Posts

It-Tim Juventin Matul iż-Żminijiet

/in , /by

– Iswed u Abjad (is-tminn parti)

  • ikompli mis-sebá parti

 

Kapitlu 5

Juventus 1975-2015

L-istorja ta’ Supporters Club inevitabbilment tintiseġ u timxi b’mod parallel ma’ dik tat-tim li dak il-klabb ikun jappoġġja. Kif rajna tul il-ktieb kollu hemm rabtiet profondi bejn il-ħajja tal-klabb u dak li kien qed jiġri fi ħdan it-tim. Qatt ma konna baħħara tal-bnazzi, anzi dejjem tajna l-appoġġ sħiħ f’kull mument u okkażjoni. Imma hu ovvju li, bħal kollox fil-ħajja, anki I-klabb tagħna għadda minn mumenti sbieħ u oħrajn koroh, u hu tassew interessanti li dan kollu kellu relazzjoni mill- qrib ma’ dak li kien qed iseħħ fit-tim Juventin. Għaldaqstant se nwasslulkom hawnhekk ftit tagħrif dwar it-tim Juventin fl- aħħar erbgħin sena, mingħajr ma nidħlu f’wisq dettall.

Tim mimli storja u faxxinu

Imwaqqaf fl-1897, il-klabb Juventin sa mis-snin tat-twaqqif tiegħu ħalla impatt fil-futbol Taljan u beda jikteb paġni mill- isbaħ li jagħmlu unur lil dawk kollu li b’xi mod jew ieħor kienu protagonisti ta’ din l-istorja Bianconera fil-grawnd u barra.

Konna u għadna sal-ġurnata ta’ llum l-uniku klabb Taljan li qatt rebaħ ħames kampjonati konsekuttivi fil-grawnd f’perjodu ta’ ħames snin (1930-35). F’kull epoka t-tim kien imżewwaq bi stilel ta’ fama mondjali. Juventus kienu anki l-ewwel klabb fl-Italja li kellhom plejers professjonali li jitħallsu biex jilagħbu. Il-familja Agnelli ħadmet bla waqfien biex il-klabb ikollu struttura amministrattiva mill-aktar moderna u nistgħu ngħidu li mil-lat amministrattiv żgur li dejjem wasalna qabel ħaddieħor f’diversi oqsma.

Is-snin Sebgħin raw lil Juventus protagonisti fl-Italja bir-rebħ tal-kampjonati kif kien fit-tradizzjoni tagħhom. Fl-1975 il- kowċ ta’ Juventus kien l-ex-plejer Carlo Parola li jibqa’ famuż fl-istorja tal-futbol Taljan għar-rovexxata li fuq ir-ritratt tagħha nhadem il-logo tal-istickers tal-Panini. Fl-1976, imbagħad, seħħet rivoluzzjoni kbira li ħalliet l-effett tagħha fid-dinja kollha. Il-President Boniperti ħatar lil Giovanni Trapattoni kowċ ta’ Juventus, kariga li dan tal-aħħar żamm għal għaxar snin sħaħ sal-1986 f’perjodu ta’ glorja assoluta meta Juventus rebħu l-kompetizzjonijiet kollha riservati għall-klabbs fl- Ewropa u fid-dinja.

Fl-ewwel sena tiegħu Trapattoni ma talabx rivoluzzjonijiet fit-tim. Bena tim li kien taħlita ta’ plejers ta’ esperjenza (Benetti u Boninsegna kienu l-akkwisti li ried Trapattoni) u talenti żgħażagħ (Scirea, Tardelli, Cuccureddu, Gentile u Cabrini). Kien żmien meta l-klabbs ma setgħux jirreġistraw plejers barranin u kollox kien fdat f’idejn it-Taljani. Nies bħal Zoff, Bettega u Furino kienu r-ruh tat-tim għall-importanza li kellhom fil-ground u barra biex jibnu rabtiet qawwija bejn il- plejers u jkun hemm it-team work tant meħtieġ biex jinkisbu r-riżultati. Is-suċċessi waslu mill-ewwel u l-istaġun 1976/77 ra lill-Bianconeri joħorġu rebbieħa fit-taqtigħa ma’ Torino għall- iscudetto (il-famużi 51 punt li għal żmien twil kienu rekord ta’ punti miksuba minn tim Taljan fis-Serie A). Fl-istess ħin Juventus waslu għall-unur fl-Ewropa: it-Tazza UEFA.

Hekk bdiet I-era ta’ Trapattoni, epoka li matulha kif għidna Juventus iddominaw fl-Italja (sitt kampjonati mirbuħa f’għaxar snin u Coppa Italia) u fl-Ewropa (it-tazzi kollha mirbuħa, inkluża t-Tazza Interkontinentali li għamlitna champions tad-dinja). Hemm wisq xi tgħid dwar dak it-tim formidabbli magħmul minn plejers Taljani u ftit stilel barranin bħal Liam Brady, Michel Platini, Zibi Boniek u Michael Laudrup (fis-Snin Tmenin il-klabbs Taljani setgħu jibdew jirreġistraw anki l-barranin).

Bosta plejers Taljani ta’ Juventus kienu jiffurmaw parti mit-tim nazzjonali li fl-1982 rebaħ it-Tazza tad-Dinja. Nies bħal Cabrini, Tardelli, Scirea, Gentile, Causio, Bettega, Rossi u ħafna oħrajn li libsu l-flokk Juventin f’dawk is-snin kienu fost l-aqwa plejers fid-dinja. Magħhom kien hemm ġenju tal-futbol, Michel Platini, rebbieħ ta’ tliet Blalen tad-Deheb konsekuttivi 1983/84/85. Onestament meta nħarsu lura jissorprendina dan it-tim għal dak kollu li rebaħ u jissorprendina aktar għal dak li seta’ jirbaħ fl-Ewropa u li ħarablu minn idejh fil-partita finali tat-Tazza taċ-Champions li tilef f’Ateni kontra Hamburg.

Kull bidu għandu tmiem, u anki l-era ta’ Trapattoni wara għaxar snin kellha l-epilogu tagħha. Wara s-sena trijonfali tal-1985 meta rbaħna s-Super Cup tal-Ewropa, it-Tazza taċ- Champions u t-Tazza Interkontinentali, Trapattoni beda jħoss li ċ-ċiklu tiegħu ma’ Juventus kien riesaq lejn tmiemu u ipprefera jwarrab sakemm it-tim kien għadu fil-glorja. II- plejers li ffurmaw dak it-tim formidabbli kienu qed jikbru u kienu resqin lejn l-aħħar fażi tal-karriera tagħhom. Kienu qed jonqsu l-motivazzjonijiet f’tim li rebaħ kollox u bdiet tinħass il- ħtieġa ta’ demm ġdid. L-istaġun 1985/86 kien l-aħħar wieħed bi Trapattoni bħala kowċ. Sellmilna bħal dejjem bil-kisba ta’ rebħiet: l-iscudetto u t-Tazza Interkontinentali. Sena biss wara kellna lil Platini jirtira mill-futbol u minn dak il-mument bdew disa’ snin fjakki għal Juventus.

