Posts

Id-dettalji tal-ftehim bejn Juventus u Atalanta għal Demiral

/in /by

Juventus ħabbru b’mod uffiċjali d-dettalji tal-ftehim li permezz tiegħu Atalanta xtraw lil Merih Demiral għal kollox. Kif maqbul bejn il-klabbs sena ilu, Atalanta kisbu lil Demiral għas-somma ta’ 20 miljun Ewro, liema somma se titħallas f’erba’ rati. Ma’ dis-somma jistgħu eventwalment jiżdiedu performance bonuses sa massimu ta’ 2.5 miljun Ewro Barra minn hekk Juventus se jkollhom id-dritt li jdaħħlu 10% tas-somma komplessiva tal-bejgħ ta’ Demiral minn Atalanta lil xi klabb ieħor.

Matthew Scerri

Juventus għadhom ma ressqu ebda offerta għal Kostic

/in /by

Qed ikun hemm diversi rapporti li Juventus għandhom ftehim biex jiksbu lill-midfielder mal-linja xellugija ta’ Eintracht Frankfurt, Kostic. Hu qed ikun indikat bħala s-sostitut ta’ Bernardeschi fit-tim ta’ Allegri. Minkejja l-ħafna għidut li kien hemm fl-aħħar jiem, s’issa jirriżulta li Juventus għadhom ma ressqu ebda offerta għal Kostic. Fuqu hemm interess qawwi minn Inter, li ilhom ħafna f’negozjati mal-aġent tiegħu, u Roma.

Matthew Scerri

De Ligt mistenni jiffirma kuntratt ġdid ma’ Juventus

/in /by

Matthijs De Ligt wisq probabbli se jkun qed jiffirma kuntratt ġdid ma’ Juventus das-sajf. L-aġenti tal-Olandiż jinsabu f’taħdidiet ma’ Juventus. Qed ikun irrapurtat li l-partijiet għandhom ftehim bejniethom dwar il-kuntratt il-ġdid. L-uniku punt li għad irid jinstab qbil dwaru hu marbut mal-klawżola fil-kuntratt li permezz tagħha De Ligt ikun jista’ jinħall mill-kuntratt ma’ Juventus. Fil-kuntratt attwali dil-klawżola teżisti u hemm marbut magħhom il-ħlas ta’ penali li tammonta għal 125 miljun Ewro. De Ligt qed jitlob li dil-klawżola tibqa’ imma jonqos il-valur tagħha. Qed jissemma li l-aġenti tiegħu talbu li l-penali tinżel għal 80 miljun. Juventus għalissa qed jaħsbuha. Kollox jindika imma l-ftehim mhux se jdum ma’ jinstab mal-aġenti ta’ De Ligt.

Matthew Scerri

L-aħbarijiet mis-suq tat-trasferimenti (24 ta’ Mejju)

/in /by

Is-suq tat-trasferiment qed ikompli jiddomina l-gazzetti, il-website u l-programmi tat-televixin. Dan li ġej hu dak li laqatna matul il-ġurnata tal-lum.

Morata – L-Ispanjol dejjem stqarr li jqis lil Juventus il-familja tiegħu. Nafu li Juventus lesti jżommuh imma mhux se jonfqu l-35 miljun li kienu parti mill-ftehim ma’ Atletico Madrid sentejn ilu. Nafu wkoll li l-istrateġija ta’ Juventus hi li jkomplu jinnegozjaw ma’ Atletico bit-tama li jinżlu mill-prezz għal Morata. Jidher, però, li l-aġent ta’ Morata għadu jitkellem ma’ Barcellona, klabb li f’Jannar kien qrib ħafna li jikseb il-firma ta’ Morata. L-attakkant Spanjol lest imur jilgħab ma’ Barcellona u Atletico Madrid jistgħu jikkuntentawh anki minħabba l-fatt li l-klabbs Spanjoli għad iridu jissetiljaw kollox bejniethom għal Griezmann.

