Posts
Locatelli-Juventus. Il-punt s’issa
It-taħdidiet bejn Juventus u Sassuolo dwar Manuel Locatelli għadhom għaddejjin. Il-partijiet għadhom ma sabux ftehim bejniethom biss ħafna qed ibassru li dat-trasferiment se jsir anki għax Locatelli jinsab deċiż li jilgħab għal Juventus fl-istaġun li jmiss. S’issa nafu li Juventus ressqu offerta għal self ta’ sena mħallas 5 miljuni, bid-dritt li jkunu jistgħu jixtruh għal kollox għas-somma ta’ 25 miljun Ewro flimkien ma’ bonuses. Sassuolo ma aċċettawx din l-offerta għax iqisuha baxxa wisq u barra minn hekk huma jridu li Juventus ikollhom l-obbligu u mhux id-dritt li jixtruh għal kollox. Il-kontroproposta tidher li hi: 8-10 miljuni għas-self tal-plejer għall-perjodu ta’ sentejn, bl-obbligu li Juventus jixtruh fl-2023 għal 35 miljun Ewro flimkien ma’ 10 miljuni oħra f’bonuses. Issa rridu naraw x’se jagħmlu Juventus. L-impressjoni hi li Juventus finalment se jaċċettaw dat-tip ta’ ftehim għax jeħtieġu lil Locatelli u barra minn hekk dal-ftehim jagħtihom l-opportunità li jqassmu l-ħlas fuq perjodu ta’ madwar ħames snin, ħaġa li teknikament taqblilhom sabiex ma jidhirx piż qawwi fuq l-accounts tal-klabb fis-sentejn li ġejjin meta l-effetti tal-pandemija se jkunu qed jinħassu sew.
Matthew Scerri
Jitkellem l-aġent ta’ Dragusin
TuttoJuve ħadu kumment mingħand l-aġent ta’ Dragusin, Florin Manea. Skontu d-difensur m’għandu ebda ftehim ma’ klabb ieħor u Juventus qatt ma avviċinawh dwar possibbilta’ li Dragusin jingħaqad ma’ klabb ieħor. Manea temm jgħid li Dragusin lest jikkunsidra kull offerta li tasallu.
Matthew Scerri
Dragusin miftiehem ma’ Sassuolo. Locatelli jidher qrib li jingħaqad ma’ Juventus
Jidher li hemm xaqq ta’ tama li t-trasferiment ta’ Locatelli ma’ Juventus verament daqt se jseħħ. Fil-fatt qed ikun irrapurtat li Dragusin sab ftehim ma’ Sassuolo. Hu se jkun qed jingħaqad magħhom bħala parti mill-ftehim bejn Sassuolo u Juventus għal Locatelli. Intant Sassuolo diġà sabu sostitut għal Locatelli: Lovric ta’ Lugano.
Matthew Scerri
Carnevali: “Għandna ħafna offerti għal Locatelli”
“Għandna ħafna offerti għal Locatelli u waħda mnnhom għandha negozjati mqabbdin sew.” Hekk tkellem Giovanni Carnevali ta’ Sassuolo. Hu ma qalx għal liema offerta kien qed jagħmel riferiment. Semma li Sassuolo se jiltaqgħu mill-ġdid ma’ Juventus il-ġimgħa d-dieħla u tenna li l-klabbs Taljani qed isibuha diffiċli fis-suq tat-trasferimenti peress li l-klabbs barranin qed juru interess f’plejers li jilagħbu fl-Italja.
Matthew Scerri
Rugani u Pellegrini lura ma’ Juventus (u probabbli jibqgħu)
Il-ġimgħa d-dieħla jibda l-preseason ta’ Juventus. Daniele Rugani u Luca Pellegrini se jkunu qed jibdew l-istaġun ma’ Juventus. L-indikazzjonijiet huma li t-tnejn li huma jistgħu jibqgħu ma’ Juventus dis-sena. Pellegrini jista’ jkun ir-riserva ta’ Alex Sandro li ilu snin prattikament bla sostitut. Rugani, mill-banda l-oħra, għandu paga għolja u ma tantx hemm interess fih. Allegri jafu sew u mhuwiex kontra li Rugani jibqa’ ma’ Juventus, speċjalment jekk jinbigħ Demiral. Għat-tmejn li huma, ovvjament, kollox hu marbut mal-offerti li se jaslu. Fil-fatt jekk Juventus jirċievu offerta tajba għal Pellegrini jew għal Rugani, dan kollu li għidna jaf jinbidel.
