Posts

Issa hemm 15-il każ ta’ Covid fit-tim ta’ Genoa

/in /by

Il-każijiet ta’ Covid fit-tim ta’ Genoa telgħu għal ħmistax. Fi stqarrija l-klabb żvela l-ismijiet tal-plejers u l-membri tal-istaff li jinsabu pożittivi. Dawn huma: Valon Behrami, Francesco Cassata, Lukas Lerager, Federico Marchetti, Filippo Melegoni, Luca Pellegrini, Mattia Perin, Marko Pjaca, Ivan Radovanovic, Lasse Schöne u Davide Zappacosta. Apparti dawn il-ħdax-il plejer, hemm anki erba’ membri mill-istaff tat-tim: Pietro Cistaro, Alessandro Donato, Pietro Gatto u Matteo Perasso.

Matthew Scerri

Is-soltu teatrin! Għad m’hemmx deċiżjoni dwar Genoa-Torino u Juventus-Napoli

/in /by

Il-Lega Calcio lbieraħ ma waslet għal ebda konklużjoni dwar jekk il-partiti Genoa-Torino u Juventus-Napoli għandhomx jitħassru jew le. B’mod partikolari kien hemm diskussjoni twila dwar Genoa-Torino hekk kif issa Genoa għandhom 15-il persuna infettata (11-il plejer u 4 persuni mill-istaff tal-kowċ). Jidher li Torino bdew jopponu li l-partita titħassar anki għax ir-regolamenti ma jgħidu xejn dwar dan kollu. Evviva l-isportività ta’ Torino, imma, li jridu li l-partita tintlagħab għax se jkollu l-vantaġġ li l-avversarji jkunu b’nofs tim. Genoa jidhru rrabjati ferm u uffiċċjali tagħhom stqarrew pubblikament li l-partita ma tistax tintlagħab peress li t-tim kollu jinsab taħt kwarantina. Illum il-Lega Calcio għandha tieħu d-deċiżjoni finali.

Intant illum ukoll il-plejers u l-istaff ta’ Napoli se jerġgħu jagħmlu swab tests. Kif għidna lbieraħ hu veru li s’issa kulħadd irriżulta negattiv, biss hu veru wkoll li l-esperti dejjem qalulna li jekk it-test isir kmieni wisq, il-virus ma jinqabadx. Apparti l-iswab tests tal-lum, se jerġa’ jkun hemm swab tests oħra s-Sibt filgħodu. Hu ovvju li jekk jinstab numru sostanzjali ta’ plejers ta’ Napoli pożittivi għall-Covid, anki Juventus-Napoli tkun fir-riskju li titħassar.

Matthew Scerri

Il-Ministru Spadafora: “Mhuwiex il-każ li tieqaf is-Serie A”

/in /by

Il-Ministru Taljan tal-Isports, Vincenzo Spadafora stqarr illum li għalissa mhuwiex il-każ li tieqaf is-Serie A minħabba l-Covid-19. Fi kliemu l-protokoll tal-FIGC hu tajjeb ħafna u ma jeħtieġ ebda bidla.

Matthew Scerri

Illum se nkunu nafu jekk Juventus-Napoli hix se tintlagħab

/in /by

Illum mistenni jkun hemm laqgħa straordinarja tal-Lega Calcio fejn fost l-oħrajan se jkun diskuss il-każ tal-14-il persuna ta’ Genoa pożittivi għall-Covid-19. Hu probabbli ferm li Genoa-Torino tas-Sibt tkun posposta. Fl-istess ħin anki Juventus-Napoli jaf titmexxa għal data oħra. Dalgħodu suppost insiru nafu r-riżultati tal-iswab tests li saru lill-plejers ta’ Napoli. Kif ktibna lbieraħ l-incubation period tal-virus hu tassew twila u allura jkun prudenti li Juventus-Napoli tiġi posposta sabiex il-virus ma jkomplix jinfirex u fl-istess ħin nevitaw sitwazzjonijiet fejn il-plejers ta’ Napoli jaf ikunu debboli minħabba l-virus li jkun ġo fihom mingħajr ma jinqabad mit-test.

