L-iswab tests tal-plejers u l-istaff ta’ Napoli kellhom kollha riżultat negattiv u allura s’issa ħadd ma jidher li ħa l-virus mingħand il-plejers ta’ Genoa l-Ħadd li għadda. Ma ninsewx, però, li t-tobba dejjem qalulna li jekk it-test isir kmieni wisq, il-virus jaf ma jinqabadx. Għada waranofsinhar se jsiru testijiet oħra.
Matthew Scerri
Il-Ministru Taljan tal-Isports, Vincenzo Spadafora stqarr illum li għalissa mhuwiex il-każ li tieqaf is-Serie A minħabba l-Covid-19. Fi kliemu l-protokoll tal-FIGC hu tajjeb ħafna u ma jeħtieġ ebda bidla.
Matthew Scerri
Illum mistenni jkun hemm laqgħa straordinarja tal-Lega Calcio fejn fost l-oħrajan se jkun diskuss il-każ tal-14-il persuna ta’ Genoa pożittivi għall-Covid-19. Hu probabbli ferm li Genoa-Torino tas-Sibt tkun posposta. Fl-istess ħin anki Juventus-Napoli jaf titmexxa għal data oħra. Dalgħodu suppost insiru nafu r-riżultati tal-iswab tests li saru lill-plejers ta’ Napoli. Kif ktibna lbieraħ l-incubation period tal-virus hu tassew twila u allura jkun prudenti li Juventus-Napoli tiġi posposta sabiex il-virus ma jkomplix jinfirex u fl-istess ħin nevitaw sitwazzjonijiet fejn il-plejers ta’ Napoli jaf ikunu debboli minħabba l-virus li jkun ġo fihom mingħajr ma jinqabad mit-test.
Matthew Scerri
Bejn dal-lejl u għada mistennija joħorġu r-riżultati tal-iswab tests tal-plejers ta’ Napoli wara li faqqa’ l-każ ta’ Genoa b’14-il persuna infettata. Napoli lagħbu kontrihom nhar il-Ħadd u allura hemm riskju li l-virus għadda lill-plejers Naplitani. Minħabba l-incubation period tal-virus innifsu, nhar il-Ġimgħa se jsiru swab tests oħra li r-riżultati tagħhom ikunu magħruf s-Sibt.
F’dan l-istadju għadna ma nafux jekk Genoa-Torino u Juventus-Napoli humiex se jintlagħbu. Fir-regolamenti tal-kampjonat Taljan m’hemm l-ebda regoli li tgħid li jekk ikun hemm iktar minn ċertu numru ta’ plejers infettati l-partita titħassar. L-Uefa għandha dir-regola għall-kompetizzjonijiet Ewropej (13-il plejer infettat ikun ifisser li l-partita ma tintlagħabx). Genoa għandhom għaxar plejers infettati s’issa u nemmnu li fiċ-ċirkostanzi attwali l-partita kontra Torino għandha tintlagħab f’data oħra. L-istess jgħodd għal Juventus-Napoli għax l-incubation period tal-virus hu kemxejn twil u jista’ jkun li fl-iswab tests il-virus ma jinqabadx (fil-fatt Genoa kellhom biss tnejn morda sas-Sibt li għadda u l-virus irriżulta wara l-partita). Sitwazzjoni delikata immens. Nemmnu imma li s-sens komun jitlob il-prudenza bħalissa: aħjar żewġ partiti li jintlagħbu f’data oħra milli jkun hemm erba’ timijiet tas-Serie A b’numru qawwi ta’ plejers infettati. Aħjar inwaqqfu żewġ partiti issa milli nieħdu r-riskju li jkollu jerġa’ jagħlaq kollox mill-ġdid!
Matthew Scerri
Aħbar inkredibbli li għadha kif ħarġet ftit tal-minuti ilu hi li 14-il persuna bejn plejers u staff ta’ Genoa nstabu pożittivi għall-Covid-19. Allegatament tmienja minnhom huma plejers. Napoli, li lagħbu kontrihom ilbieraħ, qed jagħmlu l-iswab tests lill-plejers tagħhom. Fil-jiem li għaddew Perin u Schone ta’ Genoa wkoll kienu ttestjaw pożittivi u ma lagħbux kontra Napoli. Issa d-domanda hi: jekk diversi plejers ta’ Napoli ħadu l-virus, Juventus-Napoli tal-Ħadd se tintlagħab xorta? U x’se jiġri mill-konfront tas-Sibt bejn Genoa u Torino?
Matthew Scerri
Intervistat minn Radio Kiss Kiss, il-President tar-Reġjun Piemonte, Alberto Cirio sostna li hemm pjan sabiex għall-partita Juventus-Napoli hemm pjanijiet biex jitħallew jidħlu iktar minn elf supporter fl-Allianz Stadium. Fi kliemu l-protokoll dettaljat ilu lest minn Lulju u jekk is-sitwizzjoni sanitarja tkun tippermetti, se jsir tentattiv biex jidħlu iktar nies minn kemm kien hemm fl-okkażjoni ta’ Juventus-Sampdoria.
