Illum, għaxart ijiem wara, suppost ikollna d-deċiżjoni tal-Imħallef tal-Isports dwar Juventus-Napoli. Fl-aħħar se nkunu nafu jekk ir-regolament humiex se jiġu rispettati jew inkella huwiex se jkollna sentenza frott il-kompromess li ilu jinħema fl-aħħar jiem.
Matthew Scerri
Għaddiet ġimgħa minn Juventus-Napoli u għadna ma nafux x’se jiġri minn dil-partita. Għaddiet ġimgħa li fiha rajna s-soltu teatrin b’kulħadd jiftaħ ħalqu biex jinsulta lil Juventus u intant il-Federazzjoni għaddejja b’manuvri minn taħt biex jinstab kompromess ħalli Napoli ma jkunux milquta kif suppost għadhom ikunu. Smajna lill-President tar-Reġjun tal-Campania, De Luca jiċħad li Napoli għamlu pressjoni biex jinħarġu d-dokumenti ħalli ma jkollhomx għalfejn jinżlu għall-partita (De Luca li tajjeb infakkru hu ħabib kbir ta’ De Laurentis). Saħansitra De Luca stqarr li kliem Agnelli kien tal-mistħija u sostna li kieku hu ġab ruħu bħall-President Juventin kien iħoss li tilef l-‘unur sportiv’ għax ma rrispettax lill-avversarji u ried jirbaħ kontra tim impoġġi fi kwarantina (nesa li Agnelli qal ċar u tond li Juventus iħobbu jirbħu fil-grawnd). U ħafna paroli fil-vojt iktar ta’ dan it-tip, fosthom anki ħafna ineżattezzi (pereżempju għalih il-protokoll tal-FIGC hu biss dokument privat, mentri fil-verità hu dokument approvat mill-Ministeru tas-Saħħa u t-timijiet fl-Italja jistgħu jilagħbu biss għax jeżisti dad-dokument; u dan hu konfermat minn ċirkolari tal-istess Ministeru, liema ċirkolari lanqas biss issemmiet fl-ittra li nħarġet mill-awtoritajiet tar-Reġjun u li Napoli għaddew lil-Lega).
Bħal dejjem, meta persuna mid-dinja tal-futbol Taljan tisfa’ taħt il-mira tal-kritika l-aħjar mod li ssib biex tiddefendi ruħha hi li tinfexx tgħajjar lil Juventus. Il-verità hi li l-Lega ddeċidiet darbtejn li d-dokumenti li ppreżentawlhom Napoli ma kinux jagħtuhom raġun u ddeċidiet li l-partita kellha tintlagħab. Fid-dawl ta’ did-deċiżjoni Juventus niżlu għall-partita, kif kien fid-dmir tagħhom li jagħmlu. Jekk De Luca ħassu offiż li l-karti tiegħu ma ntlaqgħux, kien imissu għajjar lil-Lega u mhux lil Juventus. L-‘unur sportiv’ semmai tilfitu l-Lega u mhux Juventus. U li kieku kien vera politakant tal-affari tiegħu, kien jieħu passi kontra Napoli li bl-aktar mod irresponsabbli ma segwewx il-protokoll bil-konsegwenza li kellha tidħol fl-istorja l-ASL, liema ASL ma kienet qatt tkun involuta li kieku Napoli segwew il-protokoll!
Għaddiet ġimgħa, għidna, u forsi bejn għada u t-Tlieta jkollna l-verdett tal-giustizia sportiva. Tajjeb infakkru li l-ewwel proċess ta’ Calciopoli kien qata’ s-sentenza kontra Juventus f’temp ta’ 11-il ġurnata. Is-sentenza dwar Juventus-Napoli se tieħu kważi l-istess tul ta’ żmien. Dan kollu għax ħadd ma jrid jerfa’ r-responsabbiltà li jieħu deċiżjoni. Kif ktibt aktar kmieni dil-ġimgħa, il-kwistjoni hija kumplessa, verissimu, imma jrid ikollna sentenza. U fil-fehma tiegħi l-kwistjoni hi sempliċi: jew Napoli mhumiex ħajta u allura ma jeħlu xejn, jew inkella huma ħatja u allura trid tiġi applikata r-regola li hemm, jiġifieri telfa walkover. L-imħallef qiegħed hemm biex jagħmel xogħlu fl-aħjar interess tal-ġid komuni. Żgur mhux qiegħed hemm għal-lobbying jew biex isib kompromessi li ma jurtawx lill-politikanti.