Matthew Scerri

Ronaldo magħżul bħala l-Aqwa Plejer ta’ Roma-Juventus

/in /by

Cristiano Ronaldo ġie magħżul mill-qarrejja tal-website tagħna bħala l-Aqwa Plejer tal-partita bejn Roma u Juventus. Fil-votazzjoni li saret online hu kiseb 69% tal-voti, segwit minn Danilo (19%), filwaqt li fit-tielet post insibu lil Szczesny b’8% tal-voti. Grazzi lil kulmin ħa sehem.

Matthew Scerri

Rabiot sospiż għal partita waħda

/in /by

L-Imħallef tal-Isport issospenda lil Adrien Rabiot għal partita waħda fis-Serie A. Dan wara li l-Franċiż tkeċċa għal żewġ karti sofor kontra Roma. Rabiot issa se jkollu jitlef il-partita ta’ nhar il-Ħadd kontra Napoli.

Matthew Scerri

Genoa-Torino u Juventus-Napoli se jkunu posposti?

/in /by

Bejn dal-lejl u għada mistennija joħorġu r-riżultati tal-iswab tests tal-plejers ta’ Napoli wara li faqqa’ l-każ ta’ Genoa b’14-il persuna infettata. Napoli lagħbu kontrihom nhar il-Ħadd u allura hemm riskju li l-virus għadda lill-plejers Naplitani. Minħabba l-incubation period tal-virus innifsu, nhar il-Ġimgħa se jsiru swab tests oħra li r-riżultati tagħhom ikunu magħruf s-Sibt.

F’dan l-istadju għadna ma nafux jekk Genoa-Torino u Juventus-Napoli humiex se jintlagħbu. Fir-regolamenti tal-kampjonat Taljan m’hemm l-ebda regoli li tgħid li jekk ikun hemm iktar minn ċertu numru ta’ plejers infettati l-partita titħassar. L-Uefa għandha dir-regola għall-kompetizzjonijiet Ewropej (13-il plejer infettat ikun ifisser li l-partita ma tintlagħabx). Genoa għandhom għaxar plejers infettati s’issa u nemmnu li fiċ-ċirkostanzi attwali l-partita kontra Torino għandha tintlagħab f’data oħra. L-istess jgħodd għal Juventus-Napoli għax l-incubation period tal-virus hu kemxejn twil u jista’ jkun li fl-iswab tests il-virus ma jinqabadx (fil-fatt Genoa kellhom biss tnejn morda sas-Sibt li għadda u l-virus irriżulta wara l-partita). Sitwazzjoni delikata immens. Nemmnu imma li s-sens komun jitlob il-prudenza bħalissa: aħjar żewġ partiti li jintlagħbu f’data oħra milli jkun hemm erba’ timijiet tas-Serie A b’numru qawwi ta’ plejers infettati. Aħjar inwaqqfu żewġ partiti issa milli nieħdu r-riskju li jkollu jerġa’ jagħlaq kollox mill-ġdid!

