Posts

It-teatrini ta’ dil-ġimgħa!

/in /by

Waslet biex tintemm l-ewwel ġimgħa mit-twaqqif tal-European Super League li mingħajr dubju serqet ix-xena fl-aħbarijiet u nistgħu ngħidu li għal darba wara iktar minn sena kellna xi ħaġa li fuqu tkellimna iktar milli fuq il-Covid!

Nibda billi ngħid li jien il-pożizzjoni tiegħi dwar is-Super League għamiltha ċara u ktibtha f’artiklu aktar kmieni dil-ġimgħa. Jien favur il-proġett għax nemmen li l-affarijiet għandhom jinbidlu biex insalvaw il-futbol. Wara ġimgħa nisma’ u naqra għadni dejjem iktar konvint mis-Super League u kull darba li jiftaħ ħalqu Ceferin inħossni nikkonvinċi ruħi li l-unika tama li għandna li l-futbol ikun salvat hu li tibda din l-imbierka Super League.

Nifhem u nirrispetta lil dawk is-supporters li jaħsbuha f’mod differenti. Nifhem li wara t-talba tagħhom hemm sejħa għal futbol inqas iddominat mill-flus u li jkun sport ta’ divertiment aktar milli bussiness. Sa ċertu punt naqbel magħhom, imma fl-istess ħin għadni m’iniex konvint li dan kollu jista’ verament iseħħ.

Ma naċċettax, però, li jkollna lezzjonijiet ta’ moralità mingħand nies bħal Mourinho, Guardiola u Neymar li ilhom snin jaqilgħu somom fenomenali u jaħdmu biss f’klabbs sinjuri li l-ħin kollu jippumpjaw il-flus. Il-Malti jgħid ‘Biex tiskonġra trid tkun pur” u ma naħsibx li nies bħal Mourinho jew Neymar jistgħu jitqiesu bħala paladini taż-‘żgħar’. Guardiola, imbagħad, jaħdem għal klabb li kiser ir-regoli tal-Fair Play Finanzjarju bla ma ħallas għal għemilu għax bħas-soltu l-‘mamma’ Uefa ħadet ħsieb kollox!

Hu inaċċettabbli wkoll dak kollu li għamel u qal Ceferin dil-ġimgħa. Hu bniedem frankament ridikolu li l-ħin kollu joħroġ il-ħdura tiegħu. Jekk il-futbol hi l-logħba tas-supporters kif qal, allura jmissu jibda jirrispetta lilna s-supporters.

Kif għidt aktar kmieni dil-ġimgħa, nemmen li Ceferin u sħabu huma rrabjati biss għax se jitilfu l-poter u l-monopolju tagħhom. Ilhom għexieren ta’ snin jużaw il-flus li jiġġeneraw il-klabbs biex huma jkunu jistgħu jagħmlu l-lobbying tagħhom u jżommu s-siġġu tagħhom. Xejn iktar! Moħħhom biss fihom infushom u fil-poter li għandhom u jridu jbellgħuhielna li qed jaħdmu għas-supporters, għall-klabbs iż-żgħar, eċċetra. Ceferin imissu jaqbad jirriżenja b’mod immedjatament. Aħna bħala supporters għandhom bżonn lit-tim tagħna u mhux bniedem arroganti bħal Ceferin. Aħna nżommu mal-Juventus u mhux mal-Uefa jew ma’ Ceferin.

Mhux se noqgħod nidħol wisq fil-mertu ta’ ħafna kritika li saret fl-aħħar jiem. Xtaqt nagħmel biss żewġ punti li għalija huma ta’ għafsa ta’ qalb:

(i) Is-Super League twaqqfet minn tnax-il tim. Illum kulħadd qed jipponta subgħajh lejn Agnelli u Perez. L-għaxar klabbs l-oħra għandhom l-istess tort (dejjem jekk hu tort). Il-media qed tipprova tbella’ lis-supporters li Agnelli u Perez biss huma ħatja. L-oħrajn, imma nsaqsi jien, ġew sfurzati li jiffirmaw il-kuntratt? Jew iffirmaw il-kuntratt għax raw li kien jaqblilhom? U għala ħarġu jumejn wara li ffirmaw? Mela ħasbu li dan hu kuntratt ta’ erba’ soldi?!