Matthew Scerri
Locatelli. Juventus u Sassuolo resqin lejn ftehim
Kif irrapurtajna fil-jiem li għaddew, dil-ġimgħa Cherubini se jkun qed jerġa’ jiltaqa’ ma’ Carnevali ta’ Sassuolo sabiex ikomplu jiddiskutu d-dettalji tat-trasferiment ta’ Locatelli mal-Bianconeri. Sassuolo fehmu li l-plejer irid biss li jingħaqad ma’ Juventus u għaldaqstant għandhom kull interess li jilħqu ftehim mal-Bianconeri. Fl-aħħar sigħat issemma li Locatelli jaf jingħaqad ma’ Juventus b’self bi ftehim li l-Bianconeri jixtruh għal kollox is-sena ta’ wara u l-ħlas ikun imqassam fuq numru ta’ snin, bejn wieħed u ieħor ħames snin. Is-sena li għaddiet Juventus kisbu lil Chiesa bi ftehim simili. Il-prezz li qed jissemma għal Locatelli hu ta’ 48 miljun Ewro. Jidher li mhux se jkun hemm tpartit ta’ plejers bejn il-klabbs, għallinqas direttament fil-ftehim għal Locatelli. Mhux eskluż, però, li Sassuolo aktar ‘il quddiem jieħdu plejer jew plejers (Dragusin?) mingħand Juventus.
Matthew Scerri
U issa x’se tkun l-għażla ta’ Ronaldo?
Bl-eliminazzjoni tal-Portugall mill-Euro2020, l-attenzjoni issa ddur fuq l-għażla li Cristiano Ronaldo se jkun qed jagħmel brabta mal-futur tiegħu. Kif kien mistenni hu kien moħħu biss fl-impenji tat-tim nazzjonali u ma kienx qed jaħseb wisq dwar jekk għandux jitlaq lil Juventus jew le. Issa, ladarba l-Portugall inqalgħu, Ronaldo jista’ jgħaddi biex jagħmel il-kunsiderazzjonijiet dwar il-futur tiegħu mal-klabb Juventin. Nafu li fadallu sena kuntratt. Juventus ma jridux ineħħuh biss mhux se jwaqqfuh milli jitlaq. Is-somma li se jkunu qed jitolbu għalih hi ta’ 30 miljun Ewro għax inkella jkunu qed jagħmlu minuvalenza. Fl-istess ħin iridu jkunu jafu x’se jagħmel malajr kemm jista’ jkun minħabba li eventwalment iridu jsibu sostitut denju għalih. Insomma, nistennew li fil-jiem u l-ġimgħat li ġejjin ikollna aħbarijiet ċara dwar l-għażla ta’ Ronaldo.
Matthew Scerri
Frabotta probabbli ma’ Genoa għalkemm …
Gianluca Frabotta wasal biex isellem lil Juventus u jingħaqad ma’ tim ieħor. Qed jissemma li Genoa jinsabu qrib ħafna li jiffinalizzaw l-akkwist tiegħu. Fil-verità sa jumejn ilu kien qed jingħata bħala ċert it-trasferiment tiegħu ma’ Genoa, biss fl-aħħar sigħat jidher li Juventus mhux se jgħaġġlu u anzi se jieħdu l-ħin tagħhom. Allegatament Atalanta jinsabu interessati li jiksbu lil Frabotta fil-ftehim għat-trasferiment ta’ Gosens ma’ Juventus. Għaldaqstant Juventus għalissa għadhom ma tawx risposta definittiva lil Genoa u se jkunu qed jistennew ftit tal-jiem oħra biex jaraw kif se jiżvolġu l-affarijiet ma’ Atalanta.
Matthew Scerri
Juventus se jkollhom laqgħa dil-ġimgħa ma’ Sassuolo għall-akkwist ta’ Locatelli
Dil-ġimgħa Cherubini mistenni jiltaqa’ ma’ Carnevali, id-DĠ ta’ Sassuolo. Huma se jitkellmu dwar it-trasferiment ta’ Locatelli ma’ Juventus. Skont Tuttosport Sassuolo rrifjutaw l-offerta mressqa lilhom minn Juventus. L-offerta kienet ta’ 30 miljun Ewro flimkien ma’ Dragusin. Il-partijiet se jkomplu jiddiskutu bejniethom. Juventus iridu jagħlqu malajr kemm jista’ jkun dat-trasferiment peress li l-wirjiet tajba li Locatelli qed ikollu fil-Euro2020 jaf iwassal biex klabbs oħra jitħajru għalih u hekk il-prezz tiegħu jogħla sew.
Matthew Scerri