Fid-disa’ snin bejn l-1986 u l-1995, Juventus qatt ma kienu tassew kompetittivi u naqsu milli jiġġieldu għar-rebħ tal- kampjonat. Ix-xena ġiet misruqa minn Milan li kellhom tim stellari u d-distakk bejn il-Bianconeri u r-Rossoneri kien tassew qawwi. Fl-1990 Juventus ippruvaw jagħtu direzzjoni ġdida lit-tim b’ Gigi Maifredi bħala kowć u l-akkwisti ta’ diversi plejers importanti, fosthom Roberto Baggio li kellu jifforma I-attakk ma’ Toto Schillaci u Pierluigi Casiraghi. Kien hemm stennija kbira għal dak it-tim u kulħadd kien qed jittama li jaslu r-riżultati, imma minflok kellna waħda mill-agħar snin fl-istorja ta’ Juventus. Ir-rivoluzzjoni kienet falliet u malajr Juventus marru lura għal bniedem tal-imgħoddi: Giovanni Trapattoni. Imma din id-darba Trapattoni ma rnexxilux jirbaħ wisq. F’dawn id-disa’ snin Juventus rebħu biss Coppa Italia u darbtejn it-Tazza UEFA, minkejja investimenti qawwija fi plejers bħal Baggio, Vialli, Möller, Kohler u oħrajn.

Ir-ritorn għar-rebħ beda fl-1994 bil-ħatra ta’ Moggi–Giraudo–Bettega biex imexxu l-istruttura amministrattiva u sportiva ta’ Juventus FC. Huma ġabu magħhom lil Marcello Lippi bħala kowċ. II-klabb ma kellux wisq flus x’jinvesti fil-mercato, imma xorta waħda Moggi ħadem bil-għaqal u rnexxielu jixtri nies bħal Ciro Ferrara, Paulo Sousa u Didier Deschamps. Id-distakk tekniku ma’ Milan kien jidher li għadu qawwi, imma Lippi rnexxielu jittrasmetti lit-tim mentalità rebbieħa. Vialli, Conte, Torricelli, Carrera, Di Livio u l-plejers l-oħra li kienu diġà fit-tim fis-snin ta’ qabel, issa dehru li saru plejers għal kollox ġodda. Juventus kienu jilagħbu futbol offensiv u spettakolari bl-attakk ikun kompost minn Baggio, Vialli u Ravanelli. Ma’ dawn żdied it-talent ta’ Alessandro Del Piero li proprju f’dik is-sena beda jilgħab regolarment fl-ewwel tim ta’ Juventus.

Kontra kull pronostiku Juventus reġgħu lura għar-rebħ billi kisbu l-iscudetto u l-Coppa Italia fl-ewwel staġun tal-era Lippi.

F’dik l-istess sena t-tim irnexxielu jasal sal-finali tat-Tazza UEFA, imma tilef kontra Parma.

L-era Lippi rat lil Juventus jagħmlu l-istess kisbiet fix-xena nazzjonali u internazzjonali tal-epoka meta l-iskwadra kienet immexxija minn Trapattoni. L-abbiltà tad-dirigenti kienet mifruxa f’kull qasam tat-tmexxija amministrattiva u sportiva. Minħabba kriżi finanzjarja li laqtet lill-klabb, kull sena kellha tinbiegħ xi stilla tat-tim u minflokha jinġieb jew isir użu minn xi talent żagħżugħ li kellu t-tim. Hekk, ngħidu aħna, fl-1995 inbigħ Roberto Baggio u Juventus ibbażaw it-tim fuq Del Piero. Snin wara ġie akkwistat Zinedine Zidane mingħand Bordeaux għal seba’ miljun euro. Zidane ma kienx għadu plejer famuż u kien hemm min kien qed jaħseb li Juventus żbaljaw meta ħaduh. Imma l-grawnd wera li Juventus għamlu l-għażla t-tajba tant li Zidane ftit snin wara rebaħ il-Ballun tad- Deheb u nbiegħ lil Real Madrid għas-somma fenomenali ta’ 75 miljun euro. Anki f’din l-okkażjoni Juventus biegħu l-istilla tat- tim u investew il-flus fl-akkwisti ta’ Buffon, Thuram u Nedved, bil-grawnd jagħtihom raġun għax saru kemm saru bidliet ta’ plejers, it-tim qatt ma waqaf jirbaħ. F’dawk is-snin rajna ma’ Juventus lil Vieri, Davids, Inzaghi, Montero, Pessotto, u aktar tard lil Zambrotta, Trezeguet, Cannavaro, Ibrahimovic, Vieira, Camoranesi, Emerson u ħafna oħrajn.

Fl-erba’ snin bejn l-1995 u l-1998, Juventus lagħbu erba’ finali tal-kompetizzjonijiet Ewropej: darba l-finali tat-Tazza UEFA u tliet darbiet il-finali taċ-Champions League. U erġajna sirna champions tad-dinja bir-rebħ tat-Tazza Interkontinentali. Hi tassew ħasra li dak it-tim Juventin formidabbli tilef ħafna finali tat-tazzi għax mingħajr ebda dubju kien l-aqwa tim fl- Ewropa u kien ħaqqu jirbaħ iċ-Champions League darbtejn oħra. Flimkien mar-riżultati sportivi kellna anki tmexxija amministrattiva mill-aqwa. It-tim kien jattira ħafna sponsors u Bettega, Giraudo u Moggi bdew joħolmu li Juventus jibnu stadium tagħhom. Kollox kien sejjer tajjeb f’dawk is-snin għajr għal ħaġa waħda: il-mewt ta’ Andrea Fortunato li xxukkjat lil kulħadd u qanqlet fil-partitarji sens kbir ta’ dieqa għal ġuvni li ħalla din id-dinja minħabba kumplikazzjonijiet marbuta mal- marda kiefra tal-lukiemja.

