Dejjem iktar probabbli r-ritorn ta’ Kean
Kulma jmur hu dejjem iktar probabbli li Moise Kean jirritorna ma’ Juventus. Il-Bianconeri jinsabu f’taħdidiet ma’ Everton fuq il-bażi ta’ self għal sentejn bl-obbligu li jixtruh għal kollox fl-2022. Everton jinsabu interessati anki għax Kean ma kellux staġun tajjeb magħhom.
Matthew Scerri
Roma jirrifjutaw offerta kbira għal Zaniolo
Hu fatt magħruf li Zaniolo hu fil-pjanijiet ta’ Juventus … u mhux biss. Ħafna klabbs iriduh b’saħħa. Tottenham, pereżempju, ressqu offerta għalih ta’ 50 miljun Ewro flimkien ma’ 10 miljuni oħra f’bonuses. Roma, però, ma laqgħux l-offerta u minflok qed ikomplu għaddejjin bit-taħdidiet mal-plejer biex jikkonvinċuh jiffirma kuntratt ġdid.
Matthew Scerri
Commisso: “Qatt ma kellna offerti għal Chiesa”
Rocco Commisso tkellem dwar Federico Chiesa waqt il-programm Salotto dello Sport imxandar fuq RTV38. Commisso sostna li Fiorentina qatt ma rċevew offerti għal Chiesa. Hu tenna li wiegħed lil Chiesa li jekk tasal offerta tajba għal kulħadd, Fiorentina se jħalluh jitlaq. F’dan l-istadju, però, mhuwiex eskluż li se jibqa’ ma’ Fiorentina. Intant, però, diversi gazzetti qed jirrapurtaw li Milan qed jitħajru jressqu offerta għalih u allura jista’ jkun hemm żviluppi fil-jiem li ġejjin.
Matthew Scerri
Konfermi minn ħu Higuain
Nicolas Higuain, ħu l-attakkant Juventin, ikkonferma li l-Pipita se jkun qed jitlaq lil Juventus u mhux se jilgħab iktar fis-Serie A. F’intervista mogħtija lil Tuttosport, Nicolas Higuain sostna li apprezza ħafna s-sinċerità ta’ Pirlo u issa għaddejjin taħdidiet ma’ Juventus sabiex ikun annullat il-kuntratt. “Ħsibna li Pirlo kien se jagħtih ċans, plejers li skurja 350 gowl, imma minflok affaċċjah biex jgħidulu li ma kienx parti mill-proġett. Apprezzajna t-trasparenza tiegħu. Issa rridu nilħqu ftehim ma’ Juventus u mhux se jkun hemm problemi għax għandna rapport tajjeb ħafna. Irċevejna ħafna offerti imma l-ebda waħda verament eċitanti,” kien il-kliem ta’ Nicolas.
Matthew Scerri
Gosens u Hateboer. L-affarijiet jikkumplikaw ruħhom?
Atalanta għadhom kemm bigħu lil Castagne lit-tim ta’ Leicester. Skont l-analisti tas-suq tat-trasferiment, il-bejgħ ta’ Castagne jista’ jfisser li Atalanta ma jridux ibigħu lil Gosens jew lil Hateboer li t-tnejn li huma ssemmew spiss ma’ Juventus das-sajf.
Matthew Scerri
Higuain għandu ftehim ma’ Inter Miami
Tyc Sports qed jirrapurtaw li t-telefonata ta’ Beckham lil Higuain wasslet biex instab ftehim ħalli l-attakkant Arġentin jagħżel li jilgħab għal Inter Miami. Allegatament kemm diġà ftehim bejn Higuain u l-klabb Amerikan għal kuntratt ta’ sentejn. Issa jifdal biss li Higuain isib ftehim ma’ Juventus biex ixolji l-kuntratt.
Matthew Scerri
Uffiċjali: Zanimacchia misluf lil Real Saragoza
Il-klabb Spanjol ta’ Real Saragoza ħabbar uffiċjalment li kiseb lil Zanimacchia b’self mingħand Juventus. Huma se jkollhom id-dritt li jixtruh għal kollox is-sena d-dieħla.
Matthew Scerri
Ftehim bejn Juventus u Suarez
Matul il-lejl li għadda faqqgħet l-aħbar li Juventus sabu ftehim ma’ Luis Suarez sabiex ikun jista’ jingħaqad magħhom. Issa jonqos biss, dejjem skont dak li qed ikun irrapurtat, li Suarez isib ftehim ma’ Barcellona sabiex ixoljulu l-kuntratt. Din l-aħbar ġiet mogħtija minn diversi siti u gazzetti. Illum probabbli li se nisimgħu ħafna iktar dwar dan kollu.
Matthew Scerri
X’qed joffru PSG għal Bellerin
Fl-aħħar ġimgħat qrajtna u smajna ħafna li Hector Bellerin hu l-full-back li Pirlo jrid għat-tim tiegħu. Il-konkorrenza għall-akkwist tiegħu hi tassew qawwija. Nafu li PSG offrew 25 miljun Sterlina flimkien ma’ 5 miljuni oħra f’bonuses. Anki Bayern Munich iriduh, għalkemm s’issa m’hemmx aħbarijiet ta’ offerti għalih min-naħa tagħhom. Arsenal bħalissa qed jilqgħu l-offerti għalih u lesti jbigħuh biss jekk taslilhom offerta verament tajba.
Matthew Scerri