Il-President ta’ Genoa, Enrico Preziosi kellu l-opportunità lbieraħ li jitkellem dwar il-futur ta’ Eldor Shomurodov. Hu sostna ċar u tond li Shomurodov se jibqa’ ma’ Genoa sa tmiem l-istaġun: “Mhux se jitlaq. M’hemm xejn.”
Matthew Scerri
Juventus jinsabu pass ‘il bogħod milli jilħqu ftehim għall-akkwist ta’ Bryan Reynolds mingħand Dallas FC. Il-Bianconeri ressqu offerta ta’ 7.5 miljun Ewro, liema offerta tidher li se tkun aċċettata. Fis-sitt xhur li ġejjin Reynolds se jkun qed jilgħab b’self ma’ Benevento.
Matthew Scerri
Fil-ħarġa tal-lum ta’ Tuttosport naqraw li Juventus huma interessati li jiksbu lil Eldor Shomurodov mingħand Genoa. L-aħbar qed tingħata prominenza kbira tant li nsibuha fl-ewwel paġna. Shomurodov jista’ jkun ir-raba’ attakkant ta’ Juventus għall-kumplament tal-istaġun.
Matthew Scerri
Waqt intervista mogħtija lil Tele Nord, id-Direttur tal-Isports ta’ Genoa, Francesco Marroccu sostna li Pellegrini mhux se jitlaq lil Genoa. Fil-jiem li għaddew kien hemm ħafna spekulazzjonijiet li Pellegrini kien se jitlaq lil Genoa biex Juventus jisilfuh lil xi tim ieħor tas-Serie A. Dan però mhuwiex minnu.
Matthew Scerri
Fis-sigħat li ġejjin Elia Petrelli se jkun qed iħalli lil Juventus Under 23 sabiex jingħaqad ma’ Genoa. It-trasferiment se jkun fuq bażi ta’ xiri mhux self. Il-ftehim bejn il-klabbs intlaħaq bħala parti minn ftehim ferm usa’ li se jwassal biex Juventus jiksbu lil Rovella.
Matthew Scerri
Illum issemma anki Fabio Quagliarella bħala akkwist possibbli ta’ Juventus. L-aħbar ma ġietx miċħuda minn Ranieri li qal: “Issa naraw x’se jiġri. Li hu żgur hu li jkun premju kbir għal Quagliarella. Li fl-età ta’ 38 sena jfittxek klabb klabb naħseb li hi ħaġa li għandha tagħti pjaċir lil Fabio.”
Matthew Scerri
Pirlo tkellem ċar: Juventus se jippruvaw jiksbu attakkant ieħor. Fl-intervista ta’ wara l-partita, malli ssemmilu isem Giroud, Pirlo ma qagħadx lura milli jgħid li hu t-tip ta’ plejer li Juventus jeħtieġu. Giroud, imma, jidher li mhux se jitlaq lil Chelsea peress li qed ikun regolari magħhom u jrid jikseb post mat-tim nazzjonali Franċiż għall-Kampjonat Ewropew. Issemma ħafna Depay, plejer ieħor li l-klabb tiegħu ma jridx ibigħ għalkemm il-fatt li għandu kuntratt li jiskadi f’Ġunju jaf iwassal biex O.Lyon jibdlu fehmthom. Ovvjament lesti jibdlu fehmthom biss quddiem offerta tajba (li bħalissa Juventus ma jistgħux u lanqas iridu jressqu). Hemm imbagħad l-isemijiet li l-inqas qed jogħġbu lis-supporters: Llorente, Pellè u Pavoletti. Pellè nafu li qiegħed bla klabb u allura hu l-iktar wieħed faċli li jinkiseb. Llorente, mill-banda l-oħra, x’aktarx mhux se jitħalla jitlaq minn Napoli qabel is-Super Cup (tard wisq għal Juventus!). Imbagħad hemm Pavoletti li jista’ jinkiseb bi tpartit ma’ xi plejer jew plejers li hemm fi ħdan it-tim Juventin. Dawn huma wħud mill-ismijiet li qed isiru s’issa. Nifhmu li aktar ma jgħaddi ż-żmien aktar se joħorġu ismijiet, li hi ħaġa normali f’sitwazzjonijiet bħal dawn għax żgur li Paratici se jikkunsidra diversi plejers qabel jieħu d-deċiżjoni tiegħu. Nittamaw li dan l-imbierek raba’ attakkant ma jdumx ma jasal għal bħalissa Pirlo verament għandu bżonn sostitut għal Ronaldo/Morata/Dybala.
Matthew Scerri
Intervistat minn Dauphiné Libéré, Olivier Giroud tkellem dwar il-futur tiegħu. Hu sostna li l-objettiv tiegħu personali hu li jikseb post mat-tim nazzjonali Franċiż għall-Kampjonat Ewropew tas-sajf. Għall-mistoqsija dwar fejn jara lilu nnifsu fil-futur, Giroud wieġeb: “Fil-futur qarib narani ma’ Chelsea.”
Matthew Scerri
“Mercato? Tkellimna u nafu x’irridu. Paratici jaf sew. Ikun utli attakkant ieħor li jserraħ lill-attakkanti li għandna fit-tim.” Hekk tkellem Andrea Pirlo fi tmiem Juventus-Udinese. Kliemu jikkonferma li verament fost il-prijoritajiet ta’ Juventus hemm l-akkwist ta’ attakkant ieħor. Ta’ min jgħid li bejn injuries u sospensjonijiet, Pirlo ħafna drabi spiċċa kellu għad-dizpożizzjoni tiegħu żewġ attakkanti kull partita.
Matthew Scerri
Graziano Pellè ħabbar uffiċjalment li mhux se jibqa’ ma’ Shandong Luneng wara li ntemmlu l-kuntratt. Il-post li kiteb fuq is-social media kellu l-likes ta’ Bonucci u Chiellini, fost l-oħrajn, li lagħbu miegħu mat-tim nazzjonali Taljan. Hu evidenti, però, li Pellé għandu ċans tajjeb li jingħaqad ma’ Juventus minħabba li hu bla klabb u allura l-akkwist tiegħu ma jiswa xejn lil Juventus.
Matthew Scerri