L-istess bħalma ġara lil Trapattoni, anki Lippi wara li rebaħ kollox beda jħoss li kien wasal iż-żmien li jitlaq lil Juventus u jibda avventura oħra x’imkien ieħor. Lippi ried jieħu f’idejh it-tmexxija ta’ Inter u fil-bidu tal-istaġun 1998/99 ftihem man-Neroazzurri li kien sejjer magħhom malli jiskadilu I-kuntratt ma’ Juventus fi tmiem dak l-istess staġun. L-aħbar saret magħrufa u ħarbtet mhux ftit lit-tim. Ir-riżultati bdew ikunu fjakki u Lippi tilef ir-riedni tal-iskwadra, tant li f’ċertu punt ma kellux triq oħra għajr li jirriżenja. Floku nħatar Ancelotti li ħadem tajjeb u f’sentejn mar qrib li jirbaħ żewġ kampjonati. Ix-xorti imma ma kenitx miegħu (u forsi mhux ix-xorti biss għax ma rridux ninsew x’gara fil-mishut Ħadd tal-partita kontra Perugia meta Juventus tilfu l-kampjonat wara li kellhom jilagħbu fi grawnd mgħarraq bl-ilma tax-xita). Bażikament tlifna żewġ kampjonati fl-aħħar ġurnata. Morna qrib ħafna li nsiru champions tal-Italja, imma dan ma kienx biżżejjed biex Juventus jikkonfermaw lil Ancelotti bħala kowċ. Ma kienx rebaħ u allura daret il-folja. It-tim kien mill-ġdid fdat f’idejn Marcello Lippi.

It-tieni epoka ta’ Lippi ma’ Juventus hi waħda rikka daqs I-ewwel waħda. Bdejna bir-rebħ tal-kampjonat meta kontra kull pronostku, fil-famuż “5 maggio“, qbiżna lil Inter fl-aħħar ġurnata tal-kampjonat. Bl-istess mod li Ancelotti kien tilef I-iscudetti fl-aħħar ġurnata, hekk dak il-kampjonat intrebaħ fl-aħħar partita. Sena biss wara, Juventus waslu sal-finali taċ- Champions, imma din id-darba Lippi ma irrepetix is-suċċess tal-1996. Fl-Old Trafford ta’ Manchester il-penalties ċaħduna minn rebħa mistħoqqa.

Mitmum it-tieni ċiklu ta’ Lippi, postu ttieħed minn ħadd ħlief Fabio Capello. L-għażla ta’ Capello saret minn Umberto Agnelli ftit qabel miet. Hu kien għażel suċċessur possibbli għal Lippi u fil-verità t-tim kompla jirbaħ fl-Italja. Capello kellu skwadra qawwija b’Nedved, Emerson, Cannavaro, Ibrahimovic, Zambrotta, Vieira, Camoranesi, Thuram, Trezeguet u Del Piero. Imma dak it-tim naqas milli jimpressjona fl-Ewropa fejn ir-riżultati kienu pjuttost deludenti.

Ix-xogħol ta’ Capello waqaf ħesrem fl-2006 meta faqqa’ l-iskandlu ta’ Calciopoli u Juventus sfaw relegati fis-Serie B. Minn hemm beda l-kalvarju ta’ Juventus li kellu jdum bosta snin. Ir-ritorn fis-Serie A kien immedjat, imma t-tim ma kienx attrezzat biex jirbaħ l-iscudetto. Inxtraw ħafna plejers mhux ta’ livell: Andrade, Felipe Melo, Diego, Thiago u Amauri, biex insemmu biss l-aktar każi magħrufa. Kienu snin li fihom konna naraw lil Juventus megħluba u spiss umiljati fil- logħob minn timijiet żgħar. Kemm-il darba sfajna barra mill- kompetizzjonijiet Ewropej.

Il-folja reġgħet nqalbet hekk kif mill-2011 Antonio Conte ħa f’idejh it-tmexxija tat-tim. Hu ħadem ħafna fuq il-mentalità tal-plejers u nissel fihom l-għatx għar-rebħ. F’daqqa waħda, fil-“Juventus Stadium” dehret skwadra l-oppost ta’ dik tas-snin post-calciopoli. Buffon, Barzagli, Bonucci, Chiellini, Marchisio, Pirlo, Vidal, Pepe, Vucinic u Del Piero, flimkien mal-bqija tal- iskwadra bdew jilagħbu futbol mill-isbaħ. Ix-xogħol ta’ Conte ssarraf mill-ewwel fi scudetto u f’finali tal-Coppa Italia (mitlufa kontra Napoli). Fis-snin ta’ wara żdiedu fit-tim nies bħal Pogba, Asamoah, Tevez, Giovinco u Llorente. Dawn komplew fuq ix-xogħol tal-ewwel sena u l-Juventus ta’ Conte spiċċat rebħet tliet kampjonati konsekuttivi bejn l-2012 u l-2014. Ma’ dawn it-tlieta żdied anki r-raba’ kampjonat fl-2015, imma din id-darba t-tim kien immexxi minn Massimiliano Allegri wara li Conte għażel li jitlaq minn idu t-tmexxija tat-tim. Fuq dan l-aħħar kampjonat se nitkellmu aktar fid-dettall fis-sezzjoni konklużiva ta’ dan il-kapitlu.

Rebbieħa tat-tazzi kollha tal-Ewropa

Juventus kienu l-ewwel tim li qatt rebaħ il-kompetizzjoniji Ewropea kollha għall-klabbs. Huma tassew ftit il-klabbs fid- dinja li jistgħu jiftaħru li għandhom it-tazzi kollha fil-mużew tagħhom. Interessanti li sal-1975 Juventus ma kienu għadhom għollew ebda tazza fl-Ewropa. Kienu waslu sal-finali tat-Tazza tal-Fieri fl-1965 u fl-1971 imma tilfuhom it-tnejn kontra Ferencvaros u Leeds United rispettivament. Fl-1973 Juventus b’sorpriża waslu sal-finali tat-Tazza taċ-Champions imma kellhom ibaxxu rashom quddiem il-qawwa ta’ Ajax. F’dik l-istess sena I-Bianconeri lagħbu fil-finali tat-Tazza Interkontinentali u għal darb’oħra ħarġu telliefa bl-iskor ta’ 1-0 kontra Independiente.

L-ewwel unur fl-Ewropa wasal fl-1977, sentejn wara t-twaqqif tal-klabb tagħna. It-tim kien immexxi għall-ewwel darba minn Giovanni Trapattoni u apparti li rnexxielu jirbaħ it-taqtigħa ma’ Torino fil-kampjonat, b’xorti tajba wasal ukoll sal-finali tat- Tazza UEFA. L-avversarji kienu Athletic Bilbao u l-finali kienet tintlagħab fuq żewġ partiti. L-ewwel waħda saret f’Turin bit- tim ta’ Trapattoni joħroġ rebbieħ bl-iskor ta’ 1-0, gowl ta’ Tardelli. Fil-partita ta’ ritorn fi Spanja, Juventus marru mill- ewwel fil-vantaġġ hekk kif Bettega sab ix-xibka b’daqqa ta’ ras. Immedjatament kien hemm reazzjoni qawwija mit-tim Spanjol li qaleb l-iskor favurih u rebaħ il-konfront bl-iskor ta’ 2-1. II-Bianconeri rebħu t-tazza bil-gowls away. Ta’ min isemmi li din kienet l-unika darba fl-istorja tal-kompetizzjonijiet Ewropej li t-tazza ntrebħet minn tim magħmul kompletament minn plejers Taljani.

