport Taljan li hu tant meħtieġ biex Juventus ikunu jistgħu jirreġistrawh.
Matthew Scerri