L-aġenzija tal-aħbarijiet Adnkronos qed jirrapurtaw li l-Avukat Chiappero stqarr illum li Juventus m’għandhom x’jaqsmu xejn mal-kwistjoni tal-allegati irregolaritajiet b’rabta mal-eżami ta’ Luis Suarez. Ta min jgħid ukoll li l-Avukat Chiappero u l-Avukatessa Turco llum kienu interrogati mhux bħala avukati ta’ Juventus, imma għax assistew lill-avukati ta’ Suarez biex hu seta’ jitlob iċ-ċittadinanza Taljana.
Matthew Scerri
Udinese jinsabu disposti jbigħu lil Rodrigo De Paul hekk kif jinsabu qrib li jixtru lura lil Pereyra. Leeds iriduh b’saħħa u lesti joffru 30 miljun Ewro għalih. Juventus għadhom iriduh ukoll biss qabel iressqu offerta għalih iridu jbigħu lil xi plejer/s li għandhom fit-tim.
Matthew Scerri
L-avukati Luigi Chiappero u Maria Turco llum kienu interrogati b’rabta mal-allegati irregolaritajiet fl-eżami ta’ Luis Suarez. Huma ġew mitluba jagħtu l-verżjoni tagħhom bħala “persone informate sui fatti” u mhux għax qed jiġu indagati. L-avukat Chiappero rringrazzja lill-awtoritajiet li sejħulhom immedjatament biex jiċċaraw l-affarijiet min-naħa tagħhom u jiddefendu t-trasparenza li dejjem ħadmu biha. Hu żied anki li spissa l-verità tiġi mibdula għax hu konvenjenti għall-qarrejja u allura kien importanti li hu u l-avukatessa Turco jinstemgħu minnufih biex il-verità tkun stabbilita.
Matthew Scerri
La Stampa ħadu kumment mingħand Cherubini. Hu kkonferma li ċempel lir-Rettur tal-Università Statale ta’ Perugia, Maurizio Oliviero. Cherubini sostna li jaf lil Oliviero u ċempillu peress li mill-Konsolat Taljan f’Barcellona ġie infurmat li l-eżami seta’ jsir fi Siena jew f’Perugia. Peress li kien jaf lil Oliviero, ċempillu biex jikseb informazzjoni dwar l-eżami. Oliviero, imma, għarfu li kellu jkellem lill-Università per Stranieri ta’ Perugia. Minn dak il-mument ‘il quddiem, il-ballun għadda f’idejn l-istaff ta’ Suarez u l-avukati involuti.
Matthew Scerri
Ir-Rettur tal-Università Statale ta’ Perugia, Maurizio Olivieri hu l-persuna li kienet ikkuntattjata minn uffiċċjali ta’ Juventus (li allegatament hu Cherubini). Fit-telefonata Olivieri ġie mistoqsi jekk l-Università tiegħu tagħmilx l-eżami B1 meħtieġ għaċ-ċittadinanza ta’ Suarez. Hu wieġeb li l-Università Statale ma torganizzax dawn l-eżamijiet u għamel kuntatt mal-Università per Stranieri ta’ Perugia li regolarment ikollha sessjonijiet ta’ dawn l-eżamijiet. L-Università per Stranieri għandha bħala Direttur Ġenerali lil Simone Olivieri (li ma jiġix mir-Rettur tal-Università Statale). Ir-Rettur tal-Università per Stranieri f’telefonata minn lil Simone Olivieri allegatament jgħid: “Taf li għandi relazzjoni tajba mad-diriġenza ta’ Juventus. Irridu ngħinu lill-attakkant tagħna.” Fi stqarrija, Maurizio Olivieri spjega li hu tkellem ma’ Paratici għal ftit sekondi biss wara li sar l-eżami. Kienet telefonata ta’ korteżija li matulha Paratici rringrazzja lil Olivieri peress li Suarez ħassu tassew milqugħ tajjeb fil-ħin qasir li qatta’ jagħmel l-eżami.
Nagħlqu billi nfakkru li Juventus għalissa mhix tiġi investigata. Sar magħruf li l-avukati Maria Turco u Luigi Chiappero (qrib ħafna ta’ Juventus) issejħu fil-Procura biex jagħtu x-xhieda tagħhom hekk kif assistew lill-avukati ta’ Suarez fil-ewwel parti tal-proċess għall-ksib taċ-ċittadinanza Taljana min-naħa tal-attakkant Urugwajan.
Matthew Scerri
L-Uefa kkonfermat li għall-istaġun 2020/21 kull tim li se jieħu sehem fil-kompetizzjonijiet Ewropej se jkun jista’ jagħmel ħames bidliet waqt il-partita. Minħabba f’hekk għal kull partita, it-timijiet iridu jagħżlu 23 plejer (ħdax li jilagħbu u tnax oħra riservi).
Matthew Scerri
Wara Morata attakkant ieħor mistenni jirritorna ma’ Juventus. Nafu li Juventus ilhom isegwu lil Kean biss s’issa għadhom ma sabux ftehim ma’ Everton. Intant Llorente jinsab f’taħdidiet ma’ Napoli biex ixolji l-kuntratt tiegħu. Hu attwalment jinsab fuori rosa u allura kollox jindika li Napoli għandhom kull interess li jitterminaw il-kuntratt ta’ Llorente. Jekk dan verament iseħħ, Llorente jista’ jkun li jirritorna ma’ Juventus bħala r-raba’ attakkant tat-tim.
Matthew Scerri
F’dawn l-aħħar għaxart ijiem tas-suq tat-trasferimenti jidher li l-attenzjoni ta’ Juventus hi kollha fuq il-bejgħ ta’ Douglas Costa u x-xiri ta’ Federico Chiesa. Fali Ramadani qed imexxi t-taħdidiet ma’ Fiorentina għal Chiesa. Il-Bianconeri huma konvinti li jistgħu jiksbu lil Chiesa b’self bl-obbligu li jixtruh għal kollox is-sena d-dieħla. Il-valur komplessiv ta’ dat-trasferiment se jkun bejn 45 u 50 miljun Ewro.
Matthew Scerri
Fabio Paratici jinsab mill-ġdid f’Londra bit-tama li jirnexxilu jċaqlaq xi ħaġa f’dak li għandu x’jaqsam mal-bejgħ ta’ plejers. Nafu li hemm diversi plejers fit-tim Juventin (Douglas Costa, Alex Sandro u Rugani, pereżempju) li jinsabu fil-mira ta’ klabbs tal-Premier League. Barra minn hekk hu probabbli ferm li f’dal-vjaġġ Paratici se jkellem lil Chelsea dwar Emerson Palmieri.
Matthew Scerri