Fl-1983 l-iskwadra fenomenali ta’ Juventus magħmula minn sitt plejers li rebħu t-Tazza tad-Dinja mal-Italja, flimkien ma’ Platini, Boniek u stilel oħra, kellha mixja trijonfali fit-Tazza taċ-Champions u għaxar snin wara l-finali kontra Ajax, il- Bianconeri kisbu d-dritt li jerġgħu jilagħbu l-finali. L-avversarji din id-darba kienu Hamburg, avversarji pjuttost modesti li ma setgħux ilaħħqu mal-qawwa tat-tim ta’ Trapattoni. Kulħadd kien qed ibassar ir-rebħ tat-tazza min-naħa ta’ Juventus. Ix- xorti riedet iżda li, kontra kull stennija, Hamburg marru fil- vantaġġ b’xutt ta’ Felix Magath minn barra l-kaxxa u l-plejers Bianconeri ma kellhomx is-saħħa jqumu fuq saqajhom biex idawru r-riżultat favurihom. Waslet għaldaqstant it-tieni telfa fil-finali tat-Tazza taċ-Champions.

Sena biss wara, Juventus rebħu t-tieni unur fl-Ewropa. Din id-darba kien imiss lit-Tazza tat-Tazzi. Il-mixja ta’ Juventus fil- kompetizzjoni reġgħet kienet bla rażan. Fil-finali sibna lil Porto bħala avversarji. Vignola fetaħ l-iskor b’azzjoni personali mill- isbaħ wara li rċieva l-ballun fit-tliet kwarti tal-grawnd, qabeż żewġ avversarji u xxuttja b’mod angulat minn barra l-kaxxa. Porto rnexxielhom jagħmlu l-iskor indaqs, imma mbagħad kien Boniek li ffirma l-gowl tar-rebħa meta rċieva I-ballun fil- kaxxa, niżżlu b’sidru u għeleb lill-goalkeeper avversarju b’xutt fil-baxx.

II-kisba tat-Tazza tat-Tazzi fethet it-triq għall-ewwel Super Cup tal-Ewropa li Juventus qatt lagħbu. Il-Bianconeri affrontaw lir- rebbieħa tat-Tazza taċ-Champions, Liverpool. Dakinhar tal- partita, is-16 ta’ Jannar 1985, il-“Comunale” kien miksi bis-silġ imma Boniperti għamel minn kollox biex il-pitch jiġi żgumbrat mis-silġ biex il-partita setgħet tintlagħab regolarment. L-iskor finali kien ta’ 2-0 favur it-tim ta’ Trapattoni b’Boniek jiskorja ż-żewġ goals Juventini.

F’dik l-istess sena tal-1985, Juventus u Liverpool reġgħu Itaqgħu fil-finali tat-Tazza taċ-Champions. Id-29 ta’ Mejju 1985 hi data li ebda Juventin qatt ma jista’ jinsa mhux biss għax Platini, Scirea u shabu rebħu t-Tazza taċ-Champions għall-ewwel darba fl-istorja ta’ Juventus, imma fuq kollox għall-fatti traġiċi u drammatiċi li seħħew qabel il-partita. Tkellimna fit-tul f’dan il-ktieb dwar it-traġedja tal-Heysel li ħalliet 39 persuna innocenti mejta. Dakinhar I-UEFA riedet li l-partita tintlaghab xorta waħda minkejja kollox u Juventus rebħu l-partita surreali b’penalty kontroversjali ta’ Platini.

Is-sena 1985 ingħalqet b’unur ieħor. Fit-8 ta’ Diċembru 1985 f’Tokyo Juventus, iċ-Champions Ewropej, lagħbu kontra r-rebbieħa tal-Amerika t’Isfel, Argentinos Juniors. II-Bianconeri reġgħu wrew il-qawwa tagħhom u kienu xi deċiżjonijiet kontroversjali ferm tar-referee li ma ippermettewx lit-tim ta’ Trapattoni li jirbaħ il-partita sad-disgħin minuta. Fost l-oħrajn dakinhar ir-referee ħassar wieħed mill-isbaħ gowls ta’ dejjem, gowl skorjat minn Michel Platini li wera quddiem id-dinja kollha t-talent infinit tiegħu. Bl-iskor finali ta’ 2-2, it-timijiet marru għall-penalties u hawn Tacconi kien il-protagonist tar- rebħa Bianconera billi laqa’ żewġ penalties. Il-ferħ kien kbir hekk kif mat-tieni penalty milqugħ Juventus saru champions tad-dinja. Barra minn hekk il-Bianconeri kienu saru l-ewwel klabb li qatt rebaħ kull kompetizzjoni Ewropea u mondjali għall-klabbs.

 

 

… ikompli

 

  • partijiet preċedenti
  1. Iswed u Abjad (l-ewwel parti)
  2. L-Ewwel Snin – Iswed u Abjad (t-tieni parti)
  3. Mil bidu sa nofs is-snin tmenin – Iswed u Abjad (it-tielet parti)
  4. Żewġ klabbs jingħaqdu f’familja waħda – Iswed u Abjad (ir-raba’ parti)
  5. Ilkoll kburin li aħna Juventini – Iswed u Abjad (il-ħames parti)
  6. L-iskwadra Juventina kollha fil-klabb tagħna – Iswed u Abjad (is-sitt parti)
  7. Rabta dejjem aktar sogħda má personalitajiet prominenti

Iswed u Abjad (l-ewwel parti)

/in /by

Ħbieb, kif tafu il-klabb maħbub tagħna miexi b’ħeffa u dedikazzjoni lejn tragward prestiġjuż u mistħoqq!

Infatti, fit-13 ta’April 2025 id-dar tagħna il-Juventini Maltin se tilħaq il-50 (ħamsin) sena Anniversarju mit-twaqqif tagħha.

Għalhekk qed inwasslulkom kopja tal-ktieb li kien ħareġ fl-2015 meta konna ċċelebrajna l-40 sena.

Din is-sensiela tal-ktieb “Iswed u Abjad” miktub minn Manwel Scerri u Matthew Scerri se tittella’ gradwalment f’partijiet matul iż-żmien.

Filwaqt li nispera li din l-inizzjattiva se tingħoġob minnkom, nħeġġukom issegwu dan is-sit biex tkun mgħarrfa rigward l-attivitajiet tal-klabb tagħna.