Koulibaly – Fl-aħħar jiem issemma b’ċerta insistenza Koulibaly ma’ Juventus. Kien hemm rapporti, mhux konfermati, li l-aġent tiegħu tkellem ma’ Juventus wara li kellu kuntatti ma’ Barcellona fix-xhur li għaddew. Koulibaly irrifjuta l-offerta ta’ Napoli għall-kuntratt il-ġdid. Il-kuntratt attwali tiegħu jiskadi s-sena d-dieħla u l-għidut hu li Napoli lesti jbigħuh das-sajf għal somma ta’ bejn 30 u 35 miljun Ewro.

Rabiot – Adrien Rabiot spiċċa fil-mira ta’ Chelsea. Il-prezz li qed jitolbu Juventus għalih hu ta’ bejn 15 u 20 miljun Ewro. I-Bianconeri x’aktarx se jkunu lesti jħallu lil Rabiot jitlaq f’każ li taslilhom offerta tajba.

Miretti, Ranocchia u Fagioli – X’se jkun il-futbol ta’ Miretti, Ranocchia u Fagioli s’issa għadu mhux magħrud b’mod uffiċjali. Ix-xnigħat tal-lum huma li Miretti se jibqa’ ma’ Juventus, filwaqt li Ranocchia u Fagioli se jkunu misluf lil xi tim tas-Serie A. Għal Ranocchia qed jissemma interess min-naħa ta’ Udinese. Fagioli spiss issemma ma’ Lazio, biss Juventus x’aktarx jippreferu jisilfuh lil xi tim inqas ikkwotat. Se jkun interessanti naraw kif se jaħdmu l-klabbs wara l-bidliet fir-regolamenti dwar is-self ta’ plejers.

Full-backs – Kulħadd irid li Juventus isibu full-backs ġodda, l-aktar mal-linja x-xellugija fejn Alex Sandro ilu jiddeludi. Spiss issemmew il-full-backs ta’ Udinese, Molina u Udogie. Illum La Stampa qed tirraporta li Juventus jinsabu qrib li jiffinalizzaw l-akkwist ta’ Raoul Bellanova mingħand Cagliari.

Matthew Scerri

Atalanta mistennija jixtru lil Demiral

/in /by

Merih Demiral wisq probabbli mhux se jkun qed jirritorna ma’ Juventus das-sajf. Wara l-aħħar partita ta’ Atalanta, Demiral kiteb fuq is-social media messaġġ li bih sellem lis-supporters tat-tim tiegħu. Ħafna ħasbu li dan kien ifisser li Atalanta ma kinux se jixtru lil Demiral għal kollox u kienu se jibagħtuh lura ma’ Juventus. Madankollu jidher li dan mhuwiex il-każ. Fil-fatt kollox jindika li Atalanta se jixtru għal kollox mingħand Juventus biex imbagħad ibigħuh mill-ewwel das-sajf stess lil xi tim ieħor.

Matthew Scerri

L-attenzjoni ddur fuq is-suq tat-trasferimenti. Mistennija bidliet radikali fi ħdan it-tim Juventin

/in /by

Hekk kif il-kampjonat u l-istaġun waslu fi tmiemhom, l-attenzjoni se ddur għal kollox fuq is-suq tat-trasferimenti. Juventus jidhru li qed jaħdmu bla waqfien biex ikun hemm bidla radikali fi ħdan it-tim. Diversi plejers mistennija jitilqu lil Juventus u minflokhom se jinkisbu plejers oħra. It-tir hu li Allegri jkollu tim iktar kompetittiv b’taħlita ta’ plejers maturi u ta’ esperjenza, flimkien ma’ talenti żgħażagħ.

