Posts

Juventus barra mill-Conference League?

/in /by

Juventus lesti jaċċettaw li ma jiħdux sehem fil-Conference League fl-istaġun li jmiss. L-aħbar qed tingħata minn Tuttosport, li qed tirraporta kif grupp ta’ avukati u diriġenti Juventini jinsabu f’negozjati mal-Uefa biex tingħalaq il-kwistjoni tal-inkjesta dwar allegat ksur tat-termini tas-settlement agreement tal-2022. Kif nafu Juventus kienu aċċettaw is-settlement agreement propost lilhom mill-Uefa minħabba ksur tal-prinċipji tal-Fair Play Finanzjarju bejn l-2018 u l-2022. Is-settlement agreement għandu l-għan li Juventus jirregolarizzaw il-pożizzjoni tagħhom. Ftit tax-xhur ilu, malli ntemmet l-inkjesta ‘Prisma’ tal-Procura ta’ Turin, l-Uefa bdiet tindaga jekk l-accounts ippreżentati minn Juventus (li fuqhom ġie kkalkulat is-settlement agreement) kinux korretti. Kif wieħed jista’ jifhem, jekk jinstabu provi li l-accounts ta’ Juventus ma kinux veritjiera, is-settlement agreement jaqa’ (għax ikkalkulat fuq il-bażi tal-accounts żbaljati) u l-Uefa tista’ tieħu passi dixxiplinari fil-konfront tal-klabb.

Issa kif għidna Juventus qed jippruvaw jagħlqu l-kwistjoni mal-Uefa u jirriżulta li lesti li jibqgħu barra mill-kompetizzjonijiet Ewropej fl-2023/24. Jekk dan verament ikun il-każ, allura jkun ifisser li verament Juventus iridu jagħlqu tassew darba għal dejjem f’dan l-istaġun il-kwistjonijiet kollha li kellhom u li għandhom pendenti mal-Uefa u l-Figc. Il-patteġġament għalaq il-kwistjonijiet mal-Figc. Juventus jonqoshom issa jirranġaw l-affarijiet mal-Uefa u s-sena barra mill-kompetizzjonijiet Ewropej tidher li hi s-soluzzjoni.

Intant tajjeb ngħidu li lbieraħ il-logo ta’ Juventus tħalla barra mill-paġna tal-website tal-Uefa li fiha kien hemm imniżżla l-ismijiet tal-klabbs kollha li se jieħdu sehem fil-Conference League 2023/24. Mill-ewwel qamet polemika kbira fuq is-social media u wara ftit l-Uefa kkoreġiet l-iżball u spjegat li l-logo Juventin tħalla barra bi żvista. Issa rridu naraw x’se jiġri verament. Id-diriġenza attwali waslet verament biex ittemm xogħolha li taqla’ lit-tim mit-tempesta li daħal fiha.

Matthew Scerri

Id-Derby ta’ Turin. Ħarsa lejn il-konfronti tal-passat

/in /by

Nhar is-Sibt se jintlagħab id-Derby della Mole numru 202 fl-istorja. S’issa kellna 89 rebħa miksuba minn Juventus, 56 draw u 56 telfa. Komplessivament Juventus skurjaw 300 gowl fil-201 derbies li ntlagħbu s’issa, u qalgħu 238 gowl.

Jekk inħarsu lejn il-konfronti tas-Serie A biss, insibu li s’issa kien hemm 150 Derby, b’72 rebħa għal Juventus (kważi nofs il-partiti!), 43 draw u 35 rebħa għal Torino. Minn dal-150 partita, 75 intlagħbu b’Juventus bħala l-home team. Iktar minn nofshom intrebħu minn Juventus (39), b’20 draw u 16-il rebħa biss għal Torino. L-aħħar rebħa ta’ Torino f’Derby b’Juventus bħala home team tmur lura għas-sena 1995, jiġifieri 25 sena ilu! L-iktar plejer Juventin li lagħab fid-Derby ta’ Turin hu Scirea (13-il partita), filwaqt li Boniperti hu dak li skurja l-aktar (8 gowls).

Matthew Scerri

L-ewwel paġni tal-gazzetti Taljani (22 ta’ Novembru 2020)

/in /by

Qed inwasslulkom l-ewwel paġni tal-gazzetti Taljani tal-isports tal-lum it-22 ta’ Novembru 2020.

Id-data probabbli tas-Super Cup Taljana

/in /by

Il-gazzetta Il Mattino qed tbassar li l-Finali tas-Super Cup Taljana bejn Juventus u Napoli se tintlagħab fl-20 ta’ Jannar. S’issa l-Lega Calcio għadha ma ħabbret xejn dwar is-Super Cup. Li hu żgur hu li dis-sena l-partita mhux se tintlagħab barra l-pajjiż minħabba l-Covid. Probabbli li l-Finali se tintlagħab fl-Olimpico ta’ Ruma jew f’San Siro.

Matthew Scerri

McKennie fieq!

/in /by

Weston McKennie fieq mill-Covid-19. Hu ttestja negattiv fl-aħħar swab test li sarlu lbieraħ. L-aħbar tal-fejqan ta’ McKennie ngħatat direttament minn Juventus. Skont il-protokoll tal-FIGC, McKennie se jkun jista’ jilgħab għada kontra Verona. S’issa m’hemm l-ebda aħbar ġdida dwar Ronaldo u nifhmu li għadu pożittiv għax li kieku fieq, żgur kienet tingħata l-aħbar flimkien ma’ dik ta’ McKennie.

Matthew Scerri