 

Pierre Bonavia

 

Iswed u Abjad

 

L-40 Anniversarju mit-Twaqqif tal-Juventus Club DOC Vero Amore (Malta 1975)

Manwel Scerri Matthew Scerri

Din l-ewwel edizzjoni 2015

 

Pubblikazzjoni Juventus Club DOC Vero Amore (Malta 1975) Triq Madre Maria Teresa Spinelli Birkirkara, Malta

Disinn tal-qoxra: William Micallef

Qari tal-provi: Albert Callus

Issettjar u Stampat: Print Right Ltd. Qormi

Juventus Club DOC Vero Amore (Malta 1975)

 

Il-jeddijiet tal-pubblikazzjoni huma miżmuma mill-Juventus Club DOC Vero Amore (Malta 1975). Dan il-ktieb qed jinbiegh bil- kundizzjoni li ma jistax jissellef, jerġa’ jinbiegh jew jingħata b’xejn f’xi għamla jew legatura oħra hlief kif inhu ippubblikat. Ma jista’ jsir ebda tibdil. Ebda silta minnu ma tista’ tkun ippubblikata jew maħruġa f’mod fotostatiku, elettroniku, mekkaniku, irrekordjat jew b’xi mod ieħor mingħajr il-permess tal-awturi u/jew tal-Kumitat tal-Juventus Club DOC Vero Amore (Malta 1975).

 

 

Dedikat

lil kulmin ta sehmu, b’tant dedikazzjoni, fit-twaqqif u fit-tmexxija tal-Juventus Club DOC Vero Amore (Malta 1975) f’dawn l-ewwel erbgħin sena ta’ ħajja tal-klabb.

Werrej

  • Kelmtejn ta’ introduzzjoni
  • Daħla
  • Prologu
  • Kapitlu 1 L-Ewwel snin 1975-1980
  • Kapitlu 2 -Snin Tmenin
  • Kapitlu 3 Snin Disghin
  • Kapitlu 4 ventus Club fis-Seklu XXI
  • Kapitlu 5 Juventus 1975-2015
  • Intervisti/1 Tony Dimech L-ewwel President
  • Intervisti/2 Mark Zammit, II-President li waqqaf il-Juventus Club Vero Amore fl-1997
  • Intervisti/3 Joseph Fenech – il-President attwali
  • Appendići 1 Lista tal-Presidenti kollha
  • Appendići 2 Kumitati 1975-2015

 

Kelmtejn ta’ introduzzjoni

 

Hu unur kbir għalija li qed nikteb dan il-messaġġ qasir ta’ introduzzjoni għall-ktieb Iswed u Abjad li jiġbor fih il-ġrajjiet tal-Juventus Club DOC Vero Amore (Malta 1975) mis-sena tat- twaqqif fl-1975 sal-2015. Wara li tkunu qrajtu dan il-ktieb, se tifhmu kemm il-klabb għandu storja rikka, kemm konnessjoni kellu u għandu mal-Juventus FC, kemm plejers leġġendarji żaru lill-pajjiżna, x’sehem kellu fl-avvenimenti ewlenin tat- tim Juventin. Tassew aħna klabb f’pajjiż żgħir imma bi storja kbira!

Il-Kumitat elett fis-sajf 2014 mill-ewwel beda jaħseb biex -erbgħin anniversarju mit-twaqqif tal-klabb ikun ċelebrat bl-aktar mod xieraq. Fassalna programm shih ta’ attivitajiet Iijfakkru u jfaħħru l-kisbiet kollha tal-klabb mill-1975 ‘il quddiem. Il-klabb modern u professjonali ta’ llum hu l-frott ta’ dak kollu li nżera’ minn ta’ qabilna bil-ħidma siewja, is- sagrifiċċji u l-passjoni tagħhom. Żgur li llum ma kienx jista’ jkollna dan il-klabb mingħajr ix-xogħol tal-fundaturi u ta’ dawk kollha li servew fil-Kumitat mal-milja tas-snin.

Punt għal qalbi ħafna li nixtieq nagħmel hu li l-klabb hu essenzjalment magħmul mill-membri, u hawn nixtieq nishaq dwar l-importanza li l-membri għandhom fil-ħajja tal-klabb. Din l-istorja tal-klabb hi qabelxejn l-istorja tagħna Ikoll li flimkien mal-membri tal-imgħoddi niffurmaw dan il-klabb. Nemmen li dan il-ktieb jiġbor fih l-istorja ta’ parti minn ħajjitna stess.

II-Kumitat preżenti hu impenjat u determinat mhux biss li jiċċelebra l-erbgħin anniversarju, imma jrid ukoll ipoġġi I-bażi għall-ġejjieni ħalli l-istorja tal-klabb tkompli. Nixtiequ qabelxejn nattiraw aktar membri lejn il-klabb għax kif ghidt il-klabb hu magħmul min-nies u għaldaqstant jeħtieġ lin-nies biex jibqa’ ħaj. Jien u shabi tal-Kumitat ninsabu konvinti li biex nattiraw il-membri ma rridux biss noffru servizzi tajbin, imma l-ewwelnett hu fundamentali li l-klabb jitmexxa b’mod ġust u trasparenti. Minn hawn inwiegħed li se naħdmu bla waqfien f’dan is-sens.

Fl-istess ħin ukoll qed naħdmu biex il-membri jkunu moqdija aħjar skont il-ħtiġiet ta’ llum. Se nibqgħu nirrappreżentaw I-interessi tal-membri speċjalment barra minn Malta. Fix- xena lokali m’aħna se nieqfu qatt norganizzaw attivitajiet

Qed ninvestu dejjem aktar fit-teknoloġija, tajna dehra grafika ġdida lis-sit elettroniku tal-klabb, saħħaħna l-preżenza tagħna fl-organi soċjali moderni biex kemm jista’ jkun inżommu kuntatt kontinwu mal-membri. Minbarra dan, qed inkomplu nsebbħu u nimmodernizzaw is-sede għax nixtiequ li l-Juventini Maltin u Għawdxin jibqgħu kburin b’dik li nittamaw li Ikoll iqisu d-dar tagħhom. Kif qed taraw, il-ħidma hi kbira u nixtieq li dan ikun il-legat li nhallu lil min se jiġi warajna.

Naghlaq billi niżżi ħajr minn qalbi lil shabi tal-Kumitat u lill- isponsors għall-appoġġ dejjiemi tagħhom. Nirringrazzja wkoll Manwel Scerri u lil Matthew Scerri li ħejjew u bnew dan il- tieb. Ringrazzjament speċjali jmur imbagħad għall-membri kollha li jibqgħu dejjem warajna u jgħinuna biex inżommu lill-klabb haj. Fl-aħħar, nirringrazzja u nesprimi l-gratitudni mimlija għożża kbira lil kulmin kien u/jew għadu parti mill- klabb. L-istorja hawn miġjuba inkitbet minnkom stess b’ittri tad-deheb.