S’issa nafu li Chiellini għażel li ma jkomplix jilgħab għal Juventus. Dybala u Bernardeschi se jitilqu b’għażla ta’ Juventus li ma ġeddewlhomx il-kuntratti tagħhom. Apparti dawn l-aħbarijiet uffiċjali, smajna ħafna għidut li Juventus ma jridux iżommu iktar lil Kean, Arthur, Alex Sandro, Rugani u Ramsey. Mhux faċli, però, li ssib tim lest joħodhom minħabba l-pagi tagħhom u anki għall-fatt li ġejjin minn wirjiet ferm deludenti. Morata, mill-banda l-oħra, hu plejer li Allegri jixtieq iżomm imma Juventus ma jridux iħallsu l-35 miljun Ewro li skont il-ftehim ta’ sentejn ilu l-Bianconeri għandhom iħallsu biex jixtru lill-iSpanjol għal kollox. L-indikazzjonijiet huma li Juventus se joffru 15-il miljun Ewro lil Atletico Madrid għal Morata, biss l-Ispanjoli għalissa ma jidhrux disposti jinżlu inqas minn 25 miljun.

Mhux ċert il-futur ta’ Rabiot, Pellegrini u McKennie. It-tlieta li huma jistgħu jibqgħu ma’ Juventus anki s-sena d-dieħla, biss jekk tasal offerta tajba għalihom, Juventus x’aktarx ikunu lesti li jbigħuhom. Mhux magħruf anki x’se tkun l-istrateġija ta’ Juventus dwar Rovella, Miretti, Fagioli u Ranocchia. Diffiċli li jibqgħu kollha ma’ Juventus, imma mhux eskluż li xi ħadd minnhom jingħata l-opportunità li jkun parti mit-tim ta’ Allegri.

Niġu issa għall-akkwisti l-ġodda. Qed jissemmew b’saħħa tliet plejers li għandhom il-kuntratt li se jiskadi ftit tal-ġimgħat oħra mat-timijiet rispettivi: Di Maria, Pogba u Perisic. Skont il-gazzetti u l-websites tal-futbol, Di Maria u Pogba diġà aċċettaw l-offerta li saritilhom minn Juventus. S’issa, però, m’hemm ebda firma fuq xi kuntratt u allura mhux eskluż li jista’ jkun hemm xi u-turn mill-plejers inkwistjoni. Perisic ukoll jidher qrib li jingħaqad ma’ Juventus, għalkemm il-partijiet għadhom jiddiskutu d-dettalji tal-ftehim. Fid-difiża qed jissemma bdil bejn Acerbi u Rugani. Barra minn hekk Atalanta x’aktarx mhux se jixtru għal kollox lil Demiral u allura probabbli li Juventus se jkunu jistgħu jżommu flimkien ma’ Gatti li nxtara f’Jannar.

Matthew Scerri

Calciomercato mill-passat. L-akkwist ta’ Pietro Anastasi

/in /by

Fix-xhur tas-sajf il-Calciomercato letteralment jiddomina x-xena sportiva. Nixtiequ nibdew serje ta’ artikli dwar xi akkwisti ċelebri li saru fil-passat. Se nibdew din is-serje b’Pietro Anastasi.

Kien l-1968 u l-kampjonat intemm kmieni ħafna minħabba l-Euro. It-timijiet tas-Serie A għaldaqstant bdew jorganizzaw diversi partiti ta’ ħbiberija. Fit-18 ta’ mejju f’San Siro, Inter lagħbu kontra Roma. In-Nerazzurri kellhom magħhom b’self mingħand Varese lil Pietro Anastasi.
Kollox kien jindika li Inter kellhom ftehim ma’ Varese biex jixtru lil Anastasi għas-sena ta’ wara. L-affarijiet però marru b’mod differenti minħabba rabtiet kummerċjali. Fil-fatt il-President ta’ Varese kien Borghu, sid il-kumpanija Ignis. Dik il-ħabta l-Ignis kellhom bżonn ammont kbir ta’ kumpressuri peress li l-affarijiet kienu sejrin tajjeb ferm għalihom u kellhom żidiet kbar fil-bejgħ. Il-President ta’ Juventus, Vittore Catella kien jaf dan u offrilu l-kumpressuri tal-FIAT bi prezz favorevoli. Għal dan il-pjaċir, Juventus kisbu lil Anastasi minkejja li Varese kellhom ftehim ma’ Inter.