Matthew Scerri
Kmieni l-ġimgħa d-dieħla mistennija toħroġ is-sentenza dwar Juventus-Napoli. Kollox jindika li l-FIGC, fuq pressjoni anki tal-Gvern, se tkun qed issib ħatja lil Napoli biss li kisru l-protokoll meta ma ħolqux il-bubble wara li nstab Zielinski pożittiv. Ta’ dan huma se jitnaqqsilhom punt fil-klassifika. Mhux se jkunu ħatja però li ma niżlux għall-partita u għaldaqstant mhux se jkun hemm ebda walkover. Juventus-Napoli se tintlagħab fit-13 ta’ Jannar 2021. Hekk ikun instab is-soltu kumprumess a la Taljana u l-futbol Taljan ikun ġie għal darb’oħra mżeblah quddiem id-dinja kollha. Kif dejjem għidt il-partita kellha titħassar mill-ewwel. La darba ma tħassritx u tfassal regolament, la darba għal darbtejn il-Lega fliet id-dokumenti ta’ Napoli u ordnat li l-partita kellha tintlagħab xorta waħda, allura ma dal-kumprumess tassew ma jagħmilx sens!
Matthew Scerri
Ir-riżultat ta’ Juventus-Napoli għadu u se jibqa’ sub iudice għalissa hekk kif l-Imħallef tal-Isports jeħtieġ aktar żmien biex jifli l-każ qabel joħroġ is-sentenza tiegħu. Fi kliem ieħor s’issa għad m’hemm l-ebda deċiżjoni min-naħa tiegħu.
Matthew Scerri
Għadha ma ttieħdet ebda deċiżjoni dwar il-partita Juventus-Napoli. L-għidut tal-ġurnata kien li l-inkjesta tal-FIGC tista’ twassal biex Napoli jitilfu xi punti fil-klassifika biss ma tingħatax rebħa walkover lil Juventus. Jekk verament dan ikun hekk, allura jkun ifisser li Juventus-Napoli jkollha tintlagħab darb’oħra u qed tissemma d-data tat-13 ta’ Jannar, erbat ijiem qabel il-big match kontra Inter. Kif dejjem għidna din il-kwistjoni hi kumplessa ferm. Li hu ċert hu li jekk dak li ġie rrapurtat illum hu minnu, allura verament il-futbol Taljan ikun qed jerġa’ jaqa’ għar-ridikolu. La hemm regola u Napoli jinstabu ħatja li kisru dir-regola, għandhom jeħlu l-piena li r-regolament stess jikkontempla għall-ksur ta’ din ir-regola, jiġifieri telfa walkover. M’aħniex kontra li l-partita terġa’ tintlagħab għax aħna nħobbu nirbħu fil-grawnd, imma lanqas nistgħu naċċettaw minn jgħaddina minn għajn il-labra. Il-kwistjoni hi sempliċi: Napoli kellhom jew ma kellhomx dritt ma jmorrux Turin. Jekk kellhom dritt, hu sewwa u xieraq li l-partita terġa’ tintlagħab. Jekk ma kellhomx dritt, allura jridu jingħataw telfa walkover kif jitlob ir-regolament. Kull deċiżjoni oħra tkun biss buffunata!
Matthew Scerri
Illum probabbli mhux se jkollna ebda deċiżjoni dwar Juventus-Napoli. La Repubblica qed tbasssar li l-Imħallef tal-Isports, Gerardo Mastrandea mhux se se jaqta’ s-sentenza llum u se jitlob aktar żmien biex jifli d-dokumentazzjoni marbuta mal-każ. Mhuwiex eskluż lanqas li hu finalment ikollu jgħaddu l-kwistjoni f’idejn il-Procura Federale mmexxija minn Giuseppe Chinè. Il-kwistjoni hi tassew waħda kumplessa u tistgħu toqogħdu ċerti li se ndumu ħafna nisimgħu u naqraw dwarha.
Matthew Scerri
Juventus qed jonoraw l-istruzzjonijiet tal-Lega Calcio u jinsabu fl-Allianz Stadium għall-partita kontra Napoli. Nafu li l-partita mhix se tintlagħab għas-sempliċi raġuni li Napoli ma marrux Turin.
Tħabbar li Juventus se jilagħbu b’dawn il-plejers: Szczesny; Danilo, Bonucci, Chiellini; Cuadrado, Arthur, Bentancur, Kulusevski; Ramsey; Ronaldo, Dybala.
Infakkru li Juventus għandhom l-obbligu li jinżlu fil-grawnd għax inkella l-Lega Calcio u l-FIGC jieħdu passi kontrihom ukoll.
Matthew Scerri
Kulma nqala’ fl-aħħar erbgħa u għoxrin siegħa hu tassew inkredibbli u onestament farsesk. F’sitwazzjonijiet bħal dawn hu normali li kulħadd ikollu opinjoni personali u xi ftit jew wisq ikun hemm diversi interpretazzjonijiet fi ħdan l-istess grupp ta’ supporters. Se nipprova nagħti l-opinjoni tiegħi, li naf li x’aktarx mhux se ssib wisq minnkom li taqblu magħha.