Matthew Scerri
Ħarġu iktar dettalji dwar il-permess mogħti mill-awtoritajiet tar-reġjun tal-Emilia Romagna biex 1000 supporters jitħalla jidħol fl-istadiums. L-awtoritajiet talbu lill-klabbs konċernati biex jipprovdu dokument bil-protokoll li se jintuża. Sassuolo, imma, għarrfu lill-awtoritajiet li huma ma jinsabux lesti biex f’temp tant qasir jipprovdu dan id-dokument. Il-paradoss hu li Juventus ilhom ġimgħat li ħejjew il-protokoll u għaddewh lill-awtoritajiet imma qatt ma ngħataw il-permessi meħtieġa. Klabbs oħra, mill-banda l-oħra, ma ħadmux biex jiftħu l-istadium imma spiċċaw kisbu l-permessi li lanqas biss talbu.
Matthew Scerri
L-awtoritajiet tar-reġjun tal-Emilia Romagna ddeċidew li mil-lum l-istadiums jistgħu jiftħu l-bibien għall-pubbliku. Fl-istadiums ta’ dar-reġjun se jkunu jistgħu jilqgħu sa massimu ta’ 1000 supporter li jridu jsegwu regoli preċiżi sabiex ikun evitat kull tip ta’ riskju ta’ tixrid tal-Covid-19. Fi kliem ieħor elf supporter se jkunu jistgħu jassistu għal Parma-Napoli u Sassuolo-Cagliari.
Hu tassew sabiħ li s-supporters se jerġgħu jibdew deħlin fl-istadiums. Ħasra imma li l-go-ahead wasal biss ilbieraħ u allura l-klabbs jaf ma fadlilhomx iż-żmien jagħmlu dak kollu li hu meħtieġ. Barra minn hekk ninsabu rrabbjati li talba simili min-naħa ta’ Juventus ma ntlaqgħetx mill-Gvernatur tal-Piemonte. Juventus kienu ħejjew protokoll dettaljat ferm imma ma ngħatawx permess. Issa l-permess ħareġ għall-ħaddieħor li sa fejn nafu aħna ma kienx ħejja bl-istess mod. Ta’ min jgħid ukoll li ċ-CEO tal-Lega tas-Serie A, De Siervo sostna lbieraħ li din hi sitwazzjoni paradossali għax f’Lulju ngħata lill-Gvern Taljan dokument ta’ 300 paġna bil-protokoll u risk assessment għal kull stadium. S’issa l-awtoritajiet kienu prudenti, kif inhu xieraq, imma mhux sew li issa r-regoli se jibdew ikunu differenti f’kull reġjun. Ir-regoli għandhom ikun għal kulħadd l-istess!
Matthew Scerri
Ħarġu aktar dettalji dwar il-każ tal-pożittività għall-Covid-19 min-naħa ta’ De Laurentis u għal darb’oħra kellna l-konferma taċ-ċarlataniżmu li jirrenja fost il-Presidenti tas-Serie A. Fil-fatt De Laurentis kellu s-sintomi u għamel it-test qabel il-laqgħa tal-Lega tas-Serie A anki jekk ir-riżultat kien għadu ma ħariġx. Minkejja li ħassu ma jiflaħx, hu mar xorta waħda għall-imsemmija laqgħa u allegatament beda jgħid lill-persuni l-oħra li kien qed iħossu ħażin minħabba li kiel wisq frott tal-baħar. Hemm ritratti tiegħu jasal għal-laqgħa fejn lanqas biss kien liebes il-maskra (ara ritratt hawn fuq). Hemm filmati fejn juru li lanqas felaħ joħroġ mill-karozza tant kien magħdur. Issa grazzi għall-aġir irresponsabbli tiegħu kulmin attenda l-laqgħa, li kienu prinċipalment Presidenti tal-klabbs tas-Serie A, jinsabu kollha f’iżolament u jridu jagħmlu t-test. Dan hu l-istess bniedem li ftit tas-snin ilu għamel teatrin minħabba li l-poloz tal-kampjonat, skontu, ġew ħażin għal Napoli. Dan hu l-istess bniedem li ħassar Napoli-Juventus bl-iskuża tal-maltemp meta kien hemm ix-xita f’Napli, sempliċiment għax il-plejers kienu għajjiena wara partita kontra Bayern Munich. Dan hu l-bniedem li jixba’ jgħajjar u jimla ras is-supporters ta’ Napoli li nsterqulhom il-kampjonati. Ma kienx kapaċi jiddelega lil ħaddieħor li jirrappreżenta lil Napoli fil-laqgħa tal-Lega? Possibbli hu biss ma jafx li l-awtoritajiet tal-dinja kollha ilhom jagħtu l-parir li min iħossu ma jiflaħx ma jersaqx lejn nies oħra? Il-veru jmissu jistħi! Żgur li Napoli u l-futbol Taljan jixirqilhom ferm aħjar minn hekk!!
Matthew Scerri
Il-President ta’ Napoli, Aurelio De Laurentis instab pożittiv għall-Covid-19. L-aħbar hi konfermata direttament mill-klabb ta’ Napoli. L-iswab test sarlu peress li ħa sehem f’laqgħa tal-Lega Calcio. Issa wieħed irid jara jekk, waqt l-imsemmija laqgħa, hu għaddiex il-virus lil xi ħaddieħor.
Matthew Scerri