 

Joseph Fenech

President

Juventus Club DOC Vero Amore (Malta 1975)

 

 

Daħla

Għalaqna 40 sena Storja ta’ mħabba vera

Inevitabbilment, kull anniversarju mhux biss mument ta’ ċelebrazzjoni, imma wkoll okkażjoni biex inħarsu lura lejn dak kollu li sar fl-imgħoddi u biex minnu nieħdu spunti biex inħarsu ‘l quddiem b’entużjażmu mġedded u b’konvinzjoni aktar qawwija ħalli titkompla l-ħidma tal-imgħoddi.
Dan il-ktieb hu l-istorja tal-Juventus Club DOC Vero Amore (Malta 1975) li proprju din is-sena, fl-2015, qed jiċċelebra l-40 anniversarju mit-twaqqif tiegħu. Hi l-istorja ta’ klabb, imma fuq kollox hi l-istorja ta’ dawk il-persuni li kitbu din l-istorja kemm permezz ta’ impenn dirett u attiv fil-Kumitat tal-klabb, kif billi ffurmaw parti mill-istess klabb tul medda twila ta’ snin. Kulħadd ta sehmu b’modi differenti, bil-kapaċitajiet tiegħu mpoġġija għad-dispożizzjoni tal-klabb. Nittamaw li dan il- ktieb jirnexxilu jicċelebra bl-aqwa mod possibbli l-imħabba vera (mhux ta’ b’xejn il-klabb jismu Vero Amore) li mexxiet u ggwidat lil kulmin resaq lejn dan il-klabb.

Inħossu li qabel xejn huwa dmir tagħna lkoll li nsemmu lill- pijunieri li poġġew l-ewwel ġebla u li kienu strumentali biex “welldu” l-Juventus Club f’pajjiżna. Dik il-ġenerazzjoni Ii 40 sena ilu hasset id-demm ‘Juventin’ jiġri fil-vini tagħha jimliha bil-kuraġġ, dedikazzjoni u sagrifiċċju. Huma emmnu b’konvinzjoni qawwija li pajjiżna wkoll kellu jifforma parti minn katina akbar tal-familja Juventina mxerrda fl-Italja u madwar id-dinja. Kellhom din il-ħolma u wettquha grazzi għall-imħabba u d-dedikazzjoni li poġġew f’ħidmiethom għall-ġid tal-Juventus Club DOC Vero Amore (Malta 1975).
Ħadmu u stinkaw, kemm fil-ferħ kif ukoll fid-diżappunt, biex mal-milja tas-snin, il-ġenerazzjoni ta’ llum tista’ tkun kburija li aħna mhux biss ħolqa minn din il-katina, iżda fuq kollox li maż-żmien sirna kolonna soda u li ma titkissirx fil-lealtà tagħna lejn il-kuluri Bianconeri.
Illum, li qed niċċelebraw 1-40 anniversarju mit-twaqqif tal- klabb Juventin f’pajjiżna, inħossu li nkunu qed nonqsu jekk ma nagħmlux dedika speċjali lill-pijunieri u l-membri li ma kellhomx ix-xorti li llum ikunu fostna biex jiċċelebraw magħna dan l-anniversarju. Konvinti li huma minn hemm fuq qegħdin isegwu b’sodisfazzjon kbir din ir-rikorrenza daqstant speċjali fl-istorja tal-klabb.

Bħal f’kull storja ohra, l-erbgħin sena tal-Juventus Club DOC Vero Amore (Malta 1975) hi magħmula minn waqtiet sbieħ u oħrajn koroh. Tul dawn is-snin, aħna l-partitarji Juventini fraħna u bkejna flimkien ma’ miljuni ta’ Juventini oħra fil-mixja kontinwa wara t-tim maħbub tagħna, il-Juventus. Fraħna meta l-Juve għamluna kburin bis-suċċess miksub, u bkejna meta sfortunatament għaddejna minn episodji drammatići li messew il-qlub Bianconeri u li qanqluna kemm mil-lat morali kif ukoll minn dak sportiv. Konna dejjem hemm maġenb it-tim tal-qalb tagħna, tajna l-appoġġ tagħna anki fl-ikreh żminijiet għax il-vero amore, I-imħabba vera, hekk titlob.

Fl-aħħar u mhux l-anqas, tislima u dedika jmorru wkoll għall-ġenerazzjoni Juventina ta’ llum li bl-istess passjoni u dedikazzjoni qed tkompli x-xogħol li nbeda fl-1975 u li tkompla bla waqfien f’dawn l-aħħar erbgħin sena. Dik il-ħolma ta’ nofs is-Snin Sebgħin għadha qed titwettaq bl-istess spirtu ta’ dejjem. Illum-il ġurnata, il-Club tagħna kiber mhux biss fl-istatura tiegħu bħala ‘d-dar’ fejn jilqa’ lill-Juventini f’kull okkażjoni, iżda wkoll kiseb b’mod inkundizzjonat ir- rikonoxximent, ir-rispett u l-ammirazzjoni barra minn xtutna, b’mod partikulari fi ħdan l-ambjent uffiċjali ta’ Juventus F.C.
Fuqna li llum qed immexxu b’mod l-aktar ghaqli u progressiv dan il-Club taqa’ r-responsabbiltà kbira li nħarsu u nindukraw bl-aktar mod sod, u li nikkonservaw b’dedikazzjoni u mħabba inkondizzjonata, dak kollu li b’tant xogħol u sagrifiċċji I-pijunieri u I-membri tagħna bnew biex il-Juventus Club f’pajjiżna kiber minn dak il-jum storiku tat-13 ta’ April 1975.

Ir-responsabbilità tgħaddi issa fuq il-ġenerazzjonijiet ta’ llum u ta’ għada biex il-Juventus Club DOC Vero Amore (Malta 1975) jinżamm ħaj u jkompli jaqdi I-missjoni tiegħu b’mod aggornat għall-ħtiġijiet taż-żminijiet ta’ llum u tas-snin li ġejjin. L-isbaħ xewqa li nistgħu nagħmlu lill-Juventus Club DOC Vero Amore (Malta 1975) hi li jibqa’ jkollu fi ħdanu persuni li jaħdmu b’fiduċja, b’kollaborazzjoni u b’enerģija sħiħa biex il-klabb Malti jkompli miexi ‘l quddiem, jikber u jissaħħah. II-vero amore, l-imħabba vera m’għandha tintemm qatt.

 

 

ikompli ….

Anniversarju: 29/5/1985 it-Traġedja tal-Heysel

/in /by

It-traġedja tal-Heysel, 29 ta’ Mejju, 1985
Finali Tazza taċ-Champions, Liverpool vs Juventus

Tajjeb li nġibu fil-qosor x’seħħ dakinhar tat-traġedja tal-Heysel . Siegħa qabel il-kick-off tal-Finali, grupp ta’ partitarji Ingliżi attakkaw lill-partitarji li kienu qed jokkupaw l-area newtrali, il-famuża Curva Z fl-istadium tal-Heysel. L-ispettaturi fil-Curva Z, fil-maġġor parti tagħhom Juventini, beżgħu u rtiraw lura mal-avvanz tal-hooligans Ingliżi iżda sabu ma’ wiċċhom il-ħajt tal-concrete tal-Curva. Qam pandemonju sħiħ, iġsma sfaw mgħaffġa minn sħabhom stess, partikularment dawk li kienu qrib il-ħajt, li eventwalment spiċċa ċeda.

