It-trasferiment ta’ Matthijs De Ligt ma’
Bayern Munich hu wieħed uffiċjali. Bayern ħallsu 67 miljun Ewro għalih. Ma’ fis-somma hemm 10 miljuni oħra f’bonuses. Juventus irreġistraw plusvalenze ta’ 30.7 miljun Ewro.
Matthew Scerri
Matthijs De Ligt jinsab il-Ġermanja fejn illum se jsirulu t-testijiet mediċi u wara jkun jista’ jiffirma l-kuntratt ma’ Bayern Munich. Qabel it-tluq tiegħu minn Turin, l-aġenta Rafaela Pimenta rringrazzjat lil Juventus għal kif ġabu ruħhom f’dal-każ. Illejla t-trasferiment ikun uffiċjali u nkunu nafu kemm se jdaħħlu Juventus minn dat-trasferiment.
Matthew Scerri
Matthijs De Ligt hu prattikament plejer ta’ Bayern Munich hekk kif il-klabb Ġermaniż għolla l-offerta tiegħu, liema offerta tissodisfa t-talba ta’ Juventus. Qed ikun irrapurtat li Juventus aċċettaw l-offerta l-ġdida mressqa minn Bayern Munich. Hemm ħafna spekulazzjonijiet dwar is-somma li Bayern se jkunu qed iħallsu għal De Ligt. Jidher li Juventus se jkunu qed idaħħlu somma madwar 80 miljun Ewro. Issa rridu naraw kif se jiżviluppaw l-affarijiet fil-jiem li ġejjin. L-interess, ovvjament, issa jdur fuq min se jkun jew ikunu l-plejers li se jieħdu post De Ligt ma’ Juventus.
Matthew Scerri
Min se jkun qed jilgħab flimkien ma’ Bonucci fiċ-ċentru tad-difiża ta’ Juventus? Din hi bħalissa l-ikbar mistoqsija tas-supporters Juventini. Koulibaly ingħaqad ma’ Chelsea u allura waħda mill-ħolmiet tas-supporters sfaxxat fix-xejn. Il-ħolma l-oħra għandha l-isem ta’ Bremer, imma f’dal-każ dejjem intqal li l-Brażiljan ilu miftiehem ma’ Inter. Qed jissemma ħafna Pau Torres ta’ Villareal għalkemm is-somma ta’ 50 miljun li qed tissemma tagħmel dat-trasferiment mhux wisq fattibbli. Intant fl-aħħar sigħat bħal donnu bdew jinbidlu l-affarijiet f’dak li għandu x’jaqsam ma’ De Ligt. L-offerta ta’ Bayern Munich għalih hi baxxa wisq u s’issa ma wrewx sinjali li lesti jgħollu l-offerta tagħhom sabiex jissodisfaw it-talba ta’ Juventus. Fid-dawl ta’ dis-sitwazzjoni beda jingħad li De Ligt jista’ jibqa’ ma’ Juventus u jiffirma kuntratt ġdid. Diffiċli bħalissa li wieħed ibassar x’se jiġri. Li hu żgur hu li llum nistgħu ngħidu li hemm inqas ċertezza minn ftit tal-jiem ilu li De Ligt se jitlaq lil Juventus.
