Għidulna kif taħsbuha dwar kif imxew Juventus fis-suq tat-trasferimenti das-sajf. Segwu l-ħolqa t’hawn taħt biex tgħidulna kif taħsbuha. Grazzi lil kulmin se jieħu sehem.
Is-suq tat-trasferimenti hu issa uffiċjalment magħluq. F’dis-sessjoni tas-sajf, Juventus kisbu lil Morata, Chiesa, McKennie u Arthur, flimkien ma’ Kulusevski li kien inxtara f’Jannar. Inxtara mill-ġdid anki Mandragora li tħalla b’self ma’ Udinese.
Telqu lil Juventus: Pjanic (Barcellona), Rugani (Rennes), Pellegrini (Genoa), Romero (Atalanta), Perin (Genoa), Pjaca (Genoa), Nicolussi Caviglia (Parma), De Sciglio (O.Lyon) u Douglas Costa (Bayern Munich). Ta’ min jgħid li, apparti Pjanic, il-plejers kollha imsemmija, ġew mislufa u mhux mibjugħa. Saru, imbagħad, diversi trasferimenti ta’ plejers mit-tim Under 23 u l-Primavera.
Apparti dawn telqu anki Matuidi u Higuain ma’ Inter Miami wara li xoljew il-kuntratt ma’ Juventus. Paratici naqas imma li jsib ftehim ma’ Khedira biex il-kuntratt tiegħu jkun itterminat qabel iż-żmien.
Matthew Scerri
L-FA ta’ Wales ħabbret li minħabba li l-plejers Juventini jinsabu f’iżolament ‘fiduciario’ wara li nstabu żewġ ħaddiema ta’ Juventus pożittivi għall-Covid, Ramsey għalissa mhux se jkun jista’ jingħaqad mat-tim nazzjonali. Hu se jitlef il-partita kontra l-Ingilterra u wara eventwalment ikun jista’ jingħaqad ma’ sħabu tat-tim nazzjonali.
Matthew Scerri
Federico Chiesa hu uffiċjalment plejer ta’ Juventus. Hu ngħaqad b’self ma’ Juventus għal sentejn, bid-dritt jew l-obbligu għall-Bianconeri li jixtruh għal kollox fl-2022. Is-self f’das-sentejn se jkun imħallas 10 miljun Ewro ( 3 miljuni dis-sena u 7 miljuni s-sena d-dieħla). Fl-2022 Juventus se jkollhom id-dritt li jixtruh għal kollox, liema dritt isir obbligu jekk jintlaħqu ċerta miri f’dawn is-sentejn. Il-prezz tax-xiri se jkun ta’ 40 miljun Ewro, flimkien ma’ 10 miljuni oħra f’bonuses.
Matthew Scerri
Juventus ħabbru li Mattia De Sciglio ngħaqad ma’ O.Lyon b’self għal sena. Hu telaq lil Juventus wara tliet snin fejn rebaħ tliet kampjonati, Coppa Italia u Super Cup Taljana.
Matthew Scerri
Bayern Munich ħabbru li ngħaqad mill-ġdid magħhom b’self għal sena. Fl-ewwel stqarrija tiegħu, Douglas Costa stqarr li jinsab kuntent li se jkun qed jerġa’ jilgħab għal Bayern u awgura li l-klabb jikseb aktar unuri.
Matthew Scerri
L-aġenzija tal-aħbarijiet Ansa tat l-aħbar li l-Procura Federale fetħet inkjest dawr il-każ ta’ Juventus-Napoli. L-inkjesta trid taċċerta jekk Napoli kisrux il-protokoll tal-FIGC wara li nstab l-ewwel plejer pożittiv. Barra minn hekk l-Procura se tkun qed tifli d-dokumenti kollha b’rabta mal-każ, kemm dawk maħruġa mill-ASL, kiff ukoll mill-awtoritajiet tar-reġjun Campania.
Matthew Scerri
Hans Nicolussi Caviglia se jkun qed jilgħab ma’ Parma f’dan l-istaġun. Hu se jingħaqad magħhom b’self u sa fejn nafu s’issa Parma mhux se jkollhom ebda dritt jew obbligu li jixtruh għal kollox.
Matthew Scerri
Illum probabbli mhux se jkollna ebda deċiżjoni dwar Juventus-Napoli. La Repubblica qed tbasssar li l-Imħallef tal-Isports, Gerardo Mastrandea mhux se se jaqta’ s-sentenza llum u se jitlob aktar żmien biex jifli d-dokumentazzjoni marbuta mal-każ. Mhuwiex eskluż lanqas li hu finalment ikollu jgħaddu l-kwistjoni f’idejn il-Procura Federale mmexxija minn Giuseppe Chinè. Il-kwistjoni hi tassew waħda kumplessa u tistgħu toqogħdu ċerti li se ndumu ħafna nisimgħu u naqraw dwarha.
Matthew Scerri
Illum waranofsinhar se jsiru t-testijiet mediċi qabel Douglas Costa jkun jista’ jingħaqad b’self ma’ Bayern Munich. Minn dak li nafu s’issa, Bayern mhux se jkollhom ebda dritt jew obbligu li jixtru lil Costa għal kollox.
Matthew Scerri