(ii) Ħafna tkellmu dwar mertu. Sostnew li huma kontra s-Super League għax se jkun hemm timijiet li jkollhomposthom garantit u allura ma jidħlux fuq bażi ta’ mertu. Forsi tajjeb li dawn in-nies jifhmu li timijiet bħal Juventus u Real Madrid ilhom li kisbu u wrew il-mertu tagħhom. Hemm l-istorja tal-klabbs li tixhed dan. Li Ancelotti bħala kowċ ta’ Everton jiġi jitkellem fuq mertu hi ħaġa ridikola. Tgħid veru jaħsibha hekk jew bħas-soltu qed juża s-Super League biex jattakka għal xejn b’xejn lil Juventus?

Matthew Scerri

Ceferin ikompli jparla fil-vojt

/in /by

Der Spiegal qed jirrapurtaw li Alexandr Ceferin stqarr dan li ġej: “Min se jibqa’ involut fis-Super League, fil-futur mhux se jkun jista’ jilgħab fil-kompetizzjonijiet tal-Uefa. Il-kompetizzjonijiet tagħna se jibqgħu fantastiċi anki mingħajr dawn l-erba’ timijiet. Nistgħu ngħidu li jekk xi ħadd irid jibqa’ egoist, jista’ jipprova jagħmel mill-ġdid is-Super League. Diġà ppruvaw u fallew!”

Ir-riferiment hu ovvjament għal Juventus, Real Madrid, Barcellona u Milan li s’issa għadhom ma telqux mis-Super League. Tajjeb infakkru li hemm kuntratt iffirmat u hemm penali li trid titħallas minn min se jitlaq mis-Super League. Skont rapporti mhux uffiċjali, il-penali tammonta għal 300 miljun. Hi kemm hi l-penali, hi tal-mistħija li Ceferin qed jitkellem b’dal-mod. Hu qed jiddefendi l-interessi tiegħu personali u ta’ sħabu, u qed jiġi jaqa’ u jqum mis-supporters. Ngħid għalija Ceferin u sħabu jistgħu jagħmlu l-isbaħ kompetizzjoni, biss jekk mhux se jkun hemm Juventus, għalija dik il-kompetizzjoni se tkun qisha ma teżistix. Jien supporter Juventin u se nibqa’ nsegwi lil Juventus kulfejn se jilagħbu bħalma fl-2006 ma ddejjaqtx insegwi lil Juventus fis-Serie B!

Matthew Scerri

Illum se jiltaqa’ l-Eżekuttiv tal-Uefa

/in /by

Illum mistenni jiltaqa’ l-Eżekuttiv tal-Uefa sabiex jiddiskuti fost l-oħrajn dak kollu li nqala’ dil-ġimgħa b’rabta mal-European Super League. L-indikazzjonijiet huma li mhux se jittieħdu passi fil-konfronti tat-tnax-il tim fundatur tas-Super League. Probabbli imma li l-Uefa se tieħu passi sabiex fil-futur ma jkunx possibbli li timijiet jaħdmu biex iwaqqfu kompetizzjonijiet simili.

Matthew Scerri

Agnelli: “Is-Super League ma tistax tkompli”

/in /by

Il-proġett tal-European Super League wasal fi tmiemu. Andrea Agnelli stess illum ikkonferma li l-proġett ma jistax jibqa’ għaddej la darba ħafna klabbs telqu. Ceferin tkellem ftit tal-ħin ilu u sostna li “kulħadd reġa’ ġie lura, Naf li għandhom ħafna x’jagħtu lill-futbol f’kull livell.” Il-kliem ta’ Ceferin jixhed il-partijiet għamlu paċi u li se jkunu qed jaħdmu mill-ġdid flimkien.