Matthew Scerri
Iż-żjara ta’ Salihamidzic ilbieraħ f’Turin kienet waħda qasira u inkonklużiva. Milli nafu ma kienx hemm laqgħa formali bejn Salihamidzic u d-diriġenti ta’ Juventus. Kien hemm biss kuntatt informali, li hu t-tieni wieħed wara dak tal-ġimgħa li għaddiet fil-belt ta’ Milan. L-ewwel offerta ta’ Bayern hi ta’ 60 miljun (xi wħud qed isostnu li offrew 65 miljun) flimkien ma’ 8-10 miljuni f’bonuses. Il-Bianconeri jixtiequ jbigħuh għal 100 miljun komplessivament, somma li però s’issa la Bayern u lanqas Chelsea ma resqu lejha. Fl-istess ħin, però, hu ovvju li Juventus ma jridux jgħaġġlu bil-għan li jdaħħu kemm jistgħu minn fuq il-bejgħ ta’ De Ligt. Realistikament bħalissa l-aktar probabbli hu li jinstab ftehim ma’ xi klabb fuq bażi ta’ 80 miljun (il-parti fissa), ma’ liema somma jiżdiedu xi bonuses oħra. Intant qed ikun irrapurtat li De Ligt għarraf lil Juventus li hu jrid jingħaqad ma’ Bayern. Issa jmiss li Bayern u Juventus ikomplu jiddiskutu bejniethom sabiex jintlaħaq ftehim. Li hu ċert hu li Juventus ma jridux tpartit ta’ plejers. Minflok jippreferu somma cash biss ħalli jkunu jistgħu jinvestuha fl-akkwsit ta’ sostitut jew sostituti għall-Olandiż. L-ismijiet nafuhom: Bremer, Koulibaly, Milenkovic, Gabriel, Pau Torres u Kimpembe.
Matthew Scerri
Hasan Salihamidzic telaq lura l-Ġermanja wara li kellu laqgħa mal-aġent ta’ De Ligt, Rafaela Pimenta. Hi tinsab Turin minħabba t-trasferiment ta’ Pogba. Bayern Munich huma interessati ferm li jiksbuh u allegatament għandhom ftehim biex jagħtuh paga ta’ 12-il miljun fis-sena. Issa jonqos li jinstab verament ftehim ma’ Juventus. Illum ma jirriżultax li Salihamidzic tkellem ma’ Juventus u hemm għidut li l-laqgħa proprju bejn Bayern u Juve se ssir aktar tard dil-ġimgħa. Juventus qed jinsistu li jridu 100 miljun. Bayern, min-naħa tagħhom waslu sa 70 miljun bil-possibbiltà li jżidu xi bonuses għal somma globali ta’ bejn 80 u 90 miljun Ewro. Intant kemm qabel kif ukoll wara l-laqgħa ma’ Pimenta, Salihamidzic stqarr mal-ġurnalisti li hemm “ottimiżmu” min-naħa ta’ Bayern.
Matthew Scerri
Ftit tal-ħin ilu wasal Turin id-Direttur għall-iSports ta’ Bayern Munich, Hasan Salihamidzic. Hu se jkun qed jiltaqa’ ma’ Juventus u se jressaq l-ewwel offerta tal-klabb Ġermaniż għal De Ligt. L-għidut hu li De Ligt qed jagħti l-ewwel preferenza tiegħu lil Bayern Munich, li min-naħa tagħhom qed joffru allegatament 80 miljun Ewro flimkien ma’ 10 miljuni oħra f’bonuses.
Matthew Scerri
Ftit li xejn jidher li hemm tama li Matthijs De Ligt jibqa’ ma’ Juventus. Kliem Arrivabene ftit tal-jiem ilu, juri biċ-ċar li r-rieda ta’ De Ligt hi li jitlaq u jibda esperjenza ġdida ma’ klabb ieħor. Nafu li Chelsea jriduh u allegatament offrew 70-75 miljun Ewro flimkien ma’ 10 miljuni oħra f’bonuses. Fl-aħħar sigħat, mill-Ġermanja, ħarġet l-aħbar li anki Bayern Munich iridu lil De Ligt u lesti joffru 70 miljun flimkien ma’ Pavard. Il-pożizzjoni ta’ Juventus f’dan l-istadju hi li lesti jħalluh jitlaq biss jekk titħallas il-penali ta’ 120 miljun Ewro biex hi jkun jista’ jinħall mill-kuntratt tiegħu. Ħafna qed ibassru li Juventus lesti jikkunsidraw offerti ta’ 100 miljun Ewro cash jew ftit iktar. Taħt il-100 miljun, Juventus ma jridux jinżlu. F’das-sens il-fatt li hemm żewġ timijiet kbar li jridu jiksbu s-servizzi tiegħu, x’aktarx se jgħin biex l-offerti tal-klabbs lil Juventus jogħlew u jilħqu dak li qed jistennew il-Bianconeri.