Ħafna kienu li rnexxilhom jaqbżu fil-grawnd u salvaw, iżda 39 partitarju innoċenti kienu inqas ixxurtjati għax mietu mgħaffġa taħt is-saqajn ta’ persuni oħra mwerwra bħalhom filwaqt li 600 mija oħra sfaw midruba.

Il-logħba ntlagħbet wara bosta ħin fuq ordni tal-UEFA, minkejja li minxura mal-art barra l-grawnd kien hemm il-katavri Juventini bix-xalpi u l-bnadar suwed u bojod mdawra magħhom.

IN MEMORIAM- Biex qatt ma ninsew il-vittmi tal-Heysel

Balli Bruno, Alfons Bos, Casula Andrea, Casula Giovanni, Cerullo Nino, Chielens Willy, Conti Giuseppina, Danenecky Dirk, Fabbro Dionisio, Francois Jacques , Galiano Eugenio, Galli Francesco,  Gonnelli Giancarlo, Guarini Alberto, Lorentini Roberto, Lusci Barbara, Martelli Franco, Messore Loris, Mastroiaco Ganni, Mazzino Sergio, Papaluca Luciano, Pidone Luigi, Pistolato Benito, Radcliffe Patrick, Raganese Antonio, Robert Claude, Ronchi Mario, Russo Domenico, Salvi Tarcisio, Sarto Gianfrnco, Spanu Mario, Venturin Tarcisio, Walla Jean Michel u Zavaroni Claudio.

48 sena ilu twaqqaf il-Juventus Club (Malta)

/in /by

Illum qed niċċelebraw l-isbaħ u l-iktar anniversarju għal qalbna, dak tat-twaqqif tal-Juventus Club DOC Vero Amore (Malta 1975). Kien proprju fit-13 ta’ April 1975 li ssejħet l-ewwel Laqgħa Ġenerali tal-Club u dakinhar kien imwaqqaf uffiċjalment il-Club tagħna.

Ftit xhur qabel, preċiżament fit-8 ta’ Frar 1975, fil-gazzetta ‘Il-Ħajja’ deher avviż li permezz tiegħu l-Juventini kollha ta’ dawn il-gżejjer ġew mistiedna jingħaqdu u jerġgħu jagħtu ħajja ġdida lill-Club Nazionale Amici della Juve (Malta), li kien imwaqqaf f’Malta fl-1964 u li kien spiċċa fix-xejn ftit snin wara.

L-avviż tal-1975 kien sar minn Tony Dimech, illum wieħed mill-Presidenti Onorarji tal-Club, li fl-avviż stieden lil dawk kollha interessati b’dan il-kliem: “Il-partitarji kollha juventini li jixtiequ jsiru membri tal-Club Nazionale Amici della Juve (Malta) huma ġentilment mitluba jiktbu u jibagħtu 1c 5m f’bolol lil Tony Dimech, Barbara Bastion, il-Belt.”

L-inizjattiva ta’ Tony Dimech qanqlet mill-ġdid l-interess ta’ diversi Juventini Maltin, fosthom in-Nutar Cachia u Manwel Scerri. Huma bdew jiltaqgħu u jaraw kif setgħu jħejju għat-twaqqif tal-Club il-ġdid fuq bażi iktar sodi minn dawk tas-Snin Sittin.

Fis-16 ta’ Marzu 1975, fil-Każin tal-Banda La Vallette fil-Belt, saret laqgħa informali għal dawk kollha interessati f’din l-inizjattiva. Dakinhar inħatret Kummissjoni Speċjali bl-għan li tħejji l-preparattivi u s-sejħa għal-Laqgħa Ġenerali li fiha kellu jitwaqqaf uffiċjalment il-Club u jinħatar l-ewwel Kumitat Eżekuttiv li kellu jmexxi lill-Club.

Il-Kummissjoni sejħet l-ewwel Laqgħa Ġenerali fl-istorja tal-Club nhar il-Ħadd 13 ta’ April 1975 u għaliha kien preżenti 46 persuna. Għal darb’oħra intużat is-Sala tal-Każin La Vallette. Il-Laqgħa Ġenerali approvat it-twaqqif tal-Club bl-isem ta’ Juventus Club (Malta) fost entuzjażmu kbir ta’ dawk kollha preżenti.

Matul il-Laqgħa ġie wkoll elett l-ewwel Kumitat Eżekuttiv li mexxa lill-Club għas-sena 1975/76. In-Nutar Joseph Cachia bħala Chairman u s-Sinjuri Richard Muscat u Robert Caruana kienu magħżula biex imexxu l-elezzjoni. Immedjatament iċ-Chairman staqsa min fost il-membri preżenti xtaq jikkontesta l-elezzjoni. Kien hemm ħdax-il persuna interessata, fosthom anki mara (ħaġa mhux daqstant komuni għal dawk iż-żminijiet meta n-nisa ftit li xejn kienu jinteressaw ruħhom fil-futbol). Minn dawn kellhom jintgħażlu seba’ persuni biex jiffurmaw l-ewwel kumitat. Wara li ntlaqgħu n-nominazzjonijiet kollha, beda l-proċess tal-votazzjoni. Ir-riżultat tal-votazzjoni kien:

Riżultati tal-votazzjoni għall-Kumitat 1975/76
Tony Dimech 46 vot
Manwel Scerri 42 vot
Joseph Aloisio 40 vot
Carmelo Vella 38 vot
Albert Callus 36 vot
Charles Galea 28 vot
Publius Vassallo 22 vot
Joe Attard u Josephine Galea 20 vot
Mario Troisi 14-il vot
Lino Bonello 10 voti

Bil-qari tar-riżultat tal-votazzjoni, saru magħrufa l-ismijiet tal-ewwel seba’ eletti li ffurmaw l-ewwel Kumitat Eżekuttiv fl-istorja tal-club li kellu jservi għall-perjodu ta’ sena 1975/76.

Fi tmiem il-laqgħa, in-Nutar Joseph Cachia u s-Sur Franco Facchetti (illum t-tnejn mejta) kienu unanimament maħtura l-ewwel Presidenti Onorarji fl-istorja tal-Club bħala rikonoxximent għall-ħidma, il-kollaborazzjoni u l-għajnuna bla qies li taw biex setgħet tibda t-triq twila iżda glorjuża tal-Juventus Club (Malta).