Nibda bielli ntenni dak li ili ġimgħa ngħid: Juventus-Napoli kellha titħassar minħabba r-riskju marbut mal-Covid-19. Fil-fehma tiegħi ma rridux naraw biss iż-żewġ plejers ta’ Napoli li s’issa nstabu pożittivi. L-istampa hi ferm usa’ minn hekk: it-tnejn ta’ Napoli ġew infettati kważi żgur għax ġew f’kuntatt mal-plejers ta’ Genoa (infakkar hemm 22 każ!). Il-biża’ tiegħi dejjem kienet li l-plejers ta’ Napoli setgħu jgħaddu l-virus lill-plejers Juventini u hekk konna nispiċċaw bi tliet timijiet infettati. Nemmen li l-prudenza kienet titlob li Juventus-Napoli titħassar fil-bidu tal-ġimgħa meta kien evidenti li l-każijiet ta’ Genoa ma kinux contained u allura l-imxija tal-virus kienet qed isseħħ b’ritmu mgħaġġel. Nemmen li kieku fil-bidu tal-ġimgħa l-plejers ta’ Napoli twaqqfu milli jittrenjaw, is-sitwazzjoni kienet tkun contained u l-ġimgħa d-dieħla kienu jistghu jirritornaw għat-training u għal-logħob. Ma naħsibx li kellna nagħlqu għajnejna quddiem il-gravità tal-każ ta’ Genoa!
It-tieni punt hu dwar ir-regolamenti li ġew deċiżi. Jien mill-ewwel kont għidt li ma naqbilx magħhom għax il-Covid għallimna li mhumiex tant in-numri in sé li huma inkwetanti, imma kemm is-sitwazzjoni hi contained jew le. Tim jista’ jkollu tlettax-il plejer jew iktar tajbin biex jilagħbu, imma ma jfissirx li dawk il-plejers ma ħadux il-virus mingħand sħabhom. Nafu li t-test jaqbad il-virus biss f’ċertu stadju, u allura għall-fini ta’ prudenza naħseb li kien ikun aħjar li kull sitwazzjoni kienet tkun miflija minn bord ta’ nies esperti tas-settur u nies oħra li m’għandhom ebda rkonnessjoni mal-klabbs tas-Serie A sabiex huma, grazzi għall-għerf tagħhom, jistabilixxu jekk partita tistax tintlagħab jew le mingħajr riskji żejda għall-plejers.
L-aħħar punt, u dan hu wieħed li spiss nagħmel, hu li l-futbol Taljan ma jistax jibqa’ jaqa’ għar-ridikolu quddiem id-dinja kollha b’dal mod. Stupida kemm hi stupida r-regola li ħarġet dil-ġimgħa, irridu nfakkru li din ġiet maqbula mill-Presidenti tas-Serie A. Ir-regoli jsiru biex jiġu segwiti u rispettati. Din l-idea li nies bħal De Laurentis u Lotito mingħalihom jistgħu jagħmlu li jridu trid tinqata’. Il-Lega Calcio u l-FIGC qegħdin hemm biex jagħmlu l-ġid komuni, mhux biss biex iħarsu l-interessi ta’ xi klabbs fuq dawk tal-oħrajn. Jekk verament l-ASL waqqfet li Napoli milli jmorru Turin, kien ikun biżżejjed li jintbagħat id-dokument konċernat lil-Lega u l-partita żgur kienet titħassar. La ma tħassritx sintendi li Napoli ma kellhomx f’idejhom xejn x’juru. Issa minn x’imkien tfaqqas xi ittra żgur u l-Karnival jerġa’ jibda!
Matthew Scerri
Juventus-Napoli llejla mhux se tintlagħab minħabba li Napoli ma marrux Turin għall-partita. Dan ifisser li se jittieħdu passi dixxiplinari fil-konfront ta’ Napoli. Juventus se jingħataw rebħa walkover ta’ 3-0, filwaqt li Napoli x’aktar jitnaqqsilhom punt fil-klassifika.
Matthew Scerri
It-teatrin ta’ Juventus-Napoli mhux se jkollu tmiem malajr daqskemm ħafna qed ibassru. Irridu nippreparaw ruħna għax ġejja battalja legali twila u li minnha ċertament se joħroġ tellief il-futbol Taljan (li biex ngħidu kollox diġà twaqqa’ għaż-żuffjett bil-farsa tal-aħħar erba’ u għoxrin siegħa). Il-kwisjtoni kollha se tkun marbuta ma’ kemm Napoli se jirnexxilhom jippruvaw li l-awtoritajiet lokali ordnawlhom li ma jmorrux Turin. Online hemm ittra maħruġa mill-ASL fejn hu speċifikat li l-plejers ta’ Napoli għandhom jitqiesu ‘contatti stretti’ u jridu jitpoġġew taħt kwarantina minħabba kwistjoni marbuta mas-saħħa pubblika. L-ASL qed tirrimarka li l-plejers żgur kien se jkollhom kuntatt ma’ terzi persuni fil-vjaġġ tagħhom bir-riskju li l-virus ikompli jinfirex. Dad-dokument, dejjem jekk hu awtentiku, jista’ jagħti l-bażi legali biex Napoli jirbħu l-appell kontra d-deċiżjoni probabbli li Juventus jingħataw rebħa walkover ta’ 3-0.
Matthew Scerri