Matthew Scerri

Sassuolo lesti jitkellmu ma’ Juventus dwar Raspadori

/in /by

L-għidut hu li Juventus għandhom fil-pjanijiet tagħhom li jixtru lil Raspadori mingħand Sassuolo sabiex jieħu post Dybala. Dwar dan kollu tkellem iċ-CEO ta’ Sassuolo, Giovanni Carnevali. Dan hu dak li qal:

“Ma’ Juventus diġà kellna t-trasferiment ta’ Locatelli. Jekk ikun hemm l-opportunità ta’ aktar trasferimenti, inkunu kuntenti. F’Jannar klabb Ingliż talabulna spiss, iżda għalina hu plejer fondamentali.”

Matthew Scerri

Juventus qed jagħżlu li ma jġeddux il-kuntratt ta’ Dybala?

/in /by

Juventus u Paulo Dybala jidhru dejjem imbegħdin minn xulxin. Dil-ġimgħa Juventus kellhom ikollhom laqgħa mal-aġent Jorge Antun, biss id-diriġenza Bianconera allegatament ħassret il-laqgħa u mexxietha għal wara l-partita kontra Villareal. F’dan l-istadju kollox qisu qed jindika li Juventus ma jridux iġeddu l-kuntratt ta’ Dybala. Nafu li ftit qabel il-Milied Dybala kien lest jaċċetta l-proposta ta’ Juventus. Imbagħad, però, Juventus bidlu fehemthom u baxxew l-offerta tagħhom. Ovvjament Dybala ħa għalih. Issa dak li nqala’ dil-ġimgħa qed jidher bħala konferma oħra ta’ kemm Juventus huma xettiċi li jġeddu l-kuntratt ta’ Dybala. L-Arġentin qed ikollu wisq injuries u Juventus qed ikollhom jgħaddu mingħajru parti kbira mill-istaġun. Barra minn hekk qed jissemma li l-Bianconeri f’dan l-istadju qed jippreferu jixtru lil Raspadori minflok iġeddu l-kuntratt ta’ Dybala. Dwar il-kontribut ta’ Dybala lit-tim ma tantx hemm wisq x’tgħid għax l-affarijiet qegħdin quddiem għajnejn kulħadd. Il-kwistjoni kollha tibqa’, però, kemm hi għaqlija l-għażla ta’ Juventus li jitilfu b’xejn lil Dybala tliet xhur oħra.
Matthew Scerri

Chelsea f’diffikultà enormi. Emerson u Jorginho msemmija ma’ Juventus

/in /by

Chelsea għaddejjin minn mument tassew diffiċli hemm kif l-awtoritajiet tar-Renju Unit qed jieħdu passi drastiċi fil-konfront ta’ Roman Abramovic u ta’ ħafna biljunarji Russi li jgħixu fl-Ingilterra. L-assi ta’ Abramovic jinsabu ffriżati u ovvjament hemm riperkussjonijiet kbar anki fuq Chelsea hekk kif sar magħruf li l-bank Barclays bblokkja saħansitra l-kont ta’ Chelsea. Kellu rapporti li minħabba l-miżuri l-klabb ta’ Chelsea bħalissa lanqas jista’ jinbigħ u saħansitra l-klabb lanqas biss ibigħ il-biljetti tal-partiti. Is-sitwazzjoni, għaldaqstant, tant hi mwiegħra li hemm periklu kbir li Chelsea qed jirriskjaw il-falliment. Bħalissa għaddejjin spekulazzjonijiet kbar li l-plejers ta’ Chelsea se jkunu mingħajr kuntratt minn hawn u ftit tax-xhur oħra minħabba l-qagħda tal-klabb. Juventus huma interessati f’Emerson Palmieri u Jorginho. Plejers oħra ta’ Chelsea għandhom pagi fenomentali li Juventus ma jaffordjawx. Nafu, però, li ż-żewġ plejers Taljani ilhom snin fil-mira ta’ Juventus u jistgħu jingħaqdu ma’ Juventus biex jieħdu post Arthur u Alex Sandro.

Matthew Scerri