Minn dakinhar għaddew 48 sena. Tmienja u erbgħin sena ta’ storja rikka immens, snin ta’ ħbiberija u għaqda li dejjem irrenjat fil-Club tagħna, snin ta’ imħabba inkundizzjonata lejn it-tim Juventin. Illum ninsabu kburin immens li l-Club wasal għal dan l-anniversarju u ninsabu konvinti li għad fadallu ħafna paġni sbieħ x’jikteb.

Matthew Scerri u Manwel Scerri

Sittax-il sena mill-mewt ta’ Ale & Ricky

/in /by

Illum jaħbat is-sittax-il anniversarju mit-traġedja li fiha ħallew ħajjithom Riccardo Neri u Alessio Ferramosca. Iż-żewġ plejers tat-tim ‘Berretti’ ta’ Juventus kienu mietu proprju fil-15 ta’ Diċembru 2006 fit-training grounds ta’ Vinovo wara li waqgħu fi speċi ta’ lag artifiċjali, jew ġiebja kbira jekk irridu, li fiha jinħażen l-ilma li jservi biex jissaqqa l-ħaxix tal-grawnds f’Vinovo. Huma kienu marru jiġbru xi blalen li waqgħu fil-lag u bi żball spiċċaw fl-ilma huma wkoll. Il-kesħa qawwija ta’ dakinhar wasslet biex mietu mill-ewwel.

Jien, flimkien ma’ Manwel Scerri, dakinhar kont f’Vinovo waqt il-ħin tat-traġedja. Konna qed nirrappreżentaw lill-Club tagħna fid-DOC Day organizzata proprju f’Vinovo. Niftakar kesħa qawwija. Niftakar kemm konna bqajna sorpriżi meta rajna lill-bugħaddasa deħlin fil-faċilitajiet ta’ Turin. Ħadd ma kien jaf b’xejn sa dak il-ħin. L-aħbar kienet għadha ma ħarġitx. Imbagħad tlaqna lejn l-iStadio Olimpico fejn kellha tintlagħab Juventus-Cesena u malli wasalna smajna li l-partita tħassret b’rispett lejn il-vittmi.

Ale & Ricky jgħixu għal dejjem f’qalbna!

Matthew Scerri

Happy birthday, Juventus!

/in /by

Illum jaħbat il-125-il anniversarju mit-twaqqif ta’ Juventus F.C. Tradizzjonalment id-data tal-1 ta’ Novembru 1897 hi meqjusa bħala l-jum li fih twaqqaf il-klabb Juventin minn grupp ta’ ħbieb li kienu jattendu l-Liceo Massimo D’Azeglio f’Turin. Nafu li dawn il-ħbieb kienu ilhom jiltaqgħu u jipprattikaw flimkien diversi tipi ta’ sports, fosthom anki l-futbol li ddaħħal fl-Italja proprju minn xi nies minn Turin li kienu marru jgħixu u jaħdmu l-Ingilterra ftit tas-snin qabel. Fl-1897, l-istudenti tal-Liceo Massimo D’Azeglio, flimkien mal-aħwa Canfari u xi ħbieb oħra, waqqfu uffiċjalment il-Juventus Sports Club, li biż-żmien sar il-Juventus Football Club.

Matthew Scerri

Anniversarju: 2/10/1935 twieled Omar Sivori

/in /by

Omar Sivori, imlaqqam “El Cabezon” għax-xagħar goff li kellu, hu mingħajr dubju wieħed mill-aqwa plejers li qatt libes il-flokk ta’ Juventus. Twieled fl-Arġentina fit-2 ta’ Ottubru 1935. Komplessivament hu skorja 167 gowl f’253 partita ma’ Juventus u fl-1961 rebaħ il-Ballun tad-Deheb. Flimkien ma’ Silvio Piola għandu r-rekord tal-ikbar numru ta’ gowls skurjati f’partita waħda fis-Serie A. Fil-fatt fl-10 ta’ Ġunju 1961 hu skorja 6 gowls kontra Inter fir-rebħa storika ta’ 9-1.

Il-filmat t’hawn taħt fih profil dettaljat dwar Sivori.

Anniversarju: 3/9/1989 ħalliena Gaetano Scirea

/in /by

Illum jaħbat l-anniversarju tal-mewt ta’ wieħed mill-akbar plejers Juventini ta’ dejjem: Gaetano Scirea. Hu libes il-flokk ta’ Juventus għal erbatax-il staġun bejn l-1974 u l-1988 b’total ta’ 552 partita u 32 gowl. Ma’ Juventus, Scirea rebaħ kull kompetizzjoni u sar anki champion tad-dinja mal-Italja fl-1982. Scirea jibqa’ f’qalb is-supporters Bianconeri mhux biss għat-teknika kbira u l-intelligenza tattika li kellu, imma fuq kollox għall-mod sinjorili, ġentili u korrett li dejjem mexa bih ġewwa u barra l-grawnd.

Il-filmat t’hawn taħt ifakkarna ftit min kien Scirea:

Matthew Scerri

Anniversarju: 11 ta’ Lulju 1982 l-Italja tirbaħ it-Tazza tad-Dinja

/in /by

11 ta’ Lulju 1982 l-Italja rebħet it-Tazza tad-Dinja għat-tielet darba fl-istorja. Fil-filmat t’hawn taħt tistgħu taraw il-finali bejn Italja u Ġermanja.

Anniversarju 31/5/2009 Nedved jirtira mill-futbol

/in /by

Bħal-lum 13-il sena Pavel Nedved lagħab l-aħħar partita tiegħu bil-flokk ta’ Juventus u b’mod ġenerali waqaf mill-karriera tiegħu ta’ plejer. Komplessivament lagħab 8 staġuni ma’ Juventus b’total ta’ 327 partita u 65 gol. Fi tmien snin rebaħ 4 scudetti. Hi opinjoni ta’ kulħadd li Juventus tilfu l-Finali taċ-Champions League fl-2003 għax Nedved kien sospiż. Dik is-sena Nedved kien l-aqwa plejer fl-Ewropa tant li rebaħ il-Ballun tad-Deheb. Hu minn dejjem ħabb lil Juventus u saħansitra niżel magħna fis-Serie B. Lejn tmiem il-karriera kellu l-opportunità li jingħaqad ma’ Inter, biss hu għażel li ma jmurx magħhom għax kif spjega: “Jien Juventin. Tlift il-flus ta’ Inter, imma żammejt id-dinjità tiegħi.”

L-aħħar partita fil-karriera tiegħu kienet Juventus-Lazio tal-31 ta’ Mejju 2009. Id-destin ried li hu jirtira fi tmiem partita bejn iż-żewġ timijiet li lagħab magħhom fl-Italja. Dakinhar tal-31 ta’ Mejju s-supporters ta’ Juventus sellmulu bl-iktar mod xieraq. Il-video t’hawn taħt jurina x’ġara dakinhar. Barra minn hekk għandkom żewġ videos oħra biex niftakru minn kien Pavel Nedved:

Matthew Scerri