Matthew Scerri
Maurizio Arrivabene ta intervista esklussiva lil Tuttosport fejn tkellem fit-tul dwar is-suq tat-trasferimenti ta’ Juventus. B’mod partikolari hu kellu l-opportunità li jagħti l-verżjoni tiegħu dwar Pogba, Dybala u De Ligt.
Skont Arrivabene, Juventus jinsabu f’taħdidiet ma’ Pogba u l-affarijiet sejrin tajjeb ferm. Dwar Dybala spjega li hu veru li kien hemm offerta ta’ erba’ snin lill-plejer (iċ-ċifra ma semmihiex), liema offerta kienet ġiet mgħoddija lill-aġent tal-plejer. Madankollu, imbagħad, Juventus għamlu kunsiderazzjonijiet ulterjuri li wassluhom biex iwaqqgħu dik l-offerta. Fakkar li f’Jannar l-affarijiet inbidlu drastikament wara li nkiseb Vlahovic.
Id-diriġent Juventin kellu l-opportunità li jitkellem dwar l-għidut li għandu x’jaqsam ma’ De Ligt. Fi kliem Arrivabene, illum hu impossibli li l-klabb iżomm plejer kontra r-rieda tiegħu. Tenna li fil-futbol tal-lum il-plejers jagħmlu biss dak li jgħidulhom l-aġenti. Skontu, f’sitwazzjonijiet bħal dawn hu importanti li t-tliet partijiet iqumu minn mal-mejda tat-taħdidiet kuntenti. Fi kliem ieħor irid jinstab ftehim li jkun konvenjenti għax-xerrej, għall-bejjiegħ u għall-plejer innifsu.
Matthew Scerri
Sorsi qrib il-klabb Juventin qed jikkonfermaw li bejn illum u għada Chelsea għandhom jiltaqgħu ma’ Juventus. Il-partijiet se jiddiskutu diversi plejers. Ovvjament l-‘piatto forte’ ma jistax jonqos li jkun De Ligt. Chelsea jriduh b’saħħa, għalkemm nafu li hemm interess min-naħa tagħhom anki f’Skriniar. Ir-rieda ta’ Juventus hi li jilħqu ftehim ma’ De Ligt biex jiffirma kuntratt ġdid għax iriduh ikun il-kolonna tad-difiża tagħhom u fl-istess ħin ma jridux jirriskjaw li jitilfu b’xejn sentejn oħra meta jintemmlu l-kuntratt attwali. Bħas-soltu se tkun ir-rieda tal-plejer li se tiddetermina l-futur tiegħu. De Ligt dan l-aħħar donnu bidel fehemtu u m’għadux daqshekk konvint li jibqa’ ma’ Juventus kif kien qed jistqarr sa ftit tal-ġimgħat ilu. Interessanti li dil-bidla min-naħa ta’ De Ligt waslet eżatt malli l-klabb ta’ Chelsea bidel is-sid tiegħu. Jekk hu se jkun irid jitlaq, Juventus mhux se jġegħluh jibqa’ għalkemm se jkunu qed jinsistu li titħallas il-penali ta’ 120 miljun Ewro biex hu jinħall mill-kuntratt. Probabbli, però, li jekk Chelsea joffru somma bejn 80 u 100 miljun, Juventus xorta waħda jkunu se jaċċettaw għax wara dis-sena l-prezz tiegħu jitbaxxa u jkun hemm riskju tassew kbir li jitlaq b’xejn żewġt isjuf oħra.
Matthew Scerri