Matthew Scerri

Mil-lenti tal-President

/in /by

Kulħadd għandu dritt għall-opinjoni rigward din l-imbierka Superleague, però li ħafna minnkom li tissejħu Juventini toħorġu qatta bla ħabel kontra Agnelli u tinsew x’għamel f’dawn 9 snin ma niflahiex!

Ħafna minnkom issa stenbaħtu li l-futboll huwa flus biss u l-UEFA xebgħet terda’ u l-klabbs jieħdu il-loqom u l-Players iridu jitħallsu bil-miljuni! Ħafna minnkom tridu l-aqwa players fit-tim bil-paga tagħhom xi 30 miljun fi sena, min ser iħallashom dawn? Min fejn ser jiġu il-flus speċjalment bil-pandemija li għaddejjin minnha u dħul XEJN!!

Għax bi rispett kollu ħafna lanqas iħallsu Sħubija ta klabb lokali aħseb u ara kemm ser jgħatu ċenteżmu lil Juventus!!

U xi ngħidu għal players ser inaqqsu drastikament il pagi? Għax anki biex konna ngibu ex players fil-klabb tagħna konna nħallsu mijiet ta’ liri biex tifirħu bihom il-membri.

L-UEFA li fi ħdanha kellha lil Blatter u Platini u dawn instabu ħatja ta korruzjoni ser tiftaħ ida u tejn lil klabbs f’mument daqshekk delikat!

Nagħlaq billi infakkar lil dawn imsejħa Juventini fi żminijiet ta’ Blanc, Cobolli Gigli u Maifredi….. Jekk ma tiftakrux fittxu li storja ħalli forsi tapprezzaw dak li għamel Andrea Agnelli.

Joseph Fenech

L-ultras Juventini jipprotestaw

/in /by

Tard ilbieraħ filgħaxija twaħħlu żewġ streamers mill- ultras ta’ Juventus mal-kanċelli tal-Allianz Stadiums. L-istreamers huma kontra s-Super League u għal darb’oħra kien imtenni li m’hemmx rispett lejn is-supporters. Tajjeb infakkru li l-ultras ilhom fi gwerra ma’ Juventus, l-ewwel bi strajk tas-support meta l-grawnds kienu miftuħin u fl-aħħar żmien permezz ta’ streamers ta’ dat-tip li kienu qed jitwaħħlu.

Matthew Scerri

Super League. Il-proġett se jkun imfassal mill-ġdid

/in /by

Permezz ta’ stqarrija uffiċjali, il-klabbs fundaturi tal-European Super League ħabbru li se jkun qed jirrevedu mill-ġdid il-punti kruċjali tal-proġett. Fl-istqarrija naqraw li l-klabbs għadhom konvinti mill-validità tal-proġett, biss lesti jikkunsidraw xi bidliet bil-għan jibqa’ dejjem li tintlaħaq stabilità finanzjarja filwaqt li s-supporters jingħataw l-aqwa spettaklu possibbli. Sar riferimetn għal sentenz ta’ qorti Spanjola li kkonfermat kemm il-proġett ma jikser ebda liġi. Fl-istess ħin inqtal li l-klabbs Ingliżi kellhom joħorġu mis-Super League minħabba l-pressjoni li saritilhom. Issa l-proġett se jkun imfassal mill-ġdid.

Matthew Scerri

Riskju kbir li s-Super League tisfaxxa fix-xejn

/in /by

Fl-aħħar minuti qed ikun irrapurtat li tard illejla, għall-ħabta tal-11.30 ta’ filgħaxija, se ssir laqgħa straordinarja li tista’ twassal biex il-proġett tal-European Super League jisfaxxa fix-xejn. Erba’ klabbs Ingliżi (Chelsea, Arsenal, Manchester United u Manchester City) jidhru li qed jirtiraw mis-Super League wara l-protesti tas-supporters. Anki Atletico u Barcellona jidhru li  m’għadhomx daqshekk konvinti mill-proġett. Hemm għidut anki li l-President ta’ Manchester United irriżenja b’rabta mal-każ. Insomma, is-Super League tidher fil-punt li tisfaxxa fix-xejn. Tajjeb ngħidu imma li t-12-il klabb iffirmaw kuntratt li jorbothom mas-Super League u mhux se jkun faċli li jinħallu minnu. Fi kliem ieħor jista’ jkun li s-Super League ma tkunx tista’ tibda imma l-klabbs li ma jridux jibqgħu fiha jkollhom jidħlu f’battalja legali li taf iddum is-snin.

Matthew Scerri

Min huma jew se jkunu t-tlieta l-oħra?

/in /by

Il-European Super League mistennija jkollha 15-il klabb fundatur. Tnax minnhom diġà nafuhom. Jonoqs li nsiru nafu min huma jew se jkunu t-tlieta l-oħra. L-għidut kien li t-tliet timijiet huma: PSG, Borussia u Bayern Munich. Intqal li PSG ma ridux jidħlu fis-Super League minħabba sid il-klabb tagħhom xtara t-tv rights taċ-Champions League. Qatt ma ġie spjegat, mill-banda l-oħra, għala l-Ġermaniżi għadhom ma ffirmax. Florentino Perez, fl-intervista tal-bieraħ, stqarr li PSG qatt ma ġew mistiedna jissieħbu fis-Super League, filwaqt li qatt ma kien hemm diskussjonijiet mal-klabbs Ġermaniżi. Id-domanda tibqa’ għaldaqstant: min se jkunu t-tliet klabbs fundaturi l-oħra? Fl-aħħar sigħat issemmew Roma. Tgħid verament il-klabbs l-oħra se jkunu ġejjin huma wkoll mill-Italja, mill-Ingilterra u minn Spanja? Jew finalment se jibqgħu biss tnax-il klabb fundatur bil-possibbiltà li jkun hemm tmien timijiet oħra li jinbidlu kull sena? Nistennew u naraw.

Matthew Scerri

Ngħiduha kif inhi: ma setax jibqa’ kollox kif kien!

/in /by

Ikolli nammetti li llum inħossni qed ngħix ġurnata storika li se tibdel il-kors tal-istorja, xi ftit jew wisq bħal meta ħarġet is-sentenza Bosman. Il-European Super League saret realtà wara li ilna snin nisimgħu dwarha. Kif kien mistenni l-ħolqien tal-European Super League kien qisu terremot li ħasad lil ħafna u qanqal reazzjonijiet ta’ kull tip.

Min-naħa tiegħu jkolli ngħid li jien favur dal-proġett u se nispjega r-raġunijiet li jwassluni nikkonkludi li s-Super League hi ta’ ġid.

Nibda biex ngħid li l-idea kemxejn ‘romantika’ ta’ futbol tal-fqar minflok tas-sinjuri, ta’ futbol fejn iż-żgħir jikkompeti fuq l-istess livell mal-kbir, hi idea mqtugħa mir-realtà. Il-futbol ilu business għal snin twil u dawn narawh f’kull livell, inkluż fost l-hekk imsejħa dilettanti. Jekk hawn min jaħseb li fin-nurseries jew anki fl-iskejjel tal-futbol l-iskop mhuwiex wieħed ta’ flus, sejjer żball bil-kbir. Semmai hu iktar realistiku li ngħidu li l-klabbs il-kbar għal għexieren ta’ snin taw l-opportunità lill-klabbs iż-żgħar li jibqgħu jeżistu u jagħmlu l-business tagħhom.

Jekk inħarsu lejn l-istampa sħiħa ta’ dak li ġara tard ilbieraħ insibu li bil-ħolqien tas-Super League, il-klabbs il-kbar tal-Ewropa għażlu li jimxu fid-direzzjoni tal-business sportiv Amerikan. Għażla elitista, vera, però għażla li kellha tittieħed għax il-klabbs il-kbar huma kollha midjunin u ma jistgħux jibqgħu għaddejjin b’dak li tgħaddilhom l-Uefa. Barcellona, biex insemmu klabb wieħed biss, għandhom iktar minn biljun Ewro f’dejn. Juventus għandhom erba’ mitt miljun dejn. It-timijiet l-oħra kollha għandhom dejn ikbar minn dak ta’ Juventus. Djun kbar li ma jistgħux jitħallsu jekk kollox jibqa’ kif kien fl-aħħar snin. Il-klabbs għażlu għalhekk li jieħdu d’idejhom it-tmexxija tal-finanzi li huma stess jiġġeneraw flok iħallu lill-Uefa ddaħħal dawn il-flus kollha u tagħti lura parti sostanzjalment żgħira minnhom.

Dwar l-Uefa hemm ħafna xi ngħidu. Li l-Uefa tiġi titkellem illum fuq valuri u prinċipji hi kemxejn ħaġa ridikolia Irridu nagħlqu għajnejna u nagħmluha tabirruħna li fl-aħħar snin kollox mexa sew? Irridu taparsi ma nindunawx li taħt ħafna aspetti kien hemm timijiet minn pajjiż wieħed li ġew dejjem iffavuriti fuq l-oħrajn? Il-verita’ hi li l-uffiċċjali tal-Uefa jqassmu għall-finijiet politiċi tagħhom il-flus li jiġġeneraw il-klabbs il-kbar. Huma jeħtieġu l-voti biex ikunu kkonfermati fil-karigi tagħhom u allura jwegħdu l-flus lill-‘fqar’ biex jiksbu l-voti tagħhom. Din mhix għajnuna, mhix karità, mhix ġustizzja jew tqassim ġust ta’ riżorsi. Din tissejjaħ lobbying!

Hemm ħafna x’wieħed jgħid anki dwar l-FIGC u l-Lega Calcio. Il-komportament tagħhom kien dejjem ġust? Jew fil-verità ilna snin taħt id-dittatura ta’ Lotito u De Laurentis? Fejn kienu t-timijiet li llum qed jitolbu li jkunu mħarsa l-valuri tal-isport meta ġiet ivvintata Calciopoli biex jinqered tim? U tħarsu l-valuri tal-isport meta Lazio lagħbu bi plejer pożittiv għall-Covid-19 bla ma ngħataw telfa walk-over? Tħarsu l-valuri tal-isports meta Napoli nstabu ħatja li għamlu pressjoni fuq l-awtoritajiet tas-saħħa biex ikollhom skuża ħalli ma jinżlux għal-logħob kontra Juventus (bit-teatrin tal-Appell, imbagħad, fejn il-Federazzjoni ma bagħtitx id-dokumenti tal-każ u hekk Napoli rebħu l-appell)? Dawn li qed jgħajru lil Juventus, Inter u Milan, qegħdin verament jiddefendu l-valuri tal-isports jew huma rrabjati li tħallew barra? Hi kritika ġenwina jew sempliċiment maħruqin li mhux se jkomplu jpappuha fuq dahar it-tlieta l-kbar?

Ejjew inkunu onesti: il-futbol hu business u bħal f’kull business ieħor kulħadd għandu d-dritt li jagħmel l-interessi tiegħu. L-affarijiet kif kienu sal-bieraħ m’għadhomx jagħmlu wisq sens. Konna qegħdin f’xifer irdum b’ħafna klabbs qrib li jfallu. Is-Super League probabbli kienet l-uniku mod biex il-futbol ta’ ċertu livell jibqa’ jeżisti. Iż-‘żgħir’ illum irid jaqdef ftit iktar waħdu imma finalment ħadd ma jista’ jgħid jekk hux se jkun qabillu hekk ukoll!

Matthew Scerri