Matthew Scerri

Bħalissa aħjar nwarrbu t-trijonfaliżmu u d-disfattiżmu

/in /by

F’dal-mument tal-istaġun naħseb li t-tim Juventin m’għanduz bżonn la t-trijonfaliżmu li kellna wara l-partita kontra Sampdoria u wisq inqas ċertu disfattiżmu li deher wara l-partita kontra Roma. Hu veru li ġimgħa ilu rajna wirja tajba u ħadna gost naraw lit-tim jilgħab. Fl-istess ħin, imma, hu veru wkoll li lbieraħ rajna wirja fqira għall-aħħar, speċjalment fl-ewwel taqsima. Irridu noqogħdu attenti, għallinqas hekk nemmen, li ma neloġjawx wisq u ma nikkritikawx iżżejjed lit-tim f’dal-mument tant delikat fejn Pirlo għadu qed jibni lit-tim. Irridu nkunu realistiċi u nitgħallmu mill-iżbalji. Ilbieraħ kien hemm wisq żbalji u nittamaw li Pirlo tgħallem il-lezzjoni. Fl-istess ħin ma nistgħu ninsew it-tajjeb li sar qabel u fuq dak irridu nkomplu nibnu. Imbagħad, bħalma dejjem ktibna, għad hemm il-kwistjoni tal-kampanja trasferimenti. Timijiet oħra ilhom jibnu t-tim tagħhom. Aħna ninsabu f’mument fejn irridu naqilbu lit-tim ta’ taħt fuq. L-akkwisti ta’ Kulusevski, Arthur, McKennie u Morata huma tajbin imma mhux biżżejjed biex it-tim ikun issaħħaħ kif mixtieq. F’nofs il-grawnd għad fadal ħafna xi jsir; neħtieġu attakkant tal-kaxxa; u anki fuq wara hemm bżonn xi rtokki. Jekk Agnelli, Paratici u Nedved mhux se jifhmu dal-punt kruċjali, allura, dejjem biex inkunu realistiċi, irridu nippreparaw ruħna għal staġun diffiċli ferm. Il-gap naqas drastikament fl-aħħar staġun. Inter, Atalanta, Lazio u Napoli qorbu ħafna lejn Juventus. Issa sta għal Pirlo bħala kowċ u lid-diriġenti jagħmlu dak kollu li hu meħtieġ biex it-tim jibqa’ kompetittiv u jkollu realment ċans jirbaħ l-għaxar kampjonat konsekuttiv.

Matthew Scerri

Roma-Juventus 2-2

/in /by

L-ewwel eżami serju ta’ Pirlo mar ħażin ferm għalkemm is-soltu Ronaldo rnexxilu jsalva lit-tim Juventin b’doppjetta li fissret punt mhux wisq mistħoqq. Apparti r-riżultat u l-gowls ta’ Ronaldo ma tantx hemm wisq xi tfaħħar fil-partita tal-Bianconeri. Difensivament kienet l-agħar wirja fl-aħħar għaxar snin. Prattikament kull darba li Roma ppruvaw jaqbżu nofs il-grawnd ġew waħidhom kontra Szczesny. Nofs il-grawnd kien żbilanċjat ferm bil-konsegwenza li d-difiża tħalliet mikxufa wisq u Rabiot spiċċa tkeċċa għax kien f’diffikultà waħdu. Ramsey u Kulusevski ppruvaw joħolqu imma ftit li xejn kienu effikaċi. Morata, imbagħad, għadu jrid jidra sew lil sħabu l-ġodda. Kollox ma’ kollox kien hemm ħafna, wisq, taħwid tattiku min-naħa ta’ Pirlo (bidel is-sistema meta s’issa t-tim kien sejjer tajjeb; bidel il-pożizzjoni ta’ Cuadrado u Ramsey; qed ikomplu jinsisti bi plejers barra minn posthom tipo Danilo minn full-back sar difensur ċentrali jew Cuadrado, l-aqwa full-back lemini fis-sena li għaddiet, kellu llejla jilgħab kontra siequ mal-linja l-oħra), Nispera li l-lezzjoni tal-lum ħadha u li jagħraf isewwi l-iżbalji tiegħu stess. Fl-istess ħin nittamaw li Paratici jagħtih il-plejers li huma meħtieġa f’dat-tim: full-back u midfielder ta’ kwalità, flimkien ma’ attakkant ċentrali tal-kaxxa.

ROMA-JUVENTUS 2-2

Skurjaw: 2 Veretout (1 pen.) (R), 2 Ronaldo (1 pen.) (J)

Roma (3-4-2-1): Mirante; Mancini, Ibanez, Kumbulla; Santon (Peres), Veretout, Pellegrini (Diawara), Spinazzola; Mkhitaryan, Pedro; Dzeko. Kowċ: Fonseca.

Juventus (4-4-2): Szczesny; Danilo, Bonucci, Chiellini, Cuadrado; Kulusevski (Frabotta), McKennie (Arthur), Rabiot, Ramsey (Bentancur); Morata (Douglas Costa), Ronaldo. Kowċ: Pirlo.

Referee: Di Bello.

Karti sofor: Kumbulla (R), Pellegrini (R), Frabotta (J).

Karta ħamra: Rabiot (